Abraim ki Cara onongo dong gunyomme pi mwaki mapol. Guweko pacogi maber i Ur ci gucako bedo i kema. Ento Cara pe obedo ka nguru, pien en ogeno Jehovah.

Cara onongo mito latin adada mumiyo en owaco bot Abraim ni: ‘Ka laticca Agar onywalo latin, ci en bibedo macalo latinna kikome.’ I nge kare mo, Agar onywalo latin laco. Kilwongo nyinge ni Icmael.

Mwaki mapol okato, ci i kare ma Abraim onongo tye ki mwaka 99 dok Cara tye ki mwaka 89, gunongo wele adek. Abraim ojologi me yweyo i te yat wek gucam cam. Ingeyo angagi ma wele magi gubedo? Gubedo lumalaika! Gin guwaco ki Abraim ni: ‘I mwaka manyen, i kare man kikome, in ki dakoni nongo dong wutye ki latin awobi.’ Cara onongo tye ka winyone ki i i kema. En onyerre kekene kun tamo ni: ‘An mono dok abinywalo latin, ma kombeddi dong ati woko-ni?’

I mwaka ma lubo meno, Cara onywalo wode, kit ma malaika pa Jehovah onongo ociko-ni. Abraim olwongo nyinge ni Icaka, ma te lokke ni “Nyero.”

 I kare ma Icaka onongo tye ki mwaka abic, Cara oneno ka Icmael tye ka uno Icaka. Cara onongo mito gwoko wode, pi meno en owoto bot Abraim ci openye ni oryem Agar gin ki Icmael woko. I acakkine, Abraim onongo pe mito timo meno. Ento Jehovah onongo mito gwoko Icaka, pi meno en owaco ki Abraim ni: ‘Winy lok pa Cara. Abigwoko Icmael. Ento abicobo cikkena kun awok ki bot Icaka.’