Jehovah ogoyo laane i kom Solomon kun miyo bote mot me gero ot pa Lubanga, ento motmot Solomon oweko Jehovah woko. Ka in lanyodo, tit bot latinni kit ma luworo me goba guloko kwede Solomon woko ki i woro Lubanga. Ker me Icrael opokke woko, dok kabaka maraco guloko rok me Icrael i woro cal apaya. I kare meno, kibedo ka uno ki neko lunebi mapol pa Jehovah. Daker Jejebel omiyo ker ma tung kumalo me Icrael gudonyo matut adada i woro goba. Meno pud dong obedo kare marac ya i tekwaro pa jo Icrael. Ento onongo pud tye lutic pa Jehovah ma lugen i kin jo Icrael, ma i kine tye iye Kabaka Yekocapat ki lanebi Elia.