IN MONO ingeyo kit ma kiyubo kwede cingi i yo me aura? Tika ingeyo tic ducu ma cingi twero tiyone?— Nen kong cingi. Gom nyig cingi. Kwany kong gin mo. Cingi twero timo jami mapol dok bene timogi maber. Mono ingeyo anga ma oyubo cingwa?—

En Ngat acel ma oyubo dogwa, umwa ki wangwa-ni. Lubanga, Won Lapwony Madit. Cwinywa mono pe yom ni Lubanga oketo wangwa?— Wangwa twero neno jami mapol. Watwero neno ature. Watwero neno lum ki polo ma bullu. Waromo bene neno lutino winyi ma gungamo doggi ka cam calo ma i cal-li. Ber adada ni watwero neno jami macalo magi, pe kumeno?—

Ento anga mono ma ocweyo jami magi? Dano mo aye mono ocweyogi? Pe. Dano twero yubo ot. Ento pe tye dano mo ma twero cweyo lum. Dano pe twero cweyo latin winyo, ature, nyo gin mo keken ma kwo. Tika onongo ingeyo meno?—

Lubanga aye ma ocweyo jami magi ducu. Lubanga ocweyo polo ki lobo. En ocweyo dano bene. En okwongo cweyo laco ki dako mukwongo. Yecu, Lapwony Madit, opwonyo ni Lubanga ocweyo laco ki dako mukwongo.—Matayo 19:4-6.

 Yecu ongeyo nining ni Lubanga aye ocweyo laco ki dako? Yecu mono oneno ka Lubanga cweyogi?— En oneno ka kicweyogi. Yecu onongo tye kacel ki Lubanga i kare ma Lubanga cweyo laco ki dako. Yecu obedo ngat acel ma Lubanga okwongo cweyone. Yecu obedo lamalaika, dok en okwo kacel ki Wonne i polo

Baibul wacciwa ni Lubanga owacci: “Weku wacweyu dano.” (Acakki 1:26) Tika ingeyo nga ma Lubanga obedo ka lok kwede?— En obedo ka lok ki Wode. En onongo tye ka lok ki Yecu, ngat ma lacen obino i ngom kany.

Meno pe yomo cwinywa mada? Tam kong! Ka wawinyo lok pa Yecu, ci nongo watye ka nongo pwony ki bot ngat ma obedo bot Lubanga i kare ma Lubanga cweyo lobo ki jami mukene-ni ducu. I kare ma Yecu tye ka tic gin ki Wonne i polo, en opwonyo  jami mapol adada. Meno aye gin mumiyo Yecu tye Lapwony Madit!

Ma peya Lubanga ocweyo Wode, itamo ni mono cwinye onongo cwer pi bedo kene?— Cwinye onongo pe cwer. Ka onongo cwinye pe cwer, ci pingo en ocweyo lumalaika, dano ki dong lee?— En ocweyogi pien en obedo Lubanga ma lamar. En onongo mito ni jami mukene-ni gukwo dok gunong mit pa kwo. Omyero wapwo Lubanga pi miniwa kwo.

Jami ducu ma Lubanga otimo nyutu marre. Lubanga ocweyo ceng. Ceng miniwa dero dok weko pe wawinyo ngico. Labongo ceng, jami ducu onongo bedo ngic dok kwo onongo bedo pe i lobo. Cwinyi mono pe yom ni Lubanga ocweyo ceng?—

Lubanga bene miyo kot cwer. I kare mukene pe imaro kot pien gengi weko pe icito ka tuku woko. Ento kot aye weko ature dongo. Dong ka waneno ature maleng, anga ma wabipwoyo?— Lubanga. Omyero wapwo anga ka wacamo nyig yen ki pot dek mamit?— Omyero wapwo Lubanga pien ceng ki kot ma mege aye weko jami dongo.

Ket kong ni ngat mo openyi ni, ‘Lubanga aye mono ocweyo dano kacel ki lee?’ Ibigamo ningo?— Bedo ber ka igamo ni: “Ada, Lubanga aye ocweyo dano ki lee.” Ento ka ngat moni pe ye ni Lubanga aye ocweyo dano kono? Ka en wacci lee aye olokke odoko dano kono? Baibul pe pwonyo kumeno. Baibul wacci Lubanga ocweyo jami ma kwo ducu.—Acakki 1:26-31.

Ento ngat mo twero waco boti ni en pe eye i kom Lubanga. Ngo ma ibiwacone?— Pingo pe icimme ot? Peny ngat meno ni: “Anga ma oyubo ot ca-ni?” Dano ducu nongo ngeyo ni ngat mo aye oyubo ot meno. Ot meno nongo pe oyubbe kene!—Jo Ibru 3:4.

 Ter ngat meno ci inyutte ature. Penye ni: “Anga ma ocweyo ature man?” Dano mo aye pe ocweyo. Kit macalo ot ca pe oyubbe kene-ni, ature man bene pe oyubbe kene. Ngat mo aye ocweyo. Lubanga.

Wac ki ngat meno wek kong owiny koko pa winyo. I ngeye penye ni: “Anga ma ocweyo winyi ci opwonyogi ki koko mamit?” Lubanga aye opwonyogi. Lubanga aye ocweyo polo ki lobo ki jami ducu ma kwo! En aye Ngat ma miyo kwo.

Ento dano mo twero wacci en eye jami ma etwero nenone keken. En twero waco ni: ‘Ka pe atwero neno gin moni, ci pe aye.’ Jo mukene giwaco ni pe giye i kom Lubanga pien pe gitwero neno kome.

Lok ada tye ni pe watwero neno Lubanga. Baibul wacci: ‘Pe tye ngat mo ma twero neno Lubanga.’ Pe tye laco, dako nyo latin mo i wi lobo ma twero neno Lubanga. Pi meno, ngat mo keken pe myero otem goyo nyo payo cal pa Lubanga. Lubanga bene waco botwa ni pe myero wayub calle. Dong, ka wagwoko jami macalo magi i otwa ci pe yomo cwiny Lubanga.—Nia 20:4, 5; 33:20; Jon 1:18.

Ka pe itwero neno Lubanga, ci ingeyo nining ni Lubanga tye ada? Tam kong i kom jami magi. In mono itwero neno yamo?— Pe. Pe tye ngat mo ma twero neno yamo. Ento itwero neno jami ma yamo timo. Itwero neno pot yat yenge ka yamo kodo. Man miyo iye ni yamo tye.

In bene itwero neno jami ma Lubanga otimogi. Ka ineno ature nyo winyo, nongo ineno gin mo ma Lubanga ocweyo. Man miyo iye ni Lubanga tye ada.

Ngat mo twero penyi ni, ‘Anga ma ocweyo ceng ki lobo?’ Baibul waco ni: “Rubanga ocweyo polo ki lobo.” (Acakki 1:1, Baibol  pa Katoli) Lubanga aye ocweyo jami ma gibeco atika-ni! In itamo ningo i kom lok meno?—

Mono pe ber ni watye kwo? Watwero winyo ka winyi gikok mamit. Watwero neno ature ki jami mukene ma Lubanga ocweyogi. Dok bene watwero camo cam ma Lubanga omiyogi botwa.

Omyero wapwo Lubanga pi jami magi ducu. Ma dong loyo ducu, omyero wapwoye pi miniwa kwo. Ka ada wapwoyo Lubanga, ci wabitimo gin mo. Gin ango?— Wabiwinyo Lubanga, dok wabitimo gin ma en waco botwa i Baibul. I yo ma kit meno watwero nyutu ni wamaro Ngat ma ocweyo Jami ducu.