YUB ME COKKE ME KWOWA KI TICWA Januari 2016
Kit me Cako Lok
Tam me miyo magajin me Wi Lubele ki Awake! ki brocuwa me Kwena Maber Mua ki Bot Lubanga! Ti ki lapor magi me konyi me yubo kit me cako lok piri keni.
LONYO MA TYE I LOK PA LUBANGA
Woro me Ada Mito Tute Matek
Go kong kit ma Kabaka Kejekia oketo kwede cwinye me dwoko woro me ada kakare. Ti ki cal, mep, ki lain ma nyuto kare me timme pa jami i 2 Tekwaro 29-30 me konyi.
TUTE MATEK I TIC ME PWONY
Kit me Kwan ki Lutino Kwan Kun Watiyo ki Brocuwa me Kwena Maber
Yo abic mayot me kwano Baibul ki dano i yo ma nyako nyige kun watiyo ki brocuwa me Kwena Maber Mua ki Bot Lubanga
KWOWA MACALO LUKRICITAYO
Watye ki Mot me Gero ki Roco Kabedo me Woro me Ada
Watwero nyuto mit komwa ki marwa pi tic maleng i kabedo me worowa nining?
LONYO MA TYE I LOK PA LUBANGA
Jehovah Maro Dano ma Ngut Balle Ada
Ngut me ada pa Kabaka Manace Okelo Adwogi Maber. Por locce ma peya kimake ki locce i kare ma kigonye ki i Babilon. (2 Tekwaro 33-36)
LONYO MA TYE I LOK PA LUBANGA
Jehovah Gwoko Cikkene
Lain ma nyuto kare me timme pa jami i Ejira 1-5. Kadi bed gurwatte ki ariya mapol, Lujudaya gudwogo ki i Babilon, gudwoko woro me ada kakare, dok gugero ot pa Lubanga odoco.
LONYO MA TYE I LOK PA LUBANGA
Jehovah Mito Lutic ma Komgi Mit
Onongo mitte ni Ejira kacel ki jo ma gudok kwede i Jerucalem gubed ki niye matek, mit kom pi woro me ada, ki tekcwiny. Ti ki cal kacel ki mep me goyo i wi kit ma wotgi obedo kwede.
KWOWA MACALO LUKRICITAYO
Dongo Dirowa i Tic me Pwony—Cibo Guti me Dok Cen
Yo adek me dongo dirowa me dok cen ka lim bot jo ma gunyuto miti i lok ada me Baibul.
