IN TIKA iloko ki Lubanga Jehovah?— En mito ni ilok kwede. Lok ki Lubanga kilwongo ni lega. Yecu onongo loko ki Wonne me polo kare ki kare. I kine mukene en onongo mito ni ebed kene ka eloko ki Lubanga. Baibul waco ni i nino mo acel, “Ocito i wi got ka lega kaikene. I kare ma piny dong oyuto, onongo en tye kunnu kene.”—Matayo 14:23.

Kwene ma itwero cito iye ci ilego bot Jehovah keni?— Gwok nyo itwero timo man ka itye keni ma peya ibuto piny i dyewor. Yecu owaco ni: “Ka ilego, cit idony i kicikani ci ilor doggola woko, ka ileg Woru.” (Matayo 6:6) Tika ilego bot Jehovah i dyewor ducu ma peya icito ka buto?— Myero itim man.

Yecu bene onongo lego ka jo mukene gitye kacel kwede. I kare ma lareme Lajaro oto, Yecu olego  kacel ki dano ka ma kiyiko iye kome. (Jon 11:41, 42) Yecu bene onongo lego gin ki lupwonnyene ka gucokke kacel. In mono iwoto i cokke ka ma kilego iye?— Ki kunnu, pol kare ngat mo ma mwakane dit dit aye lego. Ter iti iwiny maber gin ma en tye ka wacone pien en tye ka lok ki Lubanga piri. Itwero waco ni “Amen” i nge lega meno. In mono ingeyo te lok ni “Amen” ma kiwaco i nge lega-ni?— Te lokke tye ni imaro lega meno. Te lokke ni iye lega meno dok imito ni obed lega ma megi bene.

Yecu bene onongo lego i cawa me cam. En onongo pwoyo Jehovah pi miye gin acama. In mono ilego pol kare ma peya icako cammi?— Ber ka wapwoyo Lubanga pi gin acama ma peya wacako cam. Ngat mo ma pat bene twero lega ka wutye ka cam kacel. Ento ka itye ka cam keni kono? Nyo itye ka cam ki jo ma pe gipwoyo Jehovah?— Ka kumeno ci myero ileg piri keni.

Myero mono pol kare ileg malongo? Nyo Jehovah tika winyo lega ma ilego laling ling?— Watwero niang lagamme ki i kom gin mutimme i kom Nekemia. En onongo obedo lawor Jehovah ma otiyo i gang kal pa Kabaka me Percia Aritakcec. I nino mo  acel, cwiny Nekemia ocwer pien en owinyo ni cel me Jerucalem tye opoto woko piny.

I kare ma kabaka openyo Nekemia pingo cwinye pe yom, Nekemia okwongo ki lega laling ling ki i cwinye. I ngeye Nekemia otito bot kabaka gin mumiyo cwinye pe yom dok openye ka eromo cito ka yubo cel me Jerucalem. Ngo ma otimme?—

Lubanga ogamo lega pa Nekemia. Kabaka owacci Nekemia twero cito! Kabaka omiyo bot Nekemia yadi mapol me konyo en yubo cel man. Ada Lubanga twero winyo legawa, kadi bed walego laling ling.—Nekemia 1:2, 3; 2:4-8.

Kombeddi kong itam lok man. Omyero mono ikul wi ka ilego? Omyero mono i gung piny? Itamo  ningo?— I kine mukene Yecu onongo gungu piny ka lego. I kare mukene onongo en cung acunga. I cawa mukene en ilo wange malo i polo ka tye ka lega kit ma otimo kwede i kare ma en tye ka lega pi Lajaro.

Dong man nyuto gin ango?— Man nyuto ni kulu wic, gungu piny nyo bedo i kit mo keken aye pe jami ma pigi tego. I kine mukene pore bene me kulo wi kun imiyo wangi. I kare mukene itwero mitone ni i gung piny kit ma Yecu otimo kwede-ni. Ento, wi myero opo ni watwero lega bot Lubanga i cawa mo keken dok en winyowa kadi bed i dyeceng nyo i dyewor. Gin ma pire tek madok i kom lega aye ni omyero waye ada ni Jehovah tye ka winyowa. In iye ni Jehovah winyo legani?—

Ngo ma myero waleg ki bot Jehovah?— Tita kong: Ngo ma iwaco bot Lubanga ka itye ka lega?— Jehovah miyo botwa jami mapol ata, pi meno pore bene me pwoyo en pi jami magi ducu, pe kumeno?— Watwero pwoye pi cam ma wacamo. Ento mono dong ipwoyo en pi dwe, yadi ki atura ma nenogi mit-ti?— En aye bene ocweyogi.

Lupwonnye pa Yecu i kare mo gupenye ni opwonygi kit me lega. Pi meno, Lapwony Madit opwonyogi dok en onyuto botgi jami ma pigi tego loyo ma myero kileg pigi. Jami magi mono ingeyogi?— Kwany Baibul-li, ci iyab Matayo cura 6. I tyenge 9 me  o i 13, wanongo lega ma dano mapol gilego ni Wonwa ma tye i polo. Kong dong wakwanu kacel.

Wapwonyo kany ni Yecu owacci waleg pi nying Lubanga. En owaco ni myero kileg wek kilony nying Lubanga obed maleng. Lubanga nyinge anga?— Nyinge Jehovah, dok myero wamar nying meno.

Me aryone, Yecu opwonyowa me lega pi Ker pa Lubanga wek obin. Ker man pire tek pien bikelo kuc i lobo dok bene biloko doko paradic.

Me adek-ke, Lapwony Madit-ti owacci myero kileg wek kitim miti pa Lubanga i lobo kit ma kitimo kwede i polo. Ka walego pi miti pa Lubanga, ci myero watim gin ma en mito ni watim.

Me angwen, Yecu opwonyowa me lega pi camwa ma jwi. En bene owacci myero watit balwa bot Lubanga. Dok bene omyero wapenye wek otimiwa kica. Ento ma peya en otimo meno, omyero kong watim kica bot jo mukene ma gutimo gin marac i komwa. Meno mono timone yot boti?—

Me agikkine, Yecu owaco ni myero waleg wek Lubanga Jehovah ogwokwa ki bot Catan Larac-ci. Magi aye jami mabeco ma myero waleg Lubanga pigi.

Omyero waye ni Jehovah winyo Legawa. Medo i kom penyo en wek okonywa, omyero wapwoye bene. En cwinye bedo yom ka waloko lok ada i lega kun wapenye pi jami mupore. Meno weko en miniwa jami magi ma wapenyo pigi-ni. In iye lok meno?—