Jehovah ocikke ni: ‘To bibedo pe, kadi kumo nyo koko nyo two. Abijwayo pig wanggi woko ducu. Wi dano pe dong bipo i kom jami ducu maraco ma otimme i kare mukato angec.’

Jehovah oketo Adam ki Kawa i poto me Eden wek gubed iye ki kuc wa ki yomcwiny. Onongo myero guwor Wongi me polo dok gupong lobo ki lutinogi. Adam ki Kawa gukwero winyo dog Jehovah, ento yub pa Lubanga pe olokke. I buk man waneno ni jami ducu ma Lubanga ociko cobbe kakare. Kerre bikelo mot mapol bot dano ma gibedo i wi lobo, kit ma en ocikke kwede bot Abraim.

Cokcok-ki Catan, jogine, ki jo maraco ducu bibedo pe. Dano ducu biworo Jehovah. Two ki to bibedo pe. Ma ka meno, nino ducu wabico ma nongo watye ki kero dok cwinywa yom me bedo kwo. Lobo ducu bidoko paradic. Dano ducu bibedo ki  cam mamit kacel ki odi mabeco. Dano ducu bibedo lukica, ento pe lugero. Lee tim pe gibilworowa dok wan bene pe wabilworogi.

Pud dong wabibedo ki yomcwiny madit ya ka Jehovah ocako cero jo muto. Wabijolo jo ma yam gukwo con calo Abel, Nua, Abraim, Cara, Moses, Ruth, Esta, ki Daudi. Gibinywako kacel kwedwa i loko Lobo-ni me doko paradic. Tic bibedo tye mapol ata ma yomo cwinywa.

Jehovah mito ni ibed kunnu. Ibingeyo Jehovah i yo mogo ma yam peya itamo iye. Wanyiku wunu cok bot Jehovah nino ki nino ki dong pi naka!