Wawinyo malit adada ka ce kiryemo watwa nyo laremwa mo macok ki i kacokke pi kwero weko balle. Kit ma wajolo kwede tira me Baibul i lok man twero nyutu tut pa marwa pi Lubanga kacel ki bedo ki winywa i kom yubbe. * Nen kong lapeny mogo ma bino ma lubbe ki lok man.

Omyero water ngat ma kiryemo ki i kacokke nining? Baibul waco ni: “Pe wuribbe ki ngat mo ma gilwongo ni dano pa Kricito, ka otimo tim kwele, nyo ka en obedo laworo me jami, nyo ka en obedo dano ma woro cal jok, gwok nyo layet dano, lamero nyo layak; pe wunywak cam kacel ki kodi dano-nu.” (1 Jo Korint 5:11) Ma dok i kom “ngat mo ma pe moko i pwony pa Kricito,” wakwano ni: “Pe wujole i ot, pe wumote bene; pien ngat ma omote nongo oribbe kwede i ticce marac.” (2 Jon 9-11) Pe omyero wanywak lok me cwiny nyo kit ribbe mo keken ki jo ma kiryemogi woko ki i kacokke. Watchtower me Sektemba 15, 1981, pot karatac 25, owaco ni: “Moto ngat moni ni ‘kop ango’ twero yabo yo me boko lok ma cawa mukene romo o wa i mako lirem. Tika wamito ni watim gin ma yabo yo me cako lok ki ngat mo ma kiryemo woko ki i kacokke?”

Mono kwero ribbe ki jo-nu mitte adada? Mitte, pi tyen lok mapol. Mukwongo, nyutu ni wan lugen bot Lubanga kacel ki Lokke. Wabedo ki winy bot Jehovah pe i kare ma nongo jamine tye maber ki tung botwa keken ento wa i kare ma nongo tye matek bene. Mar pi Lubanga terowa i lubu cikke ducu, pien nongo wangeyo ni ticce ducu tye atir pi mar ki dok ni cikke kelo adwogi maber. (Icaya 48:17; 1 Jon 5:3) Me aryone, kwero ribbe ki latim bal ma pe ongut gwokowa ki kacokke ki i cilo kacel ki kwo marac, dok weko  nying kacokke bedo maleng. (1 Jo Korint 5:6, 7) Me adekke, cungowa matek i kom cik me Baibul romo bene konyo wa ngat ma kiryemo-ni. Ka ce walubu tam ma nongo komitti me ngolo kop okati kwede, ci gwok nyo watwero gudu cwiny latim bal ma nongo okwero kony ma luelda guyelle me miyone. Kwero ribbe ki danowa mo me amara romo konye me yabo wange me ‘niang pire kene,’ weko neno rac pa balle ci cako kwanyo yo me dwogo cen bot Jehovah.—Luka 15:17.

Ka ngat ma kiryemo-ni obedo watwa kono? Ka tye kit meno, ci wat macok ma bedo i kin jo me ot twero kelo twon atematema madit i komwa. Omyero water watwa mo ma kiryemo nining? Pe watwero nyamo jami ducu i buk man, ento kong wanenu jami aryo ma pigi tego.

I cawa mukene nongo ngat ma kiryemo-ni pud bedo i paco acel ki jo me otgi. Kit ma ryeme ca pe keto wat ma nongo tye i kingi calo jo me ot-ti, kwo me paco twero medde gire kit ma jwi. Ento, ngat meno nongo oyero me turo wat me cwiny ki lupacone ma gubedo jo muye pi kwanyo yo marac ca. Pi meno jo ma lugen me ot pe omyero guribbe i yo me cwiny kwede. Me labolle, ka ce ngat ma kiryemo-ni tye gang, en pe myero onywak i yub me kwano Baibul kacel ki jo me ot. Ento ka ngat ma kiryemo-ni obedo latin, ci nongo tic me pwonye tye i wi lunyodone. Pi meno, lunyodo ma lumar giromo keto yub mo me kwano Baibul ki latin meno. *—Carolok 6:20-22; 29:17.

I kare mogo nongo wat moni ma kiryemo-ni dong pe bedo kacel ki lupacone. Kadi ka bed ni jo me ot meno kare mukene girwatte kwede pi neno lok ma paco, ento rwatte ma kit meno myero kiwek obed manok adada. Jo me odi ma gubedo Lukricitayo ma lugen pe giyenyo tyen lok mo  ma kore pe me rwatte ki watgi mo ma kiryemo ma pe bedo kwedgi i gang acel. Ma ka meno, bedo lugen bot Jehovah ki dulle miyo gilubu cik me Ginacoya ma mako dano ma kiryemo. Bedo lugengi-ni nongo tye pi ber bedo pa latim bal-li dok romo konye me nongo pwony ki i pwod ma kimiyo. *—Jo Ibru 12:11.