1. Ka ‘wanyiko cok bot Lubanga’ ci ngo ma bitimme?

JEHOVAH maro jo ma tiyo pire. En bimini jami mabeco i kare-ni ki i kare me anyim. Baibul waco ni: “Wunyik cok bot Lubanga, ci en bene binyiko cok botwu.”​—Yakobo 4:8.

2. Wan waromo nyiko cok bot Lubanga nining, dok man biweko legawa bedo nining?

² Me nyiko cok bot Lubanga, omyero ikwan dok iket Lokke i tic. Jehovah biwinyo dok bigamo legani, ka ilego ma rwatte ki mitine. Lakwena Jon ma Lakricitayo ocoyo ni: “Gin ma miyo wabedo ki gen i kome en ene ni, ka walegge gin mo kun walubo gin ma en mito, ci en winyo legawa. Dong ka wangeyo ni en winyo legawa, wangeyo ni dong watyeko nongo gin ma walego bote.”​—1 Jon 5:14, 15.

3-7. Wan waromo nongo ryeko pa Lubanga nining, dok ryeko-ni twero konyowa nining?

³ Me medo i kom meno, ma nongo itye ka nyiko cok bot Lubanga, en bimini ryeko me cobbo i yo maber jami ma warwatte kwedgi i kwowa me nino ki nino. Baibul waco ni: “Ka ce tye ngat mo i kinwu ma ryekone nok, myero en oleg Lubanga.”​—Yakobo 1:5.

⁴ Ryeko ma a ki bot Lubanga-ni konyi nining? Gin acel ma ryeko man timo aye ni konyi me ngeyo jami ma pe yomo cwiny Jehovah. In bene itwero ngeyo pingo jami magi raco kacel ki ngo ma omyero itim me kwerogi. Ngec ma kit man twero gwoki ki i peko mapol ma bino i kom dano ducu. Me lapore, lubo tam pa Lubanga me bedo ki kit maleng konyo me gwoko jo pa Lubanga ki i yaco ma pe gimito, nyo two ma kinongo ki i butu me mit, nyo kwo me ot ma pe ki yomcwiny nyo keto keny.

⁵ Ryeko ma Lubanga miyo konyi dok ki ngo mukene? Twero konyi me bedo ki kwo maber tutwal. Twero konyi me moko tam me ryeko dok me tic kwede i yo maber, calo i kit me tic ki cente. In ibiyubo yub ma pigi tego dok bene weko ikwero yub ma konygi pe ri pi kare malac.

⁶ Ryeko ma a ki bot Lubanga twero konyi me bedo ki wat maber ki jo mukene. Weko i bedo ki kwo me yomcwiny i ot. Itwero dongo larem me ada ma rii ki jo mukene, dok weko inongo woro, kadi wa ki bot jo ma pe gingeyo Lubanga.

⁷ Me medo i kom meno, bedo ki ryeko pa Lubanga biyubo kit ma ineno kwede kwo. Bikonyi me lweny ki cwercwiny kacel ki peko ma inongo i kwo. Weko in bene ibineno lok me anyim i yo mupore ki gen ni kwo bibedo maber. Neno lok me anyim ki gen bene bikonyi me bedo ki adam kacel ki kom ma yot.​—Carolok 14:30; Icaya 48:17.

8. Ka itiyo pi Lubanga, kit jami ango ma pe ibilworogi?

⁸ Lworo ma yelo jo ma pe gingeyo Lubanga-ni bia woko ki boti ka itiyo pi Lubanga me ada. Pe ibilworo jo muto pien in dong ingeyo ni jo muto ma gitye i bur lyel kwogi pe. Pe bene ibilworo to pien itye ki gen i kom cikke pa Lubanga me cero jo ma guto. Dok pien in dong ingeyo ni Lubanga  aye tek ma loyo ducu, weko pe ibilworo tim tyet nyo tal.​—Jon 8:32.

