Kwer me Kato me agikki ma Yecu okwero obedo pat adada. Kit ma en onongo dong cok to woko-ni, en oketo yub me kwero cam me Kato kacel ki lukwenane, ki dok me cako kwer mukene ma onongo bitimme mwaka ki mwaka, Cam me Otyeno pa Rwot. Pi meno, en ooro Petero ki Jon ni gucit ka yubo kabedo pi kwer man. (Luka 22:7-13; nen cal ma tye i pot karatac me acel.) Man poyo wiwa pi kit ma pire tek kwede me yubbe maber pi kwer me Nipo me mwaka-ni ma bibedo i nino dwe 27 me Marci. Kacokke mapol dong guketo yub me nongo omego ma bimiyo pwony me Nipo, mugati ki vino ma kibitic kwede, ki dong jami mukene mapol. Kadi bed kit meno, gin ango ma wan ducu ki acel acel myero watim me yubbe pi Nipo?

Yub cwinyi. Kwan dok ilwod lok i kom wang Baibul pi Kwan me Nipo. Itwero nongo yub pi Kwan me Nipo i bukwa me Kwano Ginacoya me Nino Ducu. Itwero nongo ngec mapol madok i kom yub man i Lamed Ngec me B12 i Baibulwa me New World Translation of the Holy Scriptures. (Nen bene Yub me Cokke me Kwowa ki Ticwa me April 2020.) Jo me odi giromo nongo ngec mapol me anyama i worogi macalo jo me ot madok i kom ber pa ginkok ki i Watch Tower Publications Index nyo Buk ma Konyo Lucaden pa Jehovah me Kwedo Lok.

Lwong jo mukene me bino. Tute matek me nywako i yub me lwongo dano pi Nipo. Tam pi jo ma itwero lwongogi, me labolle, jo ma idok cen ka limogi, lutino kwanni me Baibul macon, jo ma ingeyogi, ki dong wadini. Luelda myero gulwong jo ma ticgi okwe woko. Wi myero opo ni ka ngat moni pe bedo i wang ticwu, ci itwero nongo cawa ki kabedo ka ma Kwer me Nipo bibedo iye macok kwede ka icito i jw.org dok idiyo “Nipo” i te LOK MADOK I KOMWA.

Ngo mukene ma watwero timone me yubbe?