AGENO ni in iye-ni tye ngat mo mamalo nyo dit dok tek loyo wan ducu. Iromo wacci ngat meno obedo nga?— Obedo Lubanga Jehovah. Wode kono, ma tye Lapwony Madit-ti? En mono tye malo loyowa?— Meno ngene kene.

Yecu onongo okwo kacel ki Lubanga i polo. En obedo Wod ma tye ki kom me cwiny, nyo malaika. Lubanga mono ocweyo lumalaika mukene bene, nyo awobe ma gitye ki kom me cwiny?— En ocweyogi milion mapol ata. Lumalaika magi gitye malo dok gitek loyowa.—Jabuli 104:4; Daniel 7:10.

Wi tika po nying lamalaika ma oloko ki Maliam-mi?— Nyinge Gabriel. En owaco bot Maliam ni latinne-ni bibedo Wod pa Lubanga. Lubanga oketo kwo pa Wode Yecu ma onongo tye ki kom me cwiny i i Maliam wek kinywale macalo latin i lobo.—Luka 1:26, 27.

In mono iye tango meno? Tika iye ni Yecu okwo kacel ki Lubanga i polo?— Yecu owacci ekwo gin ki Lubanga kacel. Yecu ongeyo jami ma kumeno nining? I kare ma en tye awobi matidi, Maliam nen calo otite lok ma Gabriel owaco. Yucepu bene nen calo owaco bot Yecu ni Lubanga kikome aye Wonne.

I kare ma kibatija Yecu, Lubanga bene oloko  ki i polo kun wacci: “Man aye Woda.” (Matayo 3:17) Dok i dyewor ma peya en oto, Yecu olego ni: “Abana, ket deyo i koma i nyimi, ki deyo ma yam abedo kwede i nyimi ma peya iketo lobo.” (Jon 17:5) Yecu olego me dok cen ka kwo i polo kacel ki Lubanga. En romo kwo kunu nining?— Twere keken ka Lubanga Jehovah oloko en odoko kom me cwiny ma pe nen, nyo lamalaika.

Amito penyi lapeny mo ma pire tek kombeddi. Lumalaika ducu mono gibeco? Itamo ningo?— I kare mo angec, gin ducu onongo gibeco. Man obedo kumeno pien Jehovah aye ocweyogi, dok jami ducu ma en ocweyo beco. Ento lamalaika acel kite odoko rac. Meno ocako timme nining?

Me nongo lagamme, omyero wadok cen i kare ma Lubanga ocweyo laco ki dako mukwongo, Adam gin ki Kawa. Jo mogo giwacci lok i komgi obedo ododo. Ento Lapwony Madit ongeyo ni meno lok ada.

I kare ma Lubanga ocweyo Adam gin ki Kawa, en oketogi i poto mamwonya adada i kabedo ma kilwongo ni Eden. Poto meno obedo paradic. Gin onongo kono gubedo ki lutino mapol adada, ki paco madit, kun gikwo i Paradic pi naka. Ento onongo tye pwony mo ma pire tek ma mitte ni gin gunong. En aye pwony acel ma dong waloko iye-ni. Kong wanen ka wiwa po iye.

 Jehovah owaco bot Adam gin ki Kawa ni giromo camo nyig yadi ducu ma tye i poto kit ma gimito. Ento tye yat acel ma onongo myero pe gucam nyigge. Lubanga owaccigi gin ma bitimme ka gucamo nyig yat meno. En owacci: “Ibito.” (Acakki 2:17) Pi meno, pwony ango ma onongo mitte ni Adam gin ki Kawa gunong?—

Meno aye pwony me bedo lawiny. Kwo jenge i kom bedo ki winy bot Lubanga Jehovah! Pe onongo romo pi Adam gin ki Kawa me wacone mere keken ni gibiwinye. Onongo mitte ni myero gunyut ni giwinye i tic ma gitimo. Ka onongo guwiny Lubanga, onongo gibinyutune ni gimaro en dok gimito ni en obed Lalocgi. I ngeye, onongo kono gukwo pi naka i Paradic. Ento ka gin gucamo nyig yat-ti, man onongo nyutu ngo?—

Onongo nyutu ni ada gipe ki pwoc pi gin ma Lubanga ominigi. Tika onongo ibiwinyo Jehovah ka itye kunu?— I acakkine, Adam ki Kawa gubedo luwiny. Ento ngat mo ma dok tye malo loyogi obwolo Kawa. En omiye ojemo i kom Jehovah. Meno obedo anga?—

Baibul wacci twol aye oloko ki Kawa. Ento in  ingeyo ni twol pe twere lok. Ci dong en ocako lok nining?— Lamalaika mo acel aye oweko onen calo twol obedo ka lok. Ento i adane, lamalaika meno aye obedo ka lok. Lamalaika man onongo dong ocako tamo jami maraco con. En onongo mito ni Adam gin ki Kawa guwore. En onongo mito ni gutim jami ma en waco. En onongo mito leyo kaka Lubanga.

Lamalaika meno marac-ci oketo tam marac i wi Kawa. Kun tiyo ki twol, en owacce ni: ‘Lubanga pe owacci lok ada. Pe ibito ka icamo nyig yat meno. Ibidoko ryek calo Lubanga.’ Tika onongo ibiye ngo ma dwan meno owaco?—

Kawa ocako mito gin mo ma Lubanga onongo pe omiyo bote. En ocamo nyig yat ma kigengo ni pe kicam. I ngeye omiyo mogo ki Adam. Adam pe oye gin ma twol owaco. Ento mitine me bedo kacel ki Kawa onongo tek loyo marre pi Lubanga woko. Pi meno, en ocamo nyig yat meno bene.—Acakki 3:1-6; 1 Temceo 2:14.

Adwogine obedo ningo?— Adam gin ki Kawa gudoko jo ma gitye ki roc, guti ci guto woko. Pien ni onongo gitye ki roc, lutinogi ducu onongo bene gitye ki roc ma oweko motmot gin guti ci guto. Lubanga pe onongo owaco  lok goba! Kwo jenge i kom bedo lawiny bote. (Jo Roma 5:12) Baibul wacciwa ni lamalaika ma owaco lok goba bot Kawa-ni kilwongo ni Catan Larac-ci nyo Ladot, ki lumalaika mukene ma gudoko raco-ni kilwongogi ni cen.—Yakobo 2:19; Niyabo 12:9.

Tika itwero niang pingo lamalaika ma Lubanga ocweyo maber-ri odoko rac?— Man otimme pien en ocako tamo jami maraco. En onongo mito ni ebed Namba Acel. En onongo ngeyo ni Lubanga owaco bot Adam gin ki Kawa ni gunywal lutino, dok en onongo mito ni gin ducu guwore. Larac-ci mito ni dano ducu pe guwiny Jehovah. Pi meno, en temme me keto tam maraco i wiwa.—Yakobo 1:13-15.

Larac-ci wacci pe tye ngat mo ma i ada maro Jehovah. En wacci in ki an pe wamaro Lubanga dok ni i ada pe wamito timo gin ma Lubanga waco. En wacci wawinyo Jehovah ka ce jami ducu tye ka wot kit ma wamito kwede. Larac-ci tika tye ka waco lok ada? Wan mono wabedo kumeno?

Lapwony Madit-ti owacci Larac-ci obedo lagoba! Yecu onyutu ni i ada emaro Jehovah dok ewinyo En. Dok Yecu owinyo Lubanga kadi wa i kare me peko. En obedo ki winy kare ducu, kadi wa i kare ma jo mukene guweko timone odoko tek bote. En obedo lagen bot Jehovah nio wa i tone. Meno aye omiyo Lubanga ocero en wek obed kwo pi naka.

Dong, nga ma iromo wacci obedo lamonewa ma pud dong loyo?— Catan Larac-ci. Tika itwero neno en?— Pe twerre! Ento wangeyo ni en tye malo dok tek loyowa. Ento ngat mamalo loyo Larac-ci obedo nga?— Obedo Lubanga Jehovah. Pi meno, wangeyo ni Lubanga romo gwokowa.