Pingo wanongo mit pa gurewa madito ma bedo mwaka ki mwaka? Calo i kare pa Luicrael, gurewa madito i kare-ni bene miniwa kare me woro Jehovah kacel ki luye luwotwa miya mapol. Wacamo cam me cwiny madwong adada. Wanongo bene mit pa bedo kacel ki luremwa ki jo me gangwa. Pwoc ma watye kwede weko wabedo tye i nino adek-ki ducu.

Ka wanongo kare me bedo kacel, myero pe watam i kom gin ma wanongo keken, ento bene i kom kit ma watwero nyuto kwede mar bot jo mukene. (Gal 6:10; Ibru 10:24, 25) Ka waweko yo ki jo mukene wek gukati, dok pe wagwoko kabedo ma pe wabitiyo kwede, ci wanyuto ni watamo bene pi jo mukene. (Pil 2:3, 4) Gurewa miniwa kare maber me mako lirem manyen. Watwero kwanyo karewa me ngeyo jo ma pe wangeyogi maber ma peya yub ocakke, i cawa me yweyo, nyo ka yub otum. (2Kor 6:13) Lirem ma wamako i yub calo magi twero rii pi naka! Ma dong pire tek loyo, ka jo mukene guneno mar me ada ma wanyuto i kinwa, gin bene gitwero moko tamgi me ribbe kwedwa i woro Jehovah.​—Jon 13:35.

NEN VIDIO MA WIYE TYE NI “MAR PE GIK”! GUREWA MADITO MA KWAKO LOBE MAPOL, CI IGAM LAPENY MAGI:

• I yo ma nining ma kinyuto kwede mar bot welle ma gubino i gurewa madit ma kwako lobe mapol me 2019?

• Pingo note ki mar ma tye i kin jo pa Jehovah dok kite pat adada?

• Lumemba me Lukiko Madit gunyuto mar pa Lukricitayo nining?

• Mar pa Lukricitayo onoto utmegiwa ma i Germany ki South Korea nining?

• Myero wamok tamwa me timo gin ango?