PWONY 13
Temceo Onongo Mito Konyo Dano
Temceo obedo awobi ma onongo maro konyo dano. En owoto i kabedo mapol ka konyo jo mukene. Man okelo yomcwiny madwong mada i kwone. In mono imito winyo pi jami mutimme i kwone?—
Temceo onongo pwony i kom Jehovah ki bot mamane ki daane
Temceo odongo i boma ma kilwongo ni Licitra. Ma en pud tidi, daane Loi ki mamane Yuneki, gucako pwonye lok i kom Jehovah. Ma Temceo tye ka dongo, en onongo mito konyo dano wek gupwony lok i kom Jehovah.
I kare ma Temceo onongo pud tye awobi, Paulo openye ni owot kwede ka tito kwena i kabedo mukene mapatpat. Temceo owacci: ‘Aye!’ En onongo tye atera me cito ka konyo jo mukene.
Temceo owoto gin ki Paulo i boma mo me Makedonia ma kilwongo ni Tecalonika. Me o kunu onongo mitte ni guwot ki tyengi ka mabor dok guit yeya. I kare ma guo kunu, gukonyo jo mapol me pwonyo lok i kom Jehovah. Ento jo mukene kiniga omakogi dok gutemo wanogi. Pi meno, Paulo gin ki Temceo gua woko ki kunu ci gucito ka tito kwena ka mukene.
Temceo obedo ki kwo me yomcwiny
I nge dwe mogo, Paulo openyo Temceo ni odok cen i Tecalonika wek onen kit ma omege gitye kwede. Onongo tekcwiny madwong mitte me dok cen i boma meno! Ento Temceo ocito pien onongo paro pi omege ma gitye kunu. En odwogo bot Paulo ki kwena maber. Omege me Tecalonika onongo gitye maber adada!
Temceo otiyo gin ki Paulo pi mwaki mapol. I kare mo, Paulo ocoyo ni Temceo aye ngat maber loyo ma en romo cwalo ka konyo kacokke. Temceo onongo maro Jehovah dok maro dano.
In imaro dano dok imito konyogi wek gupwony lok i kom Jehovah?— Ka kumeno, ci ibibedo ki yomcwiny i kwoni, kit macalo Temceo obedo kwede!
