KET kong ni ngat mo omini mic mo mamwonya atika. Ibiwinyo nining pi mic meno?— Ibiwaco mere keken-ni apwoyo ci wi wil woko i kom ngat meno ma omini mic-ci? Nyo wi po i kome ki dong ngo ma en otimo piri?—

Lubanga Jehovah ominiwa mic mo mamwonya atika. En ocwalo Wode i lobo wek oto piwa. Ingeyo pingo onongo mitte ni Yecu oto piwa?— Man aye gin ma pire tek adada ma myero waniang.

Kit ma wapwonyo kwede i Dul me 23, Adam obalo i kare ma en oturo cik maleng pa Lubanga. Dok wan walako bal ki bot Adam, ma en aye won dano weng. Pi meno, itamo ningo ma dong wan wamito?— Wan onongo wamito wonwa mukene, ma okwo i lobo kany labongo roc mo. Itamo ni anga ma twero bedo wonwa ma kit meno?— Yecu twero.

Jehovah ocwalo Yecu i lobo kany wek en obed macalo wonwa me leyo ka Adam. Baibul wacci: “‘Dano mukwongo, Adam, odoko gin makwo.’ Ento Adam me agikkine odoko cwiny ma miyo kwo.” Adam mukwongo-ni obedo nga?— Obedo en ma Lubanga ocweyo ki apwa me ngom. Adam me aryo-ni kono?— Obedo Yecu. Baibul nyutu man kun wacci: ‘Dano mukwongo [Adam] yam gitiyo ki apwa me lobo, ento dano me aryone [Yecu] oa ki i polo.’—1 Jo Korint 15:45, 47; Acakki 2:7.

Kit macalo Lubanga onako kwo pa Yecu ki i polo ci oketo i i  dako ma nyinge Maliam, Yecu pe olako bal mo keken ki bot Adam. Meno aye gin mumiyo Yecu tye dano ma pe ki roc. (Luka 1:30-35) Meno aye bene gin mumiyo lamalaika mo owaco bot lukwat i kare ma kinywalo Yecu ni: “Tin ginywalo piwu Lalar.” (Luka 2:11) Ento me bedo Lalarwa, ngo ma onongo mitte ni Yecu myero kong otim macalo latin matidi?— Onongo mitte ni en kong odong odok dano madit calo Adam. Ka i ngeye Yecu dong romo doko ‘Adam me aryo.’

Yecu ma en aye Lalarwa-ni bene bidoko ‘Wonwa ma bedo nakanaka.’ Kilwongo en kumeno i Baibul. (Icaya 9:6, 7) Ada, Yecu ma pe ki roc-ci romo doko wonwa ma leyo ka Adam ma odoko dano ma tye ki roc i kare ma obalo. I yo ma kit meno, miyo waromo yero ‘Adam me aryo’ macalo wonwa. Ki lok ada, Yecu kikome obedo Wod pa Lubanga Jehovah.

Ka wapwonyo lok kom Yecu, ci waromo ye en macalo Lalarwa. Wi tika po i kom ngo ma myero kilarwa ki i iye?— Ki i kom bal ki to ma walako ki bot Adam. Kwo labongo roc ma Yecu otyero, nyo omiyo piwa macalo dano ma dit-ti kilwongo ni ginkok. Jehovah omiyo ginkok wek kitim kica pi balwa.—Matayo 20:28; Jo Roma 5:8; 6:23.

Ada pe wamito ni wiwa owil i kom gin ma Lubanga ki Wode gutimo piwa, pe kumeno?— Yecu onyutu bot  lulub kore yo madok pat ma romo konyowa wek wiwa opo i kom gin ma en etimo. Kong walok iye.

Go kong ni itye i Jerucalem i kicika ot ma tye malo. Man obedo i dyewor. Yecu kacel ki lukwenane gubedo gulworo meja. I wi meja onongo tye ringo romo ma kibulo abula, mugati, ki vino. Gin onongo gitye ka camo cam madok pat ki ma jwi-ni. Ingeyo pingo?—

Cam man onongo tye me poyo wigi i kom gin ma Jehovah otimo mwaki miya ki miya mukato angec i kare ma jone Luicrael onongo gitye i opii i lobo Ejipt. I kare meno Jehovah owaco ki jone ni: ‘Wunek  romo pi ot acel acel, dok wuket remone i kom okar doggolawu.’ Ka dok owaco ni: ‘Wudony i odiwu ka wucam romo man.’