9-11. Angagi ma gibikwo i Paradic, dok angagi ma pe gibibedo iye?

⁹ Ka inyiko cok bot Lubanga ci pe ibilworo gin ma i anyim. Kit ma dong waneno kwede, Baibul otito con pi peko mapol ma watye ka neno i wi lobo i kare man. Jehovah waco botwa ni jami magi tye pi tutunu. Ker pa Lubanga cokcokki biloko lobo man me doko paradic.​—Luka 21:10, 11, 31; 23:43.

¹⁰ Jo ma gunyiko cok bot Jehovah ma gitye ka tic pire gin keken aye gibikwo i Paradic. Baibul waco ni: “Odong kare manok, ci dano marac dong bibedo pe matwal; kadi ingi i kabedone maber, ibinongo ni en dong pe kunnu. Ento jo mamwol aye gibicamo lobo; gibibedo ki yomcwiny pi lonyo madwong ma gibilimo.”​—Jabuli 37:10, 11.

¹¹ Jo ma gikwero winyo cik ma atir pa Lubanga akaka kwogi birwenyo woko matwal. (2 Jo Tecalonika 1:8, 9) Gin dong pe gibibedo tye matwal. Gin gibiribe kacel ki Catan ki jogine i to matwal. (Niyabo 20:10, 14) Jo ma gipwonyo lok i kom Jehovah ma gitye ka tic pire aye gibinongo kwo me yomcwiny madit adada i Paradic i wi lobo.

12. Baibul waco ningo i kom kwo ma tye i anyim?

¹² Jehovah tye ogwoko jami mabeco me aura pi jo ma mare! Kong inen gin ma Baibul waco i kom kwo me Paradic i wi lobo:

• Cam mapol ata me acama: “Cam bene myero ocek mabup i lobone, opong wa wi godi-gu woko ducu.”​—Jabuli 72:16.

• Odi mabeco: “Dano gibigero odi ci gibedo i igi.”​—Icaya 65:21.

• Tic ma yomo cwiny: “Jona ma an aye ayerogi gibibilo tic me cinggi pi kare malac. Ngat mo i kin-gi pe biyelle ki tic nono.”​—Icaya 65:22, 23.

• Two bibedo pe: “Pe tye dano mo ma bedo i lobowa ma biwaco ni, ‘An koma lit.’”​—Icaya 33:24.

• Goro kom mo bibedo pe: “I kare meno lutowang wanggi biyabbe, jo ma itgi oding bene itgi biyabbe. I kare meno lungolo bipye malo calo til, ki jo ma te lebgi oto gibicako wero wer ki yomowiny.”​—Icaya 35:5, 6.

• Arem, kumo, ki to bibedo pe: “En [Lubanga] bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”​—Niyabo 21:4.

• Lweny bibedo pe: “En [Lubanga] juko lweny woko i wi lobo ducu.”​—Jabuli 46:9.

• Kwo ma pe tum: “Jo ma kitgi atir gibicamo lobo, dok gibibedo iye matwal.”​—Jabuli 37:29.

13. Anga keken aye ma twero loko lobo-ni me doko paradic, dok pingo?

¹³ Dano pe gitwero kelo jami magi, ento Jehovah tye ki teko me timo gin mo keken ma en waco ni ebitimo. Pe tye gin mo ma twero gengo en timo gin ma en mito. Baibul waco ni: “Pe tye gin mo ma loyo Lubanga.”​—Luka 1:37.

14. Itwero cako wot nining i yo me cito i kwo ma pe tum?

¹⁴ Jehovah tye ka tic ki Lucadenne, me miyo kare bot dano i kabedo ducu me “donyo i doggola mading” dok me wot i yo ma tero dano i kwo ma pe tum. Bibedo ber adada ka in bene ibedo tye i kin jo ma gijolo lwongo meno. Omyero iti ki dini me ada wek inong mit me bedo ki cwak pa Jehovah nakanaka!​—Matayo 7:13, 14.