TIKA ingeyo lega ma Yecu opwonyo ki lulub kore?— Ka pe ingeyo, waromo kwanone kacel ki i Baibul i Matayo 6: 9-13. Lega man ma dano lwongo ni Wonwa ma Tye i Polo-ni tye iye lok man: “Ker meri obin.” Tika ingeyo gin ma Ker pa Lubanga obedo?—

Kabaka obedo laloc ma loyo gamente nyo kabedo moni. Dok gamentene kilwongo ni ker. I lobe mukene, ngat ma telo gamente kilwongo ni preciden. Laloc me gamente pa Lubanga kilwongo ningo?— Kilwongo ni Kabaka. Meno aye gin mumiyo kilwongo gamente pa Lubanga ni Ker.

Ingeyo anga ma Lubanga Jehovah oyero me bedo Kabaka me Gamentene?— Wode, Yecu Kricito. Pingo Yecu dok ber loyo laloc mo keken ma dano romo yerone?— Man tye pien ni Yecu  maro Wonne Jehovah adada. Pi meno Yecu timo gin matir kare ducu.

Con ma peya kinywalo Yecu i Beterekem, Baibul oloko pi nywalo en dok owaco ni en bibedo Laloc ma Lubanga oyero. Kong wakwan lok man i Icaya 9:6, 7. Waco ni: ‘gityeko nywalo botwa latin, gimiyo botwa latin laco; gibimiyo en tingo gamente i wi gwoke, nyinge gibicako ni, . . . Wod Ker ma Kelo Kuc. Dong medde pa gamentene ki kuc ma bia iye, ka gikke bibedo pe.’

Ingeyo pingo kilwongo Laloc me Ker pa Lubanga kany ni ‘Wod Ker’?— Wod ker nongo obedo wod pa kabaka. Dok Yecu obedo Wod pa Kabaka Madit, Jehovah. Ento Jehovah bene oketo Yecu me bedo Kabaka me Gamentene, ma biloyo lobo pi mwaka alip acel. (Niyabo 20:6) I nge nongo batija, Yecu ocako “tito lok kun wacci, ‘Wunguti, pien ker me polo dong onyiko cok.’”—Matayo 4:17.

Pingo itamo ni Yecu owacci Ker-ri dong onyiko cok?— En owaco meno pien Kabaka, ma biloc i kare me anyim i polo, onongo tye i kingi! Meno aye gin mumiyo Yecu owaco bot dano ni: “Ker pa Lubanga dong tye i kinwu.” (Luka 17:21) Mono onongo pe ibimaro ka Kabaka ma Jehovah oketo tye cok kwedi ma bene nongo itwero wa gudo kome?—

Tita kong, tic ma pire tek mene ma Yecu obino ka timone i lobo?— Yecu ogamo lapeny meno kun wacci: ‘Myero atit lok me kwena maber me ker pa Lubanga i gang mukene bene, pien giora pi lok man.’ (Luka 4:43) Yecu onongo ngeyo ni pe etwero tito kwena man kene. Dong itamo ni en otimo gin ango?—

Yecu owoto ki jo mukene dok onyutigi kit me tiyo tic me tito  kwena. En okwongo pwonyo jo 12 ma en oyerogi me bedo lukwenane. (Matayo 10:5, 7) Ento Yecu mono opwonyo lukwenane keken me timo tic man? Pe kumeno, Baibul waco ni Yecu bene opwonyo jo mukene mapol me tito kwena. I ngeye, en ocwalo lupwonnyene mukene gin 70 gukwongo yo kun opokogi ki aryo aryo. Ento ngo ma gin gupwonyo ki dano?— Yecu owaco ni: “Wutit botgi ni, ‘Ker pa Lubanga dong onyiko cok botwu.’” (Luka 10:9) I yo ma kit man, dano gupwonyo lok i kom gamente pa Lubanga.

Con i lobo Icrael, kabaka ma kiwirogi nyen onongo gidonyo i gang kun nongo gubedo i wi kana wek ginyutte bot dano. Man aye gin ma Yecu otimo i kare ma en olimo Jerucalem pi tyen me agikkine. Yecu onongo obibedo Laloc me Ker pa Lubanga. Dano mono onongo gimito ni en obed Kabakagi?—

I kare ma en tye ka wot ki kana, pol pa dano gucako peto ginarukagi i dye yo. Jo mukene gutongo jang yadi ci guketo i dye yo. Timo man omiyo gin gunyutu ni gimito ni Yecu obed Kabakagi. Gin gudange ni: “Lubanga omi gum [mot] i kom Kabaka ma bino i nying Rwot [Jehovah]!” Ento pe dano ducu cwinygi onongo yom. Ki lok ada, ludito dini mogo guwaco bot Yecu ni, ‘wac bot lupwonnyeni guling woko.’—Luka 19:28-40.

I nge nino abic, kimako Yecu ci kitere i gang kal i nyim gabuna Pontio Pilato. Lumone pa Yecu guwacci Yecu timme ni ebedo kabaka dok ni en pe cwako gamente pa Luroma. Pi meno Pilato openye i lok man. Yecu owacci en pe etye ka temme me turo gamente. En owaco bot Pilato ni: “Kerra pe me lobo man.”—Jon 18:36.

Pilato okato woko ci owaco bot lwak ni pe enongo bal mo i kom Yecu. Ento dano onongo pe gimito ni Yecu obed Kabakagi. Gin pe gimito ni kigony Yecu. (Jon 18:37-40) I nge lok ki Yecu dok aye,  Pilato oniang ni ada en kara pe otimo gin mo marac. Dong, i nge kelo Yecu woko pi tyen me agikki, Pilato owaco ni: “Nenu! Kabakawu en!” Ento lwak gudange ni: ‘Tere woko! Tere woko! Gure i kom yat!’

Pilato openyo ni: ‘Agur kabakawu i kom yat?’ Lalamdog madit pa Lubanga ogamo ni: “Wan pe watye ki kabaka, kono Cecar keken.” Itamo ningo i kom lok man? Lulamdog magi ma kitgi raco-ni gumiyo lwak gukwero Yecu woko!—Jon 19:1-16.

En gin acel-li bene tye ka timme i kare-ni. Pol pa dano pe gimito ni Yecu obed Kabakagi.  Giromo wacci giye i kom Lubanga, ento pe gimito ni Lubanga nyo Kricito owac botgi gin ma myero gitim. Gin gimito gamente ma meggi i lobo kany.

Ento wan kono? Ka wapwonyo lok i kom Ker pa Lubanga ki jami mabeco ma bitimone, meno miyo wabedo ki tam ango i kom Lubanga?— Wan wamare, pe kumeno?— Dong waromo nyutune nining bot Lubanga ni wamare dok ni wamito ni Ker-re aye olowa?—

Waromo nyutu bot Lubanga kit ma wawinyo kwede ki lubo lanen pa Yecu. Ngo ma Yecu otimo me nyutu ni emaro Jehovah?— Yecu otito ni, “Nino ducu atiyo gin ma iye mito.” (Jon 8:29) Yecu obino i lobo wek ‘etim miti pa Lubanga’ ki me “cobo ticce.” (Jo Ibru 10:7; Jon 4:34) Tam kong gin ma Yecu otimo ma peya en ocako ticce me tito kwena.

Yecu ocito bot Jon Labatija i Kulu Jordan. I kare ma gudonyo i pii, Jon oluto Yecu piny ite pii ka oile malo. Mono ingeyo gin mumiyo Jon obatija Yecu?—

Yecu owaco ni Jon myero obatija en. Ento wangeyo nining ni Lubanga omito ni kibatija Yecu?— Wangeyo pien i kare ma Yecu okato woko ki i  pii, en owinyo dwan Lubanga kun a ki i polo ma waco ni: “In aye i Woda ma amaro, ma cwinya yom i komi.” Lubanga bene ocwalo cwiny maleng calo amam obino malo i ka wi Yecu. Dong batija pa Yecu onyutu ni en mito tic pi Jehovah pi kare me kwone ducu, pi naka.—Marako 1:9-11.

Man pud itye latin. Ento ngo ma ibitimo ka ce i doko dit?— In mono ibilubu lanen pa Yecu ki nongo batija?— Omyero ilub lanene, pien Baibul waco ni en oweko boti ‘lanen maber me aluba, wek ilub kore.’ (1 Petero 2:21) Ka inongo batija, ibinyutu ni ada imito ni Ker pa Lubanga aye olo in. Ento nongo batija keken pe romo.

Myero walub jami ducu ma Yecu opwonyogi. Yecu owacci pe myero wabed “jo me lobo.” Mono nongo watye ka bedo luwiny bot Yecu ka ce wadonyo i tim mogo me lobo-ni? Yecu ki lukwenane pe gudonyo i tim mogo me lobo-ni. (Jon 17:14) Ento ngo ma gin gutimo?— Gin gutito bot jo mukene lok i kom Ker pa Lubanga. Meno aye obedo tic ma pire tek loyo i kwogi. Wan bene mono watwero timo en tic acel-lu?— Wabitimo en tic acel-lu ka ce walubu gin ma wawaco kun walego ni Ker pa Lubanga obin.