Can ma poto atura tye ka timme i kabedo mapol i kare-ni. Ka can ma poto atura otimme, kubbe myero obed tye i kin utmege wek guket yub maber me miyo kony. Pi meno, Lukiko Madit oketo yub wek jang gang kal ducu gubed ki Dipatmen ma Neno Lok Kom Miyo Kony ka Can ma Poto Atura Otimme.

Ka omege ma i dipatmen man guniang ni peko ma poto atura otimme, cutcut gikubbe ki luelda me kacokke ma i kabedo meno me niang kony ma mitte pi lutit kwena ma kunu. Ka jami ma oballe dwong ma lutit kwena me kabedo meno pe gitwero yubone pigi kengi, ci jang gang kal bicimo omege ma gitye ki ngec me cito ka telo yub me miyo kony. Omege magi gitwero penyo kony ki bot lutit kwena mukene ma gujalle, gitwero