Wakwo i lobo ma jone neno gin maber ni rac ki gin marac ni ber. (Ic 5:20) Ki cwercwiny madit, jo mogo gitimo jami ma Jehovah dag. Man bene kwako tim macilo ma pe opore i kin co ki co nyo mon ki mon. Lutino kwan nyo jo mukene gitwero bito lutinowa me lubo jami ma gitimo. Itwero yubo lutinoni nining wek gucung matek i kom dic ma ginongo ki bot lutino kwan luwotgi nyo jo mukene?

Pwony lutinoni ki cik pa Jehovah. (Levi 18:3) Tittigi ngo ma Baibul waco i kom tim me buto dok minigi ngec man ma rwatte ki mwakagi. (Nwo 6:7) Pennye kekeni ni: ‘Tika dong apwonyo lutinona yo mupore me nyuto mar, pingo pire tek me rukke ki woro, ki dong ni myero jo mukene pe gunen nyo gugud dul komgi mogo? Tika lutinona gingeyo gin me atima ka ngat mo otemo nyutigi cal ki coc macilo ma tugo miti me buto, nyo ka kitemo bitogi me timo gin ma Jehovah neno ni rac?’ Ka ipwonyo lutinoni con, ci bikonyogi me gwokke ki i pekki mapol. (Car 27:12; Latit 7:12) Dok ka ipwonyo lutinoni nongo itye ka nyuto mar pi mot man ma Jehovah omiyi-ni.​—Jab 127:3.

NEN VIDIO MA WIYE TYE NI GER OT MA BICUNG MATEK​—GWOK LUTINONI KI I ‘GIN MARAC,’ CI IGAM LAPENY MAGI:

• Pingo jo mukene pe gimito pwonyo lutinogi lok madok i kom tim me buto?

• Pingo lunyodo myero gupwony lutinogi me lubo kit mabeco ma Jehovah pwoyo?​—Ep 6:4

• Jami mene ma dul pa Jehovah miyo me konyo lunyodo wek gupwony lutinogi lok madok i kom tim me buto?​—w19.05 12, bok

• Pingo myero ibed ka lok ki lutinoni kare ducu ma peya gupoto i peko?