Nicakke i 2018, magajin acel acel obedo ka lok i kom wi lok acel madit. Magajin magi bene gitye i kin Jami Ticwa ma Pigi Tego me Pwony. Pi meno, watwero tic kwede i tic me pwony. Watwero bene wot ki mogo i kicaawa ka watye ka cito ka mo nyo ka wil. Magajin magi pe kiyubogi me kwano Baibul ki dano, ento gitwero tugo miti i cwiny dano me pwonyo lok matut i kom Lubanga.

Ka icako lok ki ngat mo, nyutte ginacoya dok lok i kom magajin mo ma en twero bedo ki miti iye. Me labolle, ka iniang ni en tye lanyodo nyo tye ka lweny ki kumu nyo par, itwero wacce ni: “Cokcok-ki, akwano tam mo maber adada ma lubbe ki lok meno. Atwero nyutti?” Ka ineno ni en tye ki miti, itwero miye kopi acel me magajin nyo icwalle mo ki cim nyo tabulet, kadi bed meno pud obedo lim me acel. Kadi bed miyo magajin aye pe gin ma pire tek loyo, magajin twero konyowa me nongo jo ma tye ki miti me winyo lokwa.​—Tic 13:48.