Luicrael gutimo kit meno kikome. I dyewor acel-li, lamalaika pa Lubanga okato ki i lobo Ejipt. I pol pa odi, lamalaika oneko lutino kayo ducu. Ento ka lamalaika oneno remo romo i kom okar doggola, en kato ot meno akata. I odi magi, latin mo keken pe oto. Lworo omako Parao kabaka me Ejipt matek adada pi gin ma lamalaika pa Jehovah otimo. Pi meno Parao owaco bot jo Icrael ni: ‘Wutye agonya me a. Wua woko ki i Ejipt!’ Lacen, guketo jamigi i nge kinaga ki kanagi ci gua woko.

Jehovah onongo pe mito ni wi jone owil i kom kit ma emiyo gubedo angonya kwede. Pi meno en owacci: ‘Omyero wucam kicel i mwaka acel kodi cam ma wucamo i dyewor tin-ni.’ Gulwongo cam man madok pat-ti ni cam me Kato. Ingeyo pingo?— Pien i dyewor meno lamalaika pa Lubanga ‘okato’ odi ma kiketo remo i kom okar doggolagi.—Nia 12:1-13, 24-27, 31.

Yecu ki lukwenane gubedo ka tam i kom lok man i kare ma gitye ka camo cam me Kato. I ngeye, Yecu otimo gin mo ma pire tek adada. Ento ma peya otimo, en kong oryemo lakwena Juda Iskariot ma pe obedo lagen-ni woko. Lacen Yecu okwanyo mugati acel mudonge, olego i kome, obaro iye, ci omiyo bot lupwonnyene. Ci owacci: “Wugam, wucam.” Ka dok owaco botgi ni: ‘Mugati man cung pi koma ma abimiyone piwu ka ato.’

I ngeye Yecu okwanyo kikopo me vino. I nge lega mukene me pwoc, en ominigi ci owacci: “Wun ducu wumat man.” Ka dok owaco botgi ni: ‘Vino man cung pi remona. Cokcok-ki abionyo remona wek kiwek balwu. Wubed ka timo man me po pira.’—Matayo 26:26-28; 1 Jo Korint 11:23-26.

 Tika iniang ni Yecu owaco bot lupwonnyene ni myero gubed ka timo man me po pire?— Pe dong gibicamo cam me Kato-ni. Ma ka meno, gin gibicamo cam man madok pat-ti kicel i mwaka acel me po i kom Yecu ki dong tone. Cam man kilwongo ni Cam me Otyeno pa Rwot. I kare-ni walwongo ni Nipo. Pingo?— Pien man poyo wiwa i kom gin ma Yecu ki Wonne, Lubanga Jehovah gutimo piwa.

Mugati-ni myero omi watam pi kom Yecu. En onongo tye atera me miyo kome meno wek wanong kwo ma pe tum. Vino-ni kono?— Meno myero opo wiwa i kom kit ma remo pa Yecu pire tek kwede. Pire tek kato wa remo latin romo ma kineko i nino me Kato ki i Ejipt-pi. In ingeyo pingo?— Baibul wacci remo pa Yecu romo miyo kiweko balwa. Ka kikwanyo balwa woko ducu, pe dong wabitwo, wabitii, nyo to. Omyero watam i kom gin meno ka watye i kwer me Nipo.

Dano ducu mono omyero gucam mugati dok gumat vino i kwer me Nipo?— Yecu owaco bot jo ma gicamo dok gimato ni: ‘Wubinywako i kerra dok wubibedo i wi kom ker i polo kacel kweda.’ (Luka 22:19, 20, 30) Man te lokke ni gibicito i polo me bedo luker kacel ki Yecu. Pi meno, jo ma gitye ki gen me loc kacel ki Yecu i polo keken aye myero gucam mugati dok gumat vino man.

Ento kadi wa jo ma pe gicamo mugati nyo gimato vino man bene myero gubed tye i kwer me Nipo. Ingeyo pingo?— Pien Yecu omiyo kwone pigi bene. Ka wabedo tye i kwer me Nipo, wanyutu nongo ni wiwa pe owil. Nongo wiwa po i kom mic mamwonya atika pa Lubanga-ni.