IKARE ma Yecu odongo odoko dit ci oniang kit ma kigwokke kwede ma onongo en pud tidi, itamo ni en olego me pwoyo Jehovah?— Itamo ni Yecu owaco ningo bot Maliam gin ki Yucepu i kare ma en oniang ni gugwoko kwone ki tere i lobo Ejipt?—

Ngene kene ni Yecu i kare-ni pe tye latin. En yam okwo i lobo kany ento i kare-ni dong peke i lobo. Ento tika ingeyo ni pol pa dano i kare-ni nen calo gitamo i kom Yecu calo latin ma kipyelo i weer cam pa dyang?— Man nen maber i kare me Karama ma nongo cal pa Yecu kinene calo latin i kabedo mapol.

Ento kadi bed ni Yecu dong pe ka kwo i wi lobo, in mono iye ni en tye makwo?— En kicere woko ki i lyel dok bene dong tye Kabaka matek i polo. Itamo ni en mono twero timo gin ango me gwoko jo ma gitiyo pi en?— Me laporre, i kare ma Yecu onongo tye i lobo, en onyutu kit ma en etwero gwoko kwede jo ma mare. Kong dong wanen kit ma en otimo kwede meno i nino mo acel ma onongo en tye i yeya kacel ki lupwonnyene.

 Meno obedo i otyeno. Yecu onongo obedo ka pwony dyeceng lung i nget Nam me Galilaya, ma obedo twon nam madit ma bor-re romo mairo 13 ki lacce romo mairo 7 ki nucu. I cawa meno en owaco ki lupwonnyene ni: “Wakatu wacitu loka nam tung ca.” Pi meno gudonyo i yeya ci gucako kwang me ngolo nam. Yecu ool matek pi meno en ocito angec i yeya, obuto piny ci oteno wiye ki laten wic. Cutcut, en otugi nino adada.

Lupwonnyene onongo wanggi twolo dok gumedde ki kwango yeya. Jami ducu kong owoto maber, ento yamo magwar ocakke. Ocako kodo matek kun medde ameda wa twagge pa pii bene onongo woto ki medde. Pii ma twagge ocako ocorre i yeya kun yeya woto ki pong.

Lworo omako lupwonnyene ni gibilwiny woko. Ento lworo pe omako Yecu. En onongo pud tye onino mere mot angec i yeya. Lupwonnyene olo to gucoye, kun giwaco ni: ‘Lapwony Lapwony larwa do; dong wabito woko ki yamo magwar-ri.’ Yecu oa malo ci ocako lok ki yam ki pii ma tye ka twagge. En owaco ni “Ling pye mot.”

 Cutcut yamo ki nam gutugi pye mot. Lupwonnyene gubedo ki ur madit. Ma naka onongo peya guneno gin mo ma kumeno. Gucako lok i kingi kengi kun gipenye ni: “Man anga kaa, ma yamo ki nam giwinye-ni?”—Luka 8:22-25; Marako 4:35-41.

In mono ingeyo anga ma Yecu obedo?— Tika ingeyo kwene ma en nongo iye tekone madit-ti?— Lupwonnye onongo myero lworo pe omakgi ma gitye gin ki Yecu, pien Yecu pe obedo calo dano ata-ni. En onongo twero timo jami me aura ma pe tye ngat mo ma twero timogi. Wek kong dok atitti gin mukene ma Yecu otimo i nino mo mapat i nam ma tye ka twagge.

Man obedo lacen, i nino mukene mapat. I kare ma piny tye ka yuto Yecu owaco bot lupwonnyene ni guit yeya ci gutel yo dok gungol nam. Ci Yecu ocito malo i wi got kene. Man onongo obedo ka ma oling mot ma en twero lega iye bot Wonne, Lubanga Jehovah.

Lupwonnyene gudonyo i yeya ci gucako kwango yeya me ngolo  nam. Ento i wang cawa manok yamo ocako kodo. Tek pa kodone ocako medde ameda. Piny onongo dong odoko col. Co magi gukwanyo bongo ma yamo miyo coro yeya ci gucako kwangone ki pol me yeya. Ento onongo pe gitye ka cito ka mo mabor pien yamo matek man onongo tye ka kodo dwogo tung botgi. Yeya onongo tye ka tagge dok kany kuca kacel ki pii ma twagge woto ki corre i yeya. Co magi gutemme ki tekgi me o i dog nam ento pe otwere.

Yecu onongo pud tye odong kene malo i wi got. En onongo obedo kunno pi cawa malac. Ento en ocako neno ni kwo pa lupwonnyene tye ka mading pi pii ma twagge magwar ca. Dong en ocako lor ki i wi got obino piny i dog nam. Yecu onongo mito konyo lupwonnyene, pi meno en ocako wot ki i wi nam ma tye ka twagge-ni kun bino botgi!

Ngo ma timme ka ce itemme me wot i wi pii?— Ibilwiny dok imato pii matek. Ento Yecu gire dok tye pat. En tye ki teko mo madok pat. Yecu owoto pi bor piny me oo wa ka ma yeya tye iye. Lupwonnyene gunene tye ka wot bino botgi ki i wi pii ma dong piny cok ki ru. Ento gin onongo pe gitwero ye ngo ma gitye ka nenone. Lworo omakogi pi meno gudange. Ci Yecu oloko kwedgi ni: “Wudi cwinywu, an enni; gwok wulwor.”

Teke Yecu donyo i yeya nitap yamo magwar-ri otugi cung. Lupwonnye pa Yecu gubedo ki ur pi tyen mukene dok aye. Gucako woro Yecu ka giwacci: “Ada in giri i Wod pa Lubanga.”—Matayo 14:22-33; Jon 6:16-21.

Itamo ni onongo pe bedo ber mada me kwo i kare ca, me neno kit ma Yecu timo kwede jami macalo meno?— Ingeyo pingo Yecu otimo tango magi?— En otimo jami magi pien onongo en maro lupwonnyene dok mito konyogi. Ento en bene otimo tango magi me nyutu tekone madit ma en bitic kwede i anyim macalo Laloc me Ker pa Lubanga.

 Kadi wa i kareni, Yecu pud tiyo ki tekone me gwoko lulub kore ki i tic pa Catan me jukogi tito lok madok kom Ker pa Lubanga bot jo mukene. Ento Yecu pe tiyo ki tekone me gwoko lupwonyene wek pe gunong two nyo me cangogi ka komgi lit. Kadi wa lukwena pa Yecu ducu bene motmot guto woko. Yakobo omin Jon kineko aneka kun Jon kikome kitweye woko i mabuc.—Tic pa Lukwena 12:2; Niyabo 1:9.

Cok roma aroma ki i kare-ni bene. Kadi dano ma giworo Jehovah nyo pe, pud komgi doko lit ci gito. Ento cokcokki, i te loc pa Yecu macalo Kabaka me gamente pa Lubanga, jami bibedo mapat. Pe tye ngati mo dok ma bibedo ki lworo mo, pien Yecu bitic ki tekone me miyo mot i kom jo ducu ma luwiny bote.—Icaya 9:6, 7.