IKINE mukene tek tutwal me ngeyo ngat ma myero wawiny. Mamani nyo babani romo wacci itim gin moni. Ento lapwony me cukul nyo abili romo wacci itim gin mapat. Ka meno otimme, ibiwinyo anga i kingi?—

I Dul me 7 i buk man, wakwano Jo Epeco 6:1-3 ki i Baibul. Waco ni lutino myero guwiny lunyodogi. Ginacoya meno wacci: ‘Wuwiny lunyodowu i Rwot.’ Ka kiwaco ni “i Rwot,” tika ingeyo te lokke?— Lunyodo ma gitye i Rwot gipwonyo lutinogi me bedo ki winy i kom cik pa Lubanga.

Ento jo madito mukene pe giye i kom Jehovah. Dong mono ka dano ma kit meno owacci ni kwalo peny i cukul ber nyo kwanyo gin mo ki i dukan ma pe iculo pire ber kono? Ber mono pi latin me kwalo peny nyo kwalo kwo?—

Wi myero opo ni i nino mo acel, Kabaka Nebukadnejar ociko dano ducu ni myero guryebbe piny me woro cal me jabu ma en oketo. Ento Cadrak, Mecak, ki Abednego gukwero ryebbe piny. Tika ingeyo pingo?— Pien Baibul wacci dano myero guwor Jehovah keken.—Nia 20:3; Matayo 4:10.

I nge to pa Yecu, kikelo lukwenane i nyim Lukiko, ma en aye kot madit me dini pa Lujudaya. Lalamdog Madit Kayapa owacci: “Wan wacikowu matek ni pe wupwony lok mo i nying [Yecu], ento koni wupongo i Jerucalem woko pi pwonywu-ni.” Pingo lukwena pe gubedo ki winy bot Lukiko man?— Petero, ma obedo  ka lok pi lukwena ducu-ni, ogamo dog Kayapa ni: “Myero wawiny Lubanga makato dano.”—Tic pa Lukwena 5:27-29.

I kare meno, ludito dini pa Lujudaya onongo gitye ki twero madit atika. Ento, gamente pa Luroma aye onongo loyo lobogi. Latela me gamente meno onongo kilwongo ni Cecar. Kadi bed Lujudaya onongo pe gimito ni Cecar ologi, ento gamente me Roma onongo otimo jami mabeco pi jo ma kunu. Gamente me kare-ni bene gitimo jami mabeco pi danogi. Tika ingeyo jami mogo ma gamente timogi?—

Gamente yubo gudu me wot pa dano dok culo abili kacel ki lunek mac pi gwokowa. Giromo bene keto yub me kwan pi lutino kacel ki miyo kony i lok me yotkom bot jo muteggi. Gamente myero oti ki cente me timo tic magi ducu. Gamente nongo cente man ki kwene?— Ki bot dano. Cente ma dano culo bot gamente-ni kilwongo ni mucoro.

I kare ma Lapwony Madit onongo kwo i lobo, Lujudaya mapol onongo pe gimito culo mucoro bot gamente me Roma.  Dong i nino mo acel, lulamdog guculo co mogo wek gupeny Yecu lapeny i yo me diro wek gikette i peko. Lapeny meno obedo ni, “Myero wacul mucoro bot Cecar nyo pe?” Meno onongo obedo lapeny me diro. Ka Yecu ogamo ni, ‘Ee, myero icul mucoro,’ pol pa Lujudaya onongo pe gubimaro lagamme-ni. Ento dok bene Yecu onongo pe romo wacci, ‘Pe, pe mitte ni wucul mucoro.’ Meno onongo pe bedo lok matir.

Dong, ngo ma Yecu otimmo? En owacci: “Wunyutta lim ma giculo kwede.” I kare ma gukelo bote, Yecu openyogi ni: ‘Cal ki nying ma tye i kome-ni pa anga?’ Co-ni guwacci: “Pa Cecar.” Pi meno, Yecu owaco ni: “Wudwok jami pa Cecar bot Cecar, ki jami pa Lubanga wudwok bot Lubanga.”—Luka 20:19-26.

Pe tye ngat mo ma onongo bal mo i lagamme-ni. Ka Cecar timo jami pi dano, ci pore ni dano myero guti ki cente ma Cecar oyubo me culo en pi jami magi. Dong, i yo ma kit man, Yecu onyutu ni pore me culo mucoro bot gamente pi jami ma wanongo.

 Gwok tye ni in pud mwakani pe oromo me culo mucoro. Ento, tye gin mo ma myero imi bot gamente. Ingeyo gin meno?— Myero iwiny cik pa gamente. Baibul wacci: ‘Wuwiny luloc ma giloyowu.’ Luloc magi gin aye jo ma gitye ki twero i gamente. Lubanga aye owaco ni omyero wawiny cik pa gamente.—Jo Roma 13:1, 2.

Cik mo romo bedo tye ma waco ni pe myero wabol karatac nyo yugi ata i dye gudu. Myero mono ilub cik meno?— Lubanga mito ni ibed lawiny. Myero mono ibed lawiny bot abili bene?— Gamente culo abili me gwoko dano. Bedo ki winy botgi rom aroma ki bedo ki winy bot gamente.

Dong ka iyubbe me ngolo gudu ci abili owaco ni “Kur kong!” ngo ma myero itim?— Ka jo mukene gungweco gungolo gudu kono, in bene mono myero itim kit meno?— Omyero ikur, kadi bed in keni aye idong ka kurone. Lubanga waco ni myero ibed lawiny.

Romo bedo ni ayelayela mo tye ka ma ibedo iye, ci abili twero waco ni: “Pe kimito dano mo i dye gudu. Ngat mo pe okat woko ki i ot.” Dong iromo winyo woo madwong ma weko ibedo ki tam me ngeyo ngo ma tye ka timme. Myero mono ikat woko ka nenone?— Man mono nongo itye ka winyo ‘luloc ma giloyowu’?—

I kabedo mapol, gamente yubo cukul dok culo lupwonye bene. Dong itamo ni Lubanga mito ni iwiny lapwony?— Tam kong iye. Gamente culo lapwony wek opwony, kit ma culo kwede abili me gwoko dano. Pi meno bedo ki winy bot abili nyo lapwony rom aroma ki winyo gamente.

Ento, ka lapwony owaco ni imi woro bot cal gin mo kono?  Ibitimo gin ango?— Luibru adek-ki pe guryebbe piny i nyim cal ca, kadi bed Kabaka Nebukadnejar owaccigi ni guryebbe. Wi po pingo gukwero?— Pien gin onongo gimito bedo luwiny bot Lubanga.

Laco mo ma coyo lok me tekwaro ma nyinge William Durant ocoyo lok i kom Lukricitayo me kare macon kun waco ni ‘worogi [nyo gennegi] mamalo loyo onongo pe obedo pa Cecar.’ Pe, ento onongo obedo pa Jehovah! Dong wi opo ni Lubanga myero obed mukwongo i kwowa.

Wabedo ki winy bot gamente pien meno aye gin ma Lubanga mito ni watim. Ento ka kiwaco botwa ni watim gin ma Lubanga pe mito ni watim, ci myero wagam nining?— Myero wagam kit ma lukwena gugamo kwede dog lalamdog madit ni: “Myero wawiny Lubanga makato dano.”—Tic pa Lukwena 5:29.