1, 2. Pingo pire tek me dongo niye i kare-ni? Mi lapor.

NIYE obedo kit ma mwonya dok gudo cwinywa mada. Ento, ka wakwano nyo wawinyo pi niye, bedo ber ka bene watamo pi lok mukene ma en aye: “Mitte pi oyotoyot!” Ki lok ada, ka wape ki niye, ci omyero wabed kwede oyotoyot. Dok ka watye ki niye, ci omyero waket cwinywa i gwokone ki dongone. Pingo?

² Go kong ni itye ka ngolo twon aroo mo malac adada. Ento itye ka mito pii mada. Ka inongo pii mo, itwomo ci igwoko ki i lyeto me ceng. Dong, omyero ipongo wiye wek ibed ki muromo wang ma io ka ma ibicito iye-ni. I kare-ni, watye ka kwo i aroo i lok me cwiny, i lobo ka ma niye me ada ma tye calo pii nongone tek dok cwiny woko oyotoyot ka pe kigwoko dok kipongo wiye maber. Kit macalo pe waromo kwo labongo pii-ni, wan bene pe watwero gwoko watwa ki Jehovah ka wape ki niye.—Rom. 1:17.

3. Ngo ma Jehovah omiyo me konyowa wek wadong niye, dok jami aryo mene ma myero wiwa opo me timogi?

³ Jehovah ngeyo ni wamito niye pi oyotoyot, dok en ngeyo kit ma dongone ki gwokone tek kwede i kare-ni. Labongo akalakala, meno aye oweko en ominiwa lanen mapol me aluba. Jehovah omiyo lakwena Paulo ocoyo ni: “Wulub kit pa jo ma pi niyegi, ki pi diyo cwinygi, gitye ka nongo gin ma yam Lubanga ociko pire.” (Ibru 6:12) Dok meno aye omiyo dul pa Jehovah cuko cwinywa me tic matek me lubo lanen pa co ki mon me niye, calo lanen ma wakwano i buk man. Ento, ngo ma myero watimu kombeddi-ni? Wiwa myero opo i kom jami aryo: (1) Omyero wamedde ki jingo niyewa; (2) omyero wabed ka tamo i kom gen ma watye kwede.

4. I yo ango ma Catan obedo lamone me niye, ento pingo pe omyero walwor?

⁴ Medde ki jingo niyeni. Niye tye ki lamone mo marac adada—Catan. Laloc me lobo-ni oloko lobo-ni odoko calo aroo mo ma dongo niye tek iye mada. En tek katowa mabor ata. Tika omyero walwor ni pe waromo dongo ki dong jingo niyewa? Pe wacel! Jehovah obedo Larem macok pa jo ducu ma gimito bedo ki niye me ada. En miniwa gen ni ka en etye ka konyowa, ci watwero lweny i kom Larac-ci kun waweko en ringo woko ki botwa! (Yak. 4:7) Walwenyo i kom Catan ki kwanyo cawa nino ducu me dongo ki jingo niyewa. Watwero timo meno nining?

5. Co ki mon me niye ma kiloko i komgi i Baibul-li gucako bedo ki niye nining? Tit kong.

 ⁵ Kit ma waneno kwede, co ki mon me niye ma kiloko i komgi i Baibul-li pe kinywalogi ki niye. Kwogi nyuto ni niye obedo but nyig ma nyak pi cwiny maleng pa Jehovah. (Gal. 5:22, 23) Gin gulego pi kony, ci Jehovah omedde ki jingo niyegi macalo adwogine. Walubu lanengi, kun wiwa pe wil ni Jehovah miyo cwiny mere maleng bot jo ducu ma gipenyo pire dok gitimo gin ma rwatte ki legagi. (Luka 11:13) Tika tye gin mukene ma waromo timone?

6. Ngo ma myero watim me nongo adwogi maber ki i kwano lok ma kicoyo i Baibul?

⁶ I buk man, wanyamo labol mogo manok pa jo ma gunyuto niye matek. Ento tye labol mukene mapol ata! (Kwan Jo Ibru 11:32.) Pi meno, bedo ber me kwano lok i kom lanen magi ki acel acel kun walwodogi matut. Ka wakwano lok meno ngwec ngwec, ci pe wabijingo niyewa matek. Me nongo adwogi maber ki i kwanwa, omyero water kare me donyo matut i lok ma kicoyo i Baibul kun wangiyo tyeng murumo wang ginacoya moni kun wangiyo kwo ma ngat moni owok ki iye. Ka kare ducu wiwa po ni co ki mon magi ma luroc-ci onongo gitye ki ‘kit macal ki mewa,’ ci lanengi bigudo cwinywa. (Yak. 5:17) Ki cwiny me kica, watwero goyo i wiwa kit ma guwinyo kwede i kare ma gukemme ki atematema ki pekki ma cal ki mewa.

7-9. (a) Co ki mon me niye ma kiloko i komgi i Baibul-li onongo kono guwinyo nining ma lubbe ki kit ma waworo kwede Jehovah i kare-ni? (b) Pingo omyero wamedde ki jingo niyewa ki ketone i tic?

⁷ Tam ma wamoko kacel ki jami ma watimo bene twero jingo niyewa. Tye ni, “niye ka pe giketo i tic, nongo oto woko.” (Yak. 2:26) Go kong yomcwiny ma co ki mon ma wanyamo lok i komgi-ni kono gubibedo kwede ka onongo kiminigi tic ma Jehovah ominiwa me timone i kare-ni!

⁸ Me labolle, ket ni onongo kiwaco bot Abraim ni pe owor Jehovah i nyim keno tyer ma kicano i dye tim, ento owor i kacokke pa luye luwote i Odi me Ker ma mwonya ki dong i gure madito, ka ma kinyamo dok kitito matut lok i kom cikke ma en oneno “anena ki ka mabor.” (Kwan Jo Ibru 11:13.) Dok ket ni onongo kiwaco ki Elia ni ticce pe kwako neko lunebi pa Baal i kare ma en tye ka tute me tic pi Jehovah i te loc pa kabaka ma ongak, ento kwako limo dano kun nywako kwedgi kwena me kwe cwiny dok ma miyo gen. Pe itamo ni co ki mon me niye ma kiloko i komgi i Baibul-li onongo kono gujolo kit ma waworo kwede Jehovah i kare-ni ki cinggi apar?

⁹ Pi meno, wamedde wunu ki jingo niyewa kun watimo gin matir. Ka watimo kumeno, ci nongo watye ka keto i tic lanen me niye pa co ki mon ma kiloko i komgi i  Lok pa Lubanga. Kit ma kitito kwede i acakki-ni, wacako winyo ni wacok kwedgi macalo lurem. Ento, cokcok-ki lirem ma kit meno bidoko kome ki kome.

10. Yomcwiny ango ma wabibedo kwede i Paradic?

¹⁰ Bed ka tamo i kom gen ma itye kwede-ni. Co ki mon me niye kare ducu gubedo ka nongo cuko cwiny madit ki i gen ma Lubanga ominigi. In kono? Me labolle, go kong yomcwiny ma ibinongo me rwatte ki lutic pa Lubanga ma lugen i kare ma ‘kibicero jo ma kitgi atir.’ (Kwan Tic pa Lukwena 24:15.) Lapeny mene ma imito penyogi kwede?

11, 12. I lobo manyen, lapeny mene ma ibipenyo kwede (a) Abel? (b) Nua? (c) Abraim? (d) Ruth? (e) Abigail? (f) Esta?

¹¹ Ka irwatte ki Abel, tika ibibedo ki miti me penye kit ma lunyodone onongo gitye kwede? Nyo iromo penyo ni: “Tika iloko ki lukerubi ma gubedo ka gwoko dog poto me Eden? Tika gugamo lokki?” Nua kono? Itwero penye ni: “Jo Nepil tika guonyo koyo i komi? In igwoko lee ducu nining i yeya pi mwaka acel kulu?” Ka irwatte ki Abraim, iromo penye ni: “Tika iloko ki Cem? Anga ma opwonyi lok kom Jehovah? Tika obedo tek me weko Ur?”

¹² I yo acel-lu bene, tam kong i kom lapeny mogo ma iromo penyo kwede ki mon me niye ma kibicerogi. “Ruth, ngo ma okonyi me moko tammi me doko lawor Jehovah?” “Abigail, tika ibedo lwor me waco ki Nabal kit ma ikonyo kwede Daudi?” “Esta, ngo ma otimme i komi ki Mordekai i nge lok ma kicoyo i komwu i Baibul-ni?”

13. (a) Kodi lapeny ango ma jo ma kicerogi guromo penyi kwede? (b) In iwinyo nining i kom gen ma watye kwede me rwatte ki co ki mon me niye me kare ca?

¹³ Ngene kene ni, co ki mon magi me niye bene nen calo gibibedo ki lapeny mapol piri. Pud dong obibedo me yomcwiny ya me tittigi lok i kom kare me agikki ki kit ma Jehovah ogoyo kwede laa i kom jone i kare man marac-ci! Labongo akalakala, ka gupwonyo kit ma Jehovah ocobo kwede cikkene ducu, ci bigudo cwinygi adada. I kare me anyim, pe dong bimitte ni omyero wago cal pa lutic pa Lubanga ma lugen ma kiloko i komgi i Baibul i wiwa. Gin gibibedo kacel kwedwa i Paradic! Pi meno, tute matek i kare-ni me neno jo magi macalo dano adana. Medde ki lubo lanengi me niye. Walego ni inong yomcwiny i tic pi Jehovah pi naka kacel kwedgi macalo luremi macok!