Ngat mo dong otito boti mung mo?— * Baibul loko i kom “mung” mo ma kite dok pat mua ki bot Lubanga. Kilwongo ni mung pien dano onongo pe gingeyo pire. Kadi bed lumalaika bene onongo gimito niang iye. In imito ngeyo mung man?—

Yam con, Lubanga ocweyo laco ki dako mukwongo. Nying laco-ni onongo Adam ki nying dakone Kawa. Lubanga omiyo botgi paco mamwonya, ma kilwongo ni Eden. Ka onongo Adam ki Kawa gubed luwiny bot Lubanga, kono gin ki lutinogi guloko lobo odoko paradic mamwonya. Dok kono gukwo i Paradic meno matwal. Ento wi po ngo ma Adam ki Kawa gutimo?—

Adam ki Kawa pe gubedo luwiny bot Lubanga, mumiyo i kare-ni pe watye i paradic. Ento Lubanga owacci ebiloko lobo ducu doko mamwonya, dok dano ducu bikwo iye ki yomcwiny pi naka. En bitimo man nining? Pi kare malac, dano onongo pe gingeyo. Lok meno onongo obedo mung.

I kare ma Yecu obino i lobo, en opwonyo jami mapol ma kwako mung man. En owacci mung man kwako Ker pa Lubanga. Yecu owacci myero waleg pi Ker pa Lubanga wek obin i lobo. Ker meno biloko lobo ducu doko paradic mamwonya.

In cwinyi yom me ngeyo mung man?— Wi opo ni jo ma gin luwiny bot Jehovah keken aye gibikwo i Paradic. Baibul tito botwa lok mapol i kom co ki mon ma gubedo luwiny bot Jehovah. Tika imito nongo ngec i kom jo magi?— Kong wanenu lok i komgi ki ngo ma watwero pwonyo ki i lanengi.