1, 2. Lapor ango ma nyuto ni lapim konyo me moko tam i lok me dini?

WAN waromo ngeyo Lubanga nining? Mitte kong mono me ngiyo pwony ducu me dini mapol-li? Meno gin ma pe twere. Kadi bed onongo watwero timmo meno, ento wangeyo pwony ma tye atir nining?

² Ada, kit macalo tam tye mapatpat i kom Lubanga, oweko mitte ni omyero wabed ki lapim me ngeyo gin ma atir, ma dano ducu ye. Me lapore: Kong iket ni lara ocakke i cuk pi lac pa bongo. Lacat waco ni bongo-ni tye mita adek ento lawil tamo ni pe romo. Kiromo tyeko lok man nining? Kityeko ka kipimo bongo-ni ki mita.

3. Pingo kicoyo Baibul?

³ Lapim me moko tam i lok me dini tye? Tye, en aye Baibul. Lubanga oweko kicoyo Baibul wek dano me kabedo ducu gunge lok ada i kome. Wel Baibul ma kigoyo tye bilion mapol. Dong kigonyo Baibul i leb makato 2,100 kulu. I leb mogo kigonyo woko ducu ento i mukene kigonyo bute keken. Dong cokcok dano ducu gitwero kwano lok ada i kom Lubanga i lebgi.

4. Ngec ango ma tye i Baibul?

⁴ Baibul obedo twon mic madit ma oa ki bot Lubanga. Tito lok i kom jami ma onongo pe watwero ngeyogi ka Baibul onongo peke. Tito pi jo ma gikwo i kabedo me cwiny. Nyuto tam, ki yub pa Lubanga kacel ki kit Lubanga. Tito kit ma en obedo ka tic kwede ki dano pi mwaka alip  mapol. Tuco jami ma bitimme i anyim. Nyuto bene kit ma waromo nongo kwede yo ma cito i kwo ma pe tum.

5. Gin ango ma nyuto ni lok ma i Baibul rwatte ki lok me sayan?

⁵ Tye tyen lok mapol ma weko waromo ye ni Baibul obedo Lok pa Lubanga ada. Tyen lok acel aye ni lok ma i Baibul rwatte ki lok me sayan. I kare macon adada dano ma i wi lobo ducu onongo gitamo ni lobo ocung i wi gin mo. Me lapore, i tung Kupoto Ceng me Afrika dano con gitamo ni lobo ocung i kin otac twol ma odolle tyen 3,500 ki i wiye malo ki dok tyen 3,500 ki i tere piny. Ento, pwony me sayan rwatte ki ngec ma laco Baibul mo ocoyo mwaka 3,500 i ngec ni Lubanga “pe ongabo lobo i kom gin mo.”​—Yubu 26:7.

6. Gin ango ma nyuto adada ni Baibul oa ki bot Lubanga?

⁶ Gin madit ma nyuto ni Baibul ada obedo buk pa Lubanga aye pi tito lok ma tye anyim labongo roc mo. Pe obedo calo lok pa dano. Lubanga i ada ngeyo ngo ma tye anyim; gin ducu ma en waco cobbe kakare.

7. Lok mene i Baibul ma cimo jami ma i anyim ma dong gutyeko cobbe woko i kare ma okato i ngec?

⁷ Lok me Baibul ma mako jami ma anyim ma romo mia mapol dong gutyeko cobbe woko i kare ma okato i ngec. Me lapore, Baibul otito atir mwaka 700 i anyim ni Yecu onongo myero kinywal i boma me Beterekem, ci bene otimme kit meno. (Mika 5:2; Matayo 2:3-9) Me medo i kom lok mapol mukene ma gituco i kom Yecu, Baibul bene otito con ni nyako ma pe ongeyo laco aye obinywalle dok ni kibidotte bot lumonene pi cente me nyig ryal 30. Lok magi ma mako anyim-mi ducu gutimme. Adada pe tye dano mo ma onongo twero tito lok magi ma peya gutimme!​—Icaya 7:14; Jekaria 11:12, 13; Matayo 1:22, 23; 27:3-5.

8. Lok ango ma Baibul otito con ma gitye ka cobbe i kare-ni, dok ginyuto ngo?

⁸ Lok mapol ma Baibul otito con dong gitye ka cobbe i karewa-ni. Manokke gin en:

•   “Rok bilweny ki rok wadi, ker bilweny ki ker wadi; ki oyengyeng madongo biyengo lobo, kec laparanat ki two [maraco] mapatpat bipoto i kabedo mapol.”​—Luka 21:10, 11.

• “Tim maraco bibedo ka medde ameda.”​—Matayo 24:12.

• “I kare me agikki, . . . dano bibedo ka maro komgi ken-gi kun gibedo lumar lim, . . . pe gibiwinyo lunyodogi, . . . gibibedo jo ma mitgi pe jukke, jo ma ger ma gidag gin mo maber . . . jo ma gikette malo ken-gi ki wakke, jo ma maro yomcwiny ma ka maro Lubanga.”​—2 Temceo 3:1-5.

In pe iye ni jami magi tye ka timme i kare-ni? Atir me lok pa Baibul i kom gin me anyim nyuto ni Baibul dok obedo kit buk mapat. Baibul obedo Lok ma kicoyo pi tek pa cwiny pa Lubanga.​—2 Temceo 3:16.

9, 10. Ngo ma nyuto ni Lubanga pe oweko dano guloko Baibul?

⁹ Ket kong ni ibedo won cuma ci iketo cik mapol ma kicoyogi piny pi luticci. Ka lamoneni oloko cik ma icoyo-ni woko, in ibitimo ngo? Pe ibiyubo ka ma en oloko-ni woko? I kit yo acel-li, Lubanga pe ye ni dano gulok lokke ma tye i Baibul.

¹⁰ Jo ma gutemo kelo alokaloka i pwony ma i Lok pa Lubanga, ticgi pe otwere. Ka waporo Baibul ma watye kwede i kom kare-ni ki Baibul me kare macon adada, ci wanongo ni girom. Man nyuto ni Baibul pe kiloko odoko pat i nge mwaka mapol.