Yakobo onongo ngeyo ni Jehovah mito ni wawore ki cwinywa ducu, kadi bed ni onongo pud peya En omiyo cik mo ma gengo woro lubange mukene. (Nia 20:3-5) Pi meno, ma Jehovah owacce ni odok cen i Betel, Yakobo ociko jo ducu ma i pacone ni gubol lubange me goba woko. Dok Yakobo oyiko cal lubange magi ducu, kadi wa agit it, ma gwok onongo giruko macalo lagwok kom. (Acak 35:1-4) Labongo akalakala mo, cwiny Jehovah obedo yom adada pi gin ma Yakobo otimo-ni.

Watwero woro Jehovah ki cwinywa ducu i kare-ni nining? Gin acel ma pire tek aye me gwokke ki gin mo keken ma kubbe ki lubange me goba kacel ki tim jok. Man kwako bolo gin mo keken ma kubbe ki tim tyet ki dong yero galowangwa ki diro. Me labolle, penye kekeni ni: ‘Tika akwano bukke nyo aneno filim ma nyuto tim jokjok, anati, vampire, nyo cen ma kitamo ni cwiyo remo pa dano? Tika jami ma agalo ki wanga nyuto tango, ceno ki lamo dano calo jami ma pe giraco?’ Myero wagwokke ki i kom gin mo keken ma Jehovah dagi.​—Jab 97:10.

NEN VIDIO MA WIYE TYE NI “WULWENY MATEK KI CATAN,” CI IGAM LAPENY MAGI:

• Peko ango ma latin kwan mo me Baibul ma nyinge Pamela owok ki iye?

• Pingo tye me ryeko me yenyo kony pa luelda ka in, ngat ma ingeyo nyo latin kwanni me Baibul tye ka wok ki i peko ma kubbe ki tim jokjok?

• Jami ango ma ngat ma mito gwok pa Jehovah myero okwer lajwac?

• Gin ango ma Pamela omoko tamme me timone?

• Gin ango ma omyero igwokke kwede ma dano maro timone i kabedowu me kubbe ki jogi?