JO MUKENE giwacci gin giye gin ma gineno ki wanggi keken. Ento meno obedo mingo. Tye jami mapol ma peya wanenogi ki wangwa ento gitye. Iromo waco nying acel mo?—

Yamo ma waywe kwede-ni kono? Wangeyo nining ni tye?— Yar cingi ci ikut yamo iye. Tika iwinyo gin mo i cingi?— Iwinyo yamo i cingi, ento pe itwero nenone, pe kumeno?—

Dong watyeko lok i kom cwec ma gubedo cwiny ma pe watwero nenogi. Wapwonyo ni mogo gibeco ento mukene giraco. Mi kong nying cwec mogo ma gubedo cwiny ma pe watwero nenogi-ni.— Watye ki Lubanga Jehovah, Yecu ki dong lumalaika ma gibeco. Tika tye lumalaika maraco bene?— Baibul waco ni gitye. Tita kong gin ma ipwonyo ma dok i komgi.—

Gin acel ma wangeyo aye ni lumalaika mabeco wa ki maraco gitek giloyowa. Lapwony Madit onongo tye ki ngec mapol i kom lumalaika. Meno obedo pien ni en onongo obedo lamalaika ma peya ginywale i lobo kany macalo latin matidi. En okwo kacel ki lumalaika mukene i polo. En onongo ngeyo lumalaika milion mapol ata. Lumalaika magi ducu mono nyinggi tye?—

Wapwonyo ni Lubanga ocako nying lakalatwe ducu. Pi meno, wageno ni lumalaika ducu bene nyinggi tye. Dok bene wangeyo ni giloko i kingi pien Baibul loko i kom ‘leb pa lumalaika.’ (1 Jo Korint 13:1) Itamo ni lumalaika giloko i kom ngo? Mono giloko i kom wan ma watye i lobo kany-nyi?—

Wangeyo ni jogi, ma gitye lumalaika pa Catan-ni, gitye ka temme  me bwolowa wek pe wawiny Jehovah. Pi meno, giloko i kom kit ma myero gibwolwa kwede. Gimito ni wabed calo gin wek Jehovah pe omarwa bene. Ento lumalaika pa Jehovah ma gin lugen-ni kono? Itamo ni gin bene giloko i komwa?— Giloko i komwa. Gin gimito konyowa. Wek kong atitti kit ma lumalaika mogo pa Lubanga gukonyo kwede jo ma onongo gimaro Jehovah dok gutiyo pire.

Me laporre, tye laco mo ma nyinge Daniel ma okwo i lobo me Babilon. Pol pa dano ma kunnu onongo pe gimaro Jehovah. Dano bene guketo cik ma miyo kipwodo ngat mo keken ma olego bot Lubanga Jehovah. Ento Daniel pe ojuko lega bot Jehovah. Tika i ngeyo ngo ma gutimo i kom Daniel?—

Jo ma kitgi raco gumiyo kibolo Daniel i boro pa labwor. Daniel obedo i boro kunnu kene ki labwor ma kec nekogi. Tika i ngeyo ngo mutimme?— Daniel owacci “Lubanga ocwalo lamalaika otweyo dog lwak labwor magi woko.” En  pe onongo awano mo keken! Lumalaika gitwero timo jami me aura bot jo ma gitiyo pi Jehovah.—Daniel 6:18-22.

I kare mo bene Petero onongo tye i buc. Wi pud twero po ni Petero obedo larem Lapwony Madit, Yecu Kricito. Jo mukene cwinygi ocwer i kare ma Petero owaccigi ni Yecu obedo Wod pa Lubanga. Pi meno, gutweyo Petero i buc. Lumony gubedo ka gwoko Petero agwoka wek pe olwi woko. Tika tye ngat mo ma onongo twero konyo en?—

Petero onongo tye ka nino i kin lukur piny aryo dok bene kitweyo cinge ducu ki nyor. Ento Baibul waco ni: ‘Nen! lamalaika pa Jehovah  obino, ci dero ocaro i ot buc. Lamalaika ogudu but Petero ocoye woko, kun waco bote ni, “A malo oyot.”’

I cawa meno, nyor opoto woko ki i cing Petero! Ci lamalaika ni owacce ni: ‘Ruk bongo ni, ci ruk war i tyeni ka dong i lub kora.’ Lukur piny pe onongo gitwero jukogi pien lamalaika-ni onongo tye ka konyo Petero. I kare ma guo i doggola ma kiloro ki nyonyo, gin mo me aura otimme. Doggola oyabbe pire kene! Lamalaika meno ogonyo Petero wek en omedde ki tito kwena.—Tic pa Lukwena 12:3-11.

Lumalaika pa Lubanga mono gitwero konyowa bene?— Gitwero konyowa. Man mono te lokke ni gibigengowa pe me nongo awano mo matwal?— Pe, lumalaika pe gigengowa nongo awano ka watimo jami mogo me mingo. Ento kadi bed pe watimo jami mogo me mingo, pud bene watwero wanne. Lumalaika pe ki minigi twero me gengowa nongo awano. Ma ka meno, Lubanga ominigi tic ma dok pat ni gutim.

Baibul bene loko i kom lamalaika mo ma tito bot dano me kabedo ducu ni myero guwor Lubanga. (Niyabo 14:6, 7) I yo ango ma lamalaika-ni tito kwede botgi lok meno? En mono dange ki i polo wek dano ducu guwinye?— Pe, ma ka meno, lulub kor Yecu ma i ngom kany aye gitito bot dano lok i kom Lubanga, dok lumalaika telogi i ticgi man. Lumalaika gitemme ki tekogi ducu me nenone ni jo ma ada gimito ngeyo lok i kom Lubanga gunongo kare me winyone. Watwero nywako i tic meno me tito kwena dok lumalaika gibikonyowa.

Ento ka jo ma pe gimaro Lubanga gukelo ayela i komwa kono? Ka gutweyowa i buc kono? Lumalaika mono gibigonyowa?— Gitwero timone. Ento meno aye pe gin ma gitimo kare ducu.

Paulo, ma obedo lalub kor Yecu-ni, kong kare mo obedo mabuc. En onongo tye ka wot ki mel i kare mo ma yamo magwar tye ka tago nam matek. Ento lumalaika pe gugonye cutcut i cawa meno. Man  otimme pien tye jo mukene ma onongo myero bene guwiny lok i kom Lubanga. Lamalaika mo owacci: “Paulo, pe ibed ki lworo. In myero icung i nyim Cecar.” Paulo onongo myero kiter bot laloc lobo ma nyinge Cecar wek Paulo otit kwena bote. Lumalaika onongo kare ducu gingeyo ka ma Paulo tye iye, dok gubedo ka mine kony. Gibikonyowa bene ka ada watiyo pi Lubanga.—Tic pa Lukwena 27:23-25.

Tye tic mukene ma pire tek ma lumalaika gibitimone, dok gubitimo cokcok-ki. Kare pa Lubanga me tyeko jo ma kitgi raco dong cok adada. Jo ducu ma pe giworo Lubanga me ada kibityekogi woko. Jo ma giwacci pe giye i kom lumalaika pien ni pe gineno komgi gibinongone ni kara onongo gibwolle abwola.—2 Jo Tecalonika 1:6-8.

Man mono te lokke ngo botwa?— Te lokke ni ka watye tung bot lumalaika pa Lubanga, ci gibikonyowa. Ento wan mono watye tung botgi?— Ka watiyo pi Jehovah, ci nongo watye tung botgi. Dok ka watiyo pi Jehovah, ci watito bot jo mukene me tic pire bene.