1. Kit dini mene ma gitye i Afrika?

COKCOK dano ducu ma i Afrika ye ni woro Lubanga pire tek. Ento, kit yo ma giwore kwede aye opokke. Jo mogo gilego i muskuta, jo mukene gicito i te abila. Jo mukene bene gicito i kanica. Pe twero bedo atir me tamone ni dini tye adek keken i Afrika. I kin Luislam, tye cik ki pwony mapatpat. Dini macon gitye mapatpat i kabedo mapatpat. I kin kanica mapol pa Lukricitayo ata-ni, apokapoka dong tye iye madit makato. Tye lwak kanica alip mapol ata ma gitye pigi ken-gi i kabedo ducu i Afrika, dok ma bene gipat ki kanica madongo-ni.

2. (a) Kit gin ango ma pol kare weko dano bedo i dini moni? (b) Gin ango aye ma pe nyuto ni diniwa yomo cwiny Lubanga?

² Pingo dano gitye i dinigi me kare-ni? Dano mapol gidonyo i dini pa lunyodogi. Jami mutimme con aye oweko dano gitye i dinigi me kare-ni. Buk ma nyinge The Africans​—A Triple Heritage waco ni: “Islam onya tung kumalo me aroo me Sahara pi loyo lweny, . . . Tung kupiny me Sahara, dini pa Lukricitayo onya pi kit yo acel-li. Ka dini Islam onya tung kumalo me aroo me Sahara pien dano onongo gilworo pala lucwan, ci dini pa Lukricitayo bene onya tung kupiny me Sahara pi lworo muduku.” Kadi bed kit meno, polwa tamo ni diniwa yomo cwiny Lubanga. Ento dini pe bedo ada pien ni lunyodowa gitye iye, onyo ni twero me lobo ma woko aye odiyo kwarowa me donyo iye.

3-5. Lapor ango ma konyowa me niang ni pe dini ducu pwonyo lok ada?

³ Kadi bed dini ducu giwaco ni gimiyo tela ma genne i lok me tic pi Lubanga, ento tamgi dok pokke woko. Gipwonyo jami mapol mapatpat i kom nga ma Lubanga obedo ki gin ma en mito ki botwa. Tam kong i kom lok man: Ket ni inongo tic i kampuni madit. I nino me acel me ticci, iniang ni ladit tic ocito woko iyweyo. Pi meno ipenyo lutic adek me titi gin me atima. Latic me acel owacci ladit mito ni iywe ot. Ngat me aryo owacci omyero iwer kor ot. Me adek-ke owacci ipok waraga.

⁴ I nge meno, pud dok ipenyo lutic-ci lok i kom ladit-ti. Ngat me acel-li owacci ladit-ti pud tidi, bor, dok ger. Latic me aryo-ni owacci en obedo laco macek, oti, dok lakica. Ki dong latic me adekke-ni owacci ladit-ti bene pe obedo laco wacel​—ento obedo dako aye. Atamo itwero moko ni lutic adek-ki ducu pe gitye ka tito lok ada. Ka imito gwoko ticci, olo twal ibitemme me ngeyo atika nga ma ladit-ti obedo ki bene gin ma en mito ni itim.

⁵ Man rom aroma ki lok me dini. Pien tam tye mapol i kom lok ma mako nga ma Lubanga obedo kacel ki gin ma en mito ki botwa, mitte ni wanen ni yo me worowa rwatte ki ada. Ento wan dong watwero ngeyo lok ada i kom Lubanga nining?