NGO ma imaro timone loyo, imaro tic nyo tuko?— Ada, tuko gire pe rac. Baibul wacci Jerucalem onongo ‘opong ki awobe ki anyira ma gituko i dye yo.’—Jekaria 8:5.

Neno lutino ma gitye ka tuko onongo yomo cwiny Lapwony Madit. Ma peya en obino i lobo, en owacci: “An onongo atye, abedo ka ngete [Lubanga] macalo ladiro tic . . . an abedo ki yomcwiny madwong mada i nyime.” Yecu onongo obedo ka tic kacel ki Jehovah i polo. Dok i kare ma tye kunnu en owacci: “Cwinya obedo yom i kom litino pa dano.” Kit ma wapwonyo kwede angec, Lapwony Madit-ti onongo tye ki miti i kom dano ducu, wa lutino matino bene.—Carolok 8:30, 31.

 Itamo mono ni Yecu otuko i kare ma en pud tidi?— En nen calo otuko. Kit ma en obedo “ladiro tic” i polo-ni, en bene mono otiyo i lobo?— Yecu onongo kilwongo ni ‘wod pa lapa bao.’ En bene onongo kilwongo ni ‘lapa bao.’ Man nyutu ngo?— Yucepu, ma opito Yecu calo latinne-ni, nen calo opwonyo Yecu. Pi meno, Yecu odoko lapa bao bene.—Matayo 13:55; Marako 6:3.

Yecu onongo tye dano ma nining i kit me payo bao?— Kit ma en onongo obedo ladiro tic i polo-ni, pe itamo ni en odoko ladiro i kit me payo bao i lobo kany?— Tam kong kit ma tic me payo bao onongo tek kwede i kare ca.  Yecu nen calo onongo cito tongo yat, ngunu macego cego, tingo kelo paco, ci yubo doko meja, kom, ki dong jami mukene.

Mono itamo ni tic man okelo yomcwiny bot Yecu?— Cwinyi mono onongo bedo yom ka itwero yubo meja ki kom mabeco ki dong jami mukene me tic pa dano?— Baibul waco ni ber pi ngat moni me nongo ‘yomcwiny i ticce.’ Tic kelo yomcwiny mo ma dok pat ma pe itwero nongone ki i tuko.—Latitlok 3:22.

Tic kelo adwogi maber i tamwa ki dong i komwa. I lobe mukene, lutino mapol gibedo mere abeda ka neno TV nyo tuko tuko lweny me vidio. Man miyo gicwe dok gidoko goro, cwinygi bene pe nongo yom. Pe giyomo cwiny jo mukene bene. Ngo ma myero watim wek wabed ki yomcwiny?—

Wapwonyo i Dul me 17 i buk man ni miyo jami kacel ki tiyo tic me konyo jo mukene kelo yomcwiny. (Tic pa Lukwena 20:35) Baibul lwongo Jehovah ni “Lubanga ma layomcwiny.” (1 Temceo 1:11, NW) Dok kit ma wakwano kwede i Carolok, Yecu obedo ki “yomcwiny madwong mada i nyime.” Pingo cwiny Yecu obedo yom?— En omiyo tyen lok acel i kare ma en owacci: “Wora tye ka tic nio koni, an bene atye ka tic.”—Jon 5:17.

I kare ma Yecu tye i lobo, en pe omedde ki tiyo tic me payo bao pi kwone ducu. Lubanga Jehovah onongo tye ki tic mapat pi Yecu me atima i lobo. Tika ingeyo tic meno?— Yecu owacci: “Myero atit lok me kwena maber me ker pa Lubanga, pien giora pi lok man.” (Luka 4:43) I kine mogo ka Yecu otito kwena bot dano, gin onongo giye lokke dok gitito jami ma en owaco-ni bot jo mukene, dako me Camaria ma itye ka nenone i cal-li bene otimo kumeno.—Jon 4:7-15, 27-30.

Yecu onongo winyo nining pi tic man? Itamo ni en onongo mito timone?— Yecu owacci: “Camma en tiyo gin ma ngat ma  oora mito, ki cobo ticce.” (Jon 4:34) Dek ma imaro loyo mono imito ni icam marom mene?— Man romo miyo iniang kit ma Yecu onongo maro kwede tic ma Lubanga omine ni otim

Lubanga ocweyowa wek ka wapwonyo kit me tic, okonywa me nongo yomcwiny. En owacci Micce ma emiyo bot ngat acel acel aye ni myero en “onong yomcwiny i kom ticce.” Pi meno ka ipwonyo kit me tic ma pud itidi, ci ibibedo ki yomcwiny pi kwoni ducu.—Latitlok 5:19.

Man pe te lokke ni latin matidi romo tiyo tic ma dano madit timo, ento wan ducu olo watwero timo tic mo. Lunyodoni giromo cito ka tiyo cente nino ducu wek jo me otwu gunong cam kacel ki ot me bedo iye. Dok myero inge ni tye tic mapol adada ma mito atima wek paco obed maleng dok maber.

Tic ango ma tye ma iromo timone ma twero kelo adwogi maber bot jo me otwu ducu?— Iromo miyo kony me twomo pii, lwoko jami, oonyo yugi, yubo ot butoni wek obed maleng, ki dong keto toyini ka maber. Gwok nyo dong itye ka timo jami magi mogo. Tic ma kit meno tye me kony mada bot jo me ot.

Kong wanenu kit ma kodi tic meno tye me kony kwede. Toyi omyero kiketgi ka ma mitte i nge tuko kwedgi. Pingo iromo wacci man pire tek?— Pire tek pien konyo weko paco bedo maleng dok bene gengo nongo awano. Ka pe ikwanyo toyini, nino mo mamani romo donyo i ot ma nongo otingo jami i cinge ci nyono acel i kingi. En romo cer ci poto wanne. Twero mitte ni en ocit wa i ot yat. Pe itamo ni meno rac tutwal?— Pi meno, ka iketo toyini ka maber i nge tuko, bedo me kony bot dano ducu.

Tye tic mukene ma lutino gitye kwede bene. Me laporre, tic ma kimiyo ki i cukul me atima ki gang. Ki i cukul ipwonyo kit me  kwan. Lutino mukene ginongo kwan mit adada, ento mukene giwacci tek. Kadi bed nen tek i acakkine, ibibedo ki yomcwiny ka ipwonyo kwan maber. Ka ingeyo kwan, tye jami mabeco mapol ma ibipwonyogi. In kikomi ibikwano wa Baibul ma obedo buk pa Lubanga. Pi meno, ka itimo tic ma kimini ki i cukul me atima ki gang ki cwinyi ducu, ci bibedo me kony, pe kumeno?—

Tye jo mukene ma giweyo tic. Oromo bedo ni ingeyo ngat mo ma timo kit meno. Ento kit ma Lubanga ocweyowa ni myero wati-ni, omyero wapwony kit me nongo yomcwiny ki iye. Lapwony Madit-ti onongo mit pa ticce marom mene?— Onongo bedo calo camo dek ma en maro loyo. Dok tic ango ma en onongo tye ka lok pire?— Tito bot jo mukene lok i kom Lubanga Jehovah ki dong yo ma giromo nongo kwede kwo ma pe tum.

Man aye gin ma romo konyowa me nongo mit pa tic. Penye kekeni ni, ‘Pingo mitte ni myero kitim tic man?’ Ka ce ingeyo pingo gin moni pire tek, timone bedo yot. Dok kadi bed ni tic moni dit nyo tidi, tim ki cwinyi ducu. Ka itimo meno, ci ibinongo yomcwiny i ticci, kit ma Lapwonywa Madit onongo kwede.