1. Wan omyero watim ngo me yomo cwiny Lubanga?

ME WEK wabed ki wat ma cok dok me mar ki Lubanga mitte ni omyero pe wanywak kit gin mo keken ki dini me goba. Omyero walub dini me ada. I kare-ni dano milion mapol i wi lobo ducu gitye ka timo meno.

2. Kiromo nongo Lucaden pa Jehovah ka kwene, dok gin gitiyo tic ango?

² Kit ma Baibul otito kwede con, jo ma giworo i ada gudoko “lwak dano mapol ata” ma “gua ki i rok ducu, ki i kaka ducu, ki dano ducu me wi lobo, ki leb ducu.” (Niyabo 7:9) I lobo 235, milion mapol pa Lucaden pa Jehovah gitye ka konyo jo mukene ki mit kom me ngeyo lok i kom yo me mar pa Jehovah kacel ki gin ma en mito.

3. Lucaden-ni giworo anga, dok kit woro ango ma gin gikwero woko?

³ Lucaden-ni gingeyo ni Jehovah kene aye myero me awora. Gin pe gigungo piny me woro cal apaya nyo kit cal me dini mo keken. (1 Jon 5:21) Gin bene pe giworo jo muto ki kwer me gwoko kom lato labongo nino nio wang ma kiyiko nyo timo kit kwer mogo ma cwako niye me dini goba ki ma gubedo “pwony pa [jogi].” (1 Temceo 4:1) I ada, gin gikweyo cwiny jo ma danogi me amara oto kun gitito pi cikke pa Lubanga ma waco ni cero jo ma guto i kwo me paradic i lobo kany bibedo tye.​—Jon 5:28, 29; Tic pa Lukwena 24:15.

4. Jo pa Lubanga gicung ka kwene i lok kom tim tyet?

⁴ Lucaden-ni pe gimito tim tal nyo tyet i kit yo mo keken pien gin gingeyo ni tim magi ducu a ki bot Larac. Gin pe gigeno tyet me gwokogi ento gigeno Jehovah aye.​—Carolok 18:10.

5. Lucaden pa Jehovah “pe jo me lobo” i kit yo ango?

⁵ Yecu owaco ni jo ma lube “pe [bibedo] jo me lobo.” (Jon 17:16) Yecu kikome okwero donyo i lok me loc lobo me karene. (Jon 6:15) I kit yo acel-li, Lucaden-ni bene pe gidonyo i lok me loc lobo, i cwiny me maro lobogi keken, kacel ki laro rwom mamalo me lobo-ni. Gin gire giculo mucorogi dok bene gilubo cik me lobo ka ma gin gibedo iye.​—Jon 15:19; Jo Roma 13:1, 7.

6. Kit cik ango ma lutic pa Lubanga gilubo i lok ma mako nyom kacel ki keto keny?

⁶ Lucaden-ni giketo tek me neno ni gicoyo nyomgi maber, pien gin gimito lubo gin ma gamente cimo. (Tito 3:1) Gin gilubo tela pa Lubanga, pi meno gikwero bedo ki mon mapol. (1 Temceo 3:2) Me medo i kom meno, lutic pa Lubanga-ni giketo i tic cik me Baibul mapol ma tegi lac, weko pol kare kenygi pe ket.

7. Lucaden-ni ginyuto mar bot luwotgi nining?

⁷ Lucaden-ni gimare i kin-gi keken-gi. Mar man, kacel ki mar pi Lubanga ribogi i kit me omego kikome kadi bed gin gubedo jo me kaka ki lobe mapatpat. Ka peko opoto nyo kony mo mitte, Lucaden-ni gitugi miyo kony oyotoyot bot luwotgi. Lucaden-ni ginyuto mar i kit ma gin kwo kwede.​—Jon 13:35.

8. Kit tic maraco ango ma jo pa Lubanga pe gitimo?

⁸ Jo pa Jehovah gitiyo matek me bedo ki kwo maleng dok ma atir. Gin pe gikwalo kwo, pe gitimo tim kwele, pe gimer ki kongo dok pe gitiyo tic cato wil me buma mo. Co pe gigoyo mon-gi. Jo mukene i kin-gi gutimo jami magi ma peya gudoko Lucaden, ento pi kony pa Jehovah gin dong guweko tim magi woko. “Gityeko lonyo[gi] me bedo jo maleng” i nyim Lubanga.​—1 Jo Korint 6:9-11.

9. Buk mo acel owaco ningo i kom kanica mogo ma giloko timgi wek orwatte ki kit pa jo me Afrika?

⁹ Pol dini gire giwaco ni gin aye gitye ki ada. Gitwero cimo ticgi madito macalo gin ma nyuto ni dinigi aye me ada. Me lapore, buk mo acel oloko i kom kanica ma i Afrika ma giloko timgi wek rwatte ki kit tim pa jo me Afrika ni: “Gin[dul pa Lukricitayo manyen] dong guleyo tic pa ajwagi nyo lumii yat me tekwaro woko. . . . Gin giwaco ni giloko lok madongo ma oa ki i kabedo me cwiny dok bene gitimo tango. Lunebi ma i kin-gi gineno ginanyuta dok bene gigonyo te lek-gu. Gitiyo ki pii maleng, ki buru, ki kandela ki odok eceta me cango two nyo me gengo two.”

10, 11. Pingo gin ma gilwongo ni tango-ni pe nyuto ni dini moni oa ki bot Lubanga?

¹⁰ Lumemba me dini magi giwaco ni tango magi aye gin ma nyuto ni dinigi-ni Lubanga cwako. Jami magi ma kilwongo ni tango-ni pe nyuto ni dini moni Jehovah cwako. Catan miyo teko bot jo ma gitye i dini me goba me timo “tango mogo me goba.” (2 Jo Tecalonika 2:9) Me medo i kom meno, Baibul otito con ni mot me tango ma a ki bot Lubanga calo tuco lok ma i anyim, dumo leb, kacel ki ngec ma kitgi dok pat ducu “bitum woko.”​—1 Jo Korint 13:8.

¹¹ Yecu ociko ni: “Pe dano ducu ma gilwonga ni, ‘Rwot, Rwot’ aye gibidonyo i ker me polo, ento ngat ma tiyo gin ma Wora ma i polo mito. I nino meno jo mapol biwaco bota ni, ‘Rwot, Rwot, yam pe watito lok pa Lubanga i nyingi, dok pe waryemo [jogi] maraco-gu woko ducu i nyingi? Yam pe watiyo tic mogo matek madito i nyingi?’ Ci abituco botgi ka maleng ni, ‘Onongo pe angeyowu; wua woko ki bota, wun lutim gin maraco.’” ​—Matayo 7:21-23.

12. Anga ma bidonyo i Ker me polo?

¹² Nga dong kono ma bidonyo i Ker me polo? Jo ma gitimo gin ma Jehovah mito aye gibidonyo.

13. Lubanga ocimo kit tic ango me atima bot jone me kare-ni, dok angagi ma gitye ka timone?

¹³ Lubanga mito ni jone gutim gin ango i kare-ni? Yecu owaco ni: “Dong lok man me kwena maber me ker pa Lubanga gibitito i wi lobo ducu, me bedo caden bot rok ducu.” (Matayo 24:14) Man aye tic ma Lucaden pa Jehovah gitye ka timone ki mit kom.

14. Ker pa Lubanga obedo gin ango, dok jo mene ma biloc i Ker meno?

¹⁴ “I wi lobo ducu,” Lucaden pa Jehovah gitye ka tito pi Ker pa Lubanga ni obedo gamente ma tye i polo ma biloyo wi lobo ducu i yo ma atir. Gin gipwonyo ni Jehovah ocimo Yecu Kricito me bedo Kabaka me ker meno kacel ki jo 144,000 ma gibiloc kacel kwede, dok ma kiyerogi ki i kin dano.​—Daniel 7:14, 18; Niyabo 14:1, 4.

15. Ker-ri bityeko kit gin ango?

¹⁵ Lucaden pa Jehovah gitiyo ki Baibul me nyuto bot dano ni Ker pa Lubanga obityeko te yub pa Catan ducu ki pete tere. Dini goba kacel ki pwonye ma nywaro Lubanga-ni, dok ma keto deyo i kom Catan-ni bibedo pe matwal! (Niyabo 18:8) Gamente ducu pa dano, ma gijemo i kom Lubanga bene bibedo pe!​—Daniel 2:44.

16. Angagi ma gibibedo i te loc pa Yecu Kricito, dok gin gibibedo ka kwene?

¹⁶ Medo i kom meno, Lucaden pa Jehovah giweko dano gingeyo ni Yecu Kricito obikelo lwak jami mabeco tutwal bot jo ducu ma gitimo gin ma Lubanga mito. Gin aye gibibedo jo ma en loyogi i wi lobo. Baibul ociko ni: “En laro dano ma piny obwoyo ka okok bote, konyo lucan ki jo ma pe gitye ki ngat ma konyogi. Kica make i kom jo magoro ki ma piny obwoyogi, ci laro kwo pa jo ma piny oloyo[gi].”​—Jabuli 72:12, 13.

17. Angagi ma gitye ka tito lok me Ker pa Lubanga?

¹⁷ Pe dok tye dul mo mukene ma gitye ka tiyo miti pa Lubanga kun gitito lok me kwena maber me Ker man. Lucaden pa Jehovah keken aye gitye ka tito lok me Ker pa Lubanga i wi lobo ducu.