PINGO PIRE TEK: Kwano Lok pa Lubanga konyowa ‘me niang kit ma ada lac kwede, kit ma bor kwede, kit ma odongo kwede malo, ki dok kit ma tut kwede.’ (Ep 3:18) Konyowa wek wabed labongo lok mo dok ma bal mo bene pe i komwa, i lobo man ma opong ki tim marac-ci ki dok ‘wek wamak lok me kwo matek.’ (Pil 2:15, 16) Kwano lok pa Lubanga piwa kenwa miniwa kare me yero buk ma wamito kwanone wan kikomwa. Watwero nongo adwogi maber ki i kwan piwa kenwa nining?

KIT ME TIMMONE:

• Ngol te tyeng mogo ma imaro dok ico coc macego cego i Baibulli ma itiyo kwede me kwan piri keni, itwero tic ki ma i tabulet nyo ma kigoyo i karatac

• Penye kekeni ki lapeny magi ka itye ka kwano Lok pa Lubanga: ‘Anga? Ngo? Awene? Kwene? Pingo? Nining?’

• Nong ngec mapol kun itiyo ki jamiwa me kwedo lok i kom wang Baibul moni nyo nyig lok moni

• Lwod lok i kom gin ma ikwano wek iniang kit ma lok meno gudi kwede

• Ket gin ma ipwonyo i tic i kwoni me nino ducu.​—Luka 6:47, 48

NEN VIDIO MA WIYE TYE NI ‘MAK LOK ME KWO MATEK’​—KI KETO CWINYI I KWAN PIRI KENI, CI IGAM LAPENY MAGI:

• Jo mukene guloko nining i kom kwangi me Baibul?

• Pingo myero wacak kwanwa ki lega?

• Ngo ma twero konyowa me niang ginacoya moni maber?

• Kit coc ango ma itwero coyone i Baibulli?

• Pingo lwodo lok pire tek adada ka itye ka kwano Lok pa Lubanga?

• Gin ango ma myero watim ki gin ma wapwonyo?