Watiyo ki kerowa i yo maber ka waketo yub me medo cawawa i tic pi Jehovah. (1Kor 9:26) Yub me cwiny konyowa me tic ki cawawa i yo maber ma peya agikki me lobo man oo. (Ep 5:15, 16) I cawa me worowu macalo jo me ot, wutwero nyamo yub ma wumito cobone i mwaka me ticwa manyen. Yub me cokkewa me dwe-ni tye ki pwony ma loko i kom yub mapatpat ma wutwero tam iye ki lega pire.—Yak 1:5.

Me labolle, tika wutwero tic kacel macalo jo me ot wek ngat acel i kinwu opong fom me tic macalo painia marii ? Ka itye ki akalakala ka itwero cobo cawani, lok ki painia mo ma kit kwone rom ki megi. (Car 15:22) Gwok nyo wutwero penye i cawa me worowu macalo jo me ot. Ci wuco piny kit ma wubitiyo kwede ki cawawu. Ka onongo con kong itiyo macalo painia, ci nen ka pud dok itwero tic macalo painia i kare-ni.

Tika ngat mo ma gangwu twero tic macalo painia pi tutunu pi dwe acel nyo makato? Ka keroni nok, ci itwero tic macalo painia pi tutunu ka ikwanyo cawa mo manok nino ducu me tito kwena. Ka pe itwero nywako i tic me pwony i dye cabit pien mitte ni icit i dog ticci nyo i cukul, ci itwero yero me tic macalo painia pi tutunu i yweyo nyo i dwe ma tye ki tum cabit abic. Yer dwe ma wumito ni wuti iye macalo painia pi tutunu ci wuco piny kit ma wubicobo kwede ki cawawu.—Car 21:5.

NEN VIDIO MA WIYE TYE NI BED . . . PAINIA MA CWINYE TEK, CI IGAM LAPENY MAN:

• Gin mutimme i kom Lamego Aamand pwonyowa gin ango i kom kit ma Jehovah maro dok gwoko kwede jo ma gijalle me tic macalo painia?