TIKA imaro ka onongo itwero timo gin mo keken ma cwinyi mito? Tika tye kare mogo ma pe imito ni ngat mo aye owacci gin ma myero itim? Kombeddi kong iwacca gin ma itamo labongo mungone.—

In itamo ni mene maber boti? Itamo ni mono pore me timo gin mo keken ma cwinyi mito? Kece nyo inongo adwogi maber ka iwinyo babani ki mamani?— Lubanga wacci omyero iwiny lunyodoni, man nyuto ni tyen lokke tye. Kong wanenu ka ce watwero niang tyen lok meno.

Mwakani tye adi?— Ingeyo mwaka pa babani?— Mamani tye ki mwaka adi, min babani nyo won mamani kono?— Gin dong gukwo pi mwaki mapol makato in. Ka ngat moni medde ki bedo kwo, en medde ki bedo ki kare me pwonyo jami mapol. En winyo, neno, dok timo jami mapol mwaka ki mwaka. Pi meno, jo matino giromo nongo pwony ki bot jo muteggi.

Ingeyo ngat mo ma mwakane tidi loyo megi?— In mono ingeyo jami mapol ma en pe ngeyogi?— Pingo in ingeyo jami mapol? — Pien in dong iri i kwo makato en. Ibedo ki kare me pwonyo jami mapol makato ngat ma mwakane tidi loyo megi.

Anga ma okwo pi mwaki mapol ma loyo in nyo an nyo ngat mo keken?— Lubanga Jehovah. En ngeyo jami mapol loyo in wa an bene. Ka en owacci myero watim gin mo keken, omyero wange ni meno nongo obedo gin matir me atima, kadi bed ni timone romo bedo tek. Tika ingeyo ni kadi wa Lapwony Madit bene onongo ni bedo lawiny tek tutwal?—

I nino mo acel, Lubanga openyo Yecu me timo gin mo matek adada. Yecu olego pire kit ma waneno kwede i cal kanyi. En olego ni: ‘Ka imito, kwany gin matek man woko ki bota.’ I lega man, Yecu onyutu ni pol kare pe yot me timo miti pa Lubanga. Ento Yecu ogiko legane nining? Tika ingeyo?—

Yecu ogiko legane kun wacci: “Pe obed macalo an amito; gin ma in imito aye myero otimme.” (Luka 22:41, 42) En onongo mito ni miti pa Lubanga aye otimme ento pe mege. Yecu omedde anyim ci otimo gin ma Lubanga mito ento pe gin ma en tamo ni ber.

Pwony ango ma wanongo ki i lok man?— Wapwonyo ni kare ducu ber me timo gin ma Lubanga waco, kadi bed ni timone romo bedo tek. Ento tye gin mukene ma wapwonyo. Ingeyo ngo ma gin meno obedo?— Wapwonyo ni Lubanga gin ki Yecu pe gubedo ngat acel, kit ma jo mogo giwaco kwede. Lubanga Jehovah oteggi dok ngeyo jami mapol kato Wode Yecu.

 Ka wawinyo Lubanga, ci nongo watye ka nyutune ni wamarre. Baibul wacci: “Maro Lubanga en aye gwoko cikke.” (1 Jon 5:3) Ineno, wan ducu myero wawiny Lubanga. In imito winyo Lubanga, pe kumeno?—

Kong wayab Baibul wek wanen gin ma Lubanga wacci lutino myero gutim. Wabikwano gin ma Baibul waco i buk pa Jo Epeco cura 6, tyenge 1, 2 ki 3. Wacci: “Wun litino, wuwiny lunyodowu i Rwot, pien meno aye ber. Yam gicoyo ni, ‘Wor woru ki meni.’ Man aye cik mukwongo ma giciko pi gin mo maber ma bia ki iye, ni, ‘Wek ibed ma nyimi leng dok iri i lobo pi kare malac.’”

Ineno, Lubanga Jehovah kikome aye tye ka wacone boti ni myero iwiny babani ki mamani. Ka kiwacci ‘worgi’ nongo te lokke ngo? Te lokke ni lubo gin maber ma giwacci. Dong, Lubanga ocikke ni ka iwinyo lunyodoni, ci ‘ibiri i lobo pi kare malac.’

Wek kong atitti lok i kom jo mogo ma kilaro kwogi pien ni gubedo luwiny. Jo magi gukwo wacon i boma me Jerucalem. Pol pa dano ma i boma meno pe guwinyo lok pa Lubanga, pi meno Yecu ocikogi ni Lubanga bituro boma meno woko. Yecu bene owaccigi kit ma giromo loyo kwede ka gimaro gin matir. En owacci: ‘Ka wuneno mony orumo Jerucalem, ci wubingeyone ni kare me tyekone dong cok. Meno aye dong kare me a woko ki i Jerucalem me ringo i wi godi.’—Luka 21:20-22.

Kit ma Yecu owaco kwede, lumony gubino ka lweny i kom Jerucalem. Lumony pa Luroma guromo woko. Ci pi tyen lok ma pe kingeyo, lumony magi gua woko. Ento pol pa dano gutamo ni peko mo dong pe. Pi meno, gin gubedo i Jerucalem. Ento ngo ma Yecu onongo owacci myero gutim?— Ngo ma onongo ibitimo ka in ibedo i Jerucalem?— Jo ma guye lok pa Yecu guweko gangigi ci guringo i wi godi ka mabor ki Jerucalem.

 Mwaka acel kulu okato, gin mo pe otimme i Jerucalem. I mwaka me aryone, gin mo pe otimme. Kadi wa i mwaka me adekke bene. Jo mukene nen calo gutamo ni jo ma guweko Jerucalem-mi gubedo luming. Ento i mwaka me angwenne, lumony pa Luroma gudwogo cen. Gin dok gurumo Jerucalem. Ngwec onongo dong pe twere i kare meno. Lumony ca guturo Jerucalem. Pol pa dano ma gibedo iye guto, ento mukene-ni kiterogi i opii.

Ento ngo mutimme i kom jo ma guwinyo lok pa Yecu?— Gin mo marac pe otimme i komgi. Gin onongo gitye ka mabor ki Jerucalem. Meno aye omiyo pe gupoto i peko. Bedo ki winy ogwokogi.

Ka in lawiny, itamo ni meno bene bigwokki?— Lunyodoni guromo wacci pe myero ituk i dye gudo. Pingo giwaco kumeno?—  Pien mutoka romo goyi. Ento nino mo acel iromo tamone ni: ‘Mutoka pe i gudo kombeddi. Pe abinongo awano. Lutino mukene gituko i dye gudo, ento peya aneno ka guwane.’

Meno aye gin ma pol pa dano i Jerucalem gutamo. I kare ma mony pa Luroma gua, peko mo onongo nen calo pe. Kit ma jo mukene onongo gibedo i boma-ni, gin bene gubedo. Kicikogi ento pe guwinyo. Macalo adwogine, gurwenyo kwogi.

Kong dok wanen labol mukene. Tika dong ituko ki kibirit?— Romo yomo cwinyi ka igwero kibirit ci lyel. Ento tuko ki kibirit romo bedo gin marac. Ot romo wang ci in bene ito woko!

Wi myero opo ni bedo lawiny i kare mogo keken pe romo. Ka ibedo lawiny kare ducu, meno bigwokki adada. Ento anga mono ma waco boti ni, “Wun lutino, wuwiny lunyodowu”?— Lubanga. Dok myero wi opo ni en waco meno pien mari.