GIN MUMIYO PIRE TEK: Ka lutino kwanwa me Baibul giyubbe, ci gitwero niang maber gin ma wapwonyogi dok wigi pe wil iye. Ka gimedde ki niang kun wigi po i kom jami ma gikwano, ci gibimedde ki dongo oyotoyot. Kadi bed dong gunongo batija woko, pud mitte ni guyubbe pi cokke ki tic me pwony wek gumedde ki bedo ma ‘gikiyo piny.’ (Mat 25:13) Pi meno, ngeyo kit me kwan ki dong bedo ki yub maber me kwan bikonyogi pi kwogi kulu. Cakke ki i acakki me kwangi, omyero wakony lutino kwanwa me dongo kit man me yubbe pi kwangi.

KIT ME TIMONE:

• Bed lanen maber. (Rom 2:21) Yubbe pi kwanwu cabit ducu kun itamo pi miti pa latin kwanni. (km 11/15 3) Wek en onen kit ma ingolo kwede te lagam i bukki

• Cuk cwinye me yubbe. Ka dong kwanwu omoko maber, wek en onge ni yubbe obedo but yub me kwano Baibul ma wakwano ki dano-ni, dok ititte adwogi maber ma bino ki iye. Mi bote tam i kom kit ma en twero nongo kwede cawa me yubbe. Lupwonye mogo i kine mukene giweko latin kwangi tiyo ki bukgi ma guyubo maber wek en onen ber pa yubbe. Pwoye ka en oyubbe

• Nyutte kit me yubbe. Ma pud gucako kwangi acaka, lupwonye mogo gitiyo ki kare me kwangi acel mo me pwonyo latin kwangi kit me yubbe