Go kong ni itye ka bedo Galilaya i kare pa Yecu. Iwoto wa i Jerucalem ka kwero Nino Madito me Bolo. Boma man opong ki luworo luwoti ma gua ki i kabedo maboco. Imito tyero gityer bot Jehovah. Motmot, icako peyo dyel-li, kun iwoto ki i kin dano mapol me cito i ot pa Lubanga. Ka dong io, inongo ot pa Lubanga opong ki jo mukene ma gimito tyero tyergi. I agikkine, kare dong oromo me miyo dyel-li bot lalamdog. I cawa meno cutcut, wi opo ni omeru, ma twero bedo ni tye i kin lwak dano-ni nyo i boma meno, tye ki lok mo i komi. Yecu otito gin ma myero itim. (Kwan Matayo 5:24.) Ngo ma wutwero timone me riyo tal i kin wun ki omeru, kit ma Yecu owaco-ni? Gwet lagam ma tye kakare i nget lok ma kiryeyo piny kany.

OMYERO . . .

• ilok ki omeru ka itamo ni en tye ki tyen lok matir me keco i komi

• item tiro tam pa omeru ka ce itamo ni en keco oyotoyot nyo bal mo bene tye i wiye

• iter iti ka winyo ka omeru tito lok ma i cwinye, dok kadi bed pe iniang lokke ducu, kwa kica pi cwero cwinye nyo adwogi marac ma obino pi gin mo ma itimo

OMERU OMYERO . . .

• oyeny cwak pa jo mukene me kacokke kun tito botgi kit ma ibalo kwede i kome

• otokke i wi, kun tito boti bal ma itimo kore ki kore, wek iye ni itimo bal

• oniang ni inyuto mwolo ki tekcwiny me cito bote, ci otimmi kica ki cwinye ducu

Kadi bed pe watyero lee i worowa bot Jehovah i kareni, ngo ma Yecu onongo tye ka pwonyowa i kom kubbe ma tye i kin watwa ki omegiwa ki woro ma Lubanga jolo?