I kare ma Caulo oto, Daudi odoko kabaka. En onongo tye ki mwaka 30. I nge loc macalo kabaka pi mwaki mogo, otyeno mo acel ma en onongo tye i wi ode, oneno dako mo ma mwonya adada. Daudi openyo ci oniang ni nyinge Batceba dok obedo dako pa lamony ma nyinge Uria. Daudi ocwalo lukwena ci gukelo Batceba i gang kalle. Daudi obuto kwede, ci dako-ni ogamo ic. Daudi otemo umo balle woko. En owaco bot ladit monnye ni oket Uria anyim ka ma lweny gwa iye ci gujer gudwog cen ki i ngeye. I kare ma Uria oto i dog lweny, Daudi onyomo Batceba.

Ento Jehovah oneno jami maraco ducu ma otimme. Ngo ma en otimo? Jehovah ocwalo lanebi Natan bot Daudi. Natan owaco ni: ‘Lalonyo mo onongo tye ki romi mapol, ento lacan obedo ki latin romo acel keken ma en maro adada. Laco ma lalonyo-ni okwanyo latin romo pa lacan-ni woko.’ Kiniga omako Daudi matek ci owaco ni: ‘Lalonyo-ni myero kinek woko!’ Natan owaco bot Daudi ni: ‘In aye lalonyo-ni kikome!’ Cwiny Daudi otur, ci en oye balle i nyim Natan kun waco ni: ‘An atimo bal i kom Jehovah.’ Bal man okelo ayelayela mapol bot Daudi ki jo me ode. Jehovah omiyo pwod bot Daudi ento pe oneke pien en onongo dano ma genne dok mwol.

Daudi onongo mito gero ot pi Jehovah, ento Jehovah oyero wode Solomon me gerone. Daudi ocako yubo jami gedo ma mitte pi Solomon ci owaco ni: ‘Ot pa Jehovah myero obed me  deyo makato ducu. Solomon pud tidi, pi meno an abikonye ki yubo jami ducu ma mitte.’ Daudi omiyo centene madwong adada pi konyo tic me gedo-ni. En oyenyo jo ma gikwiri i ticgi. En ogwoko jabu ki ryal, dok oweko kikelo bao yat cedar ki i Turo ki Cidon. I agikki me kwone, Daudi omiyo bot Solomon cal ma nyuto kit ma ot pa Lubanga myero obed kwede. En owacci: ‘Jehovah omiyo acoyo jami magi ducu piri. Jehovah bikonyi. Pe ilwor. Bed ma cwinyi nwang wek imak tic.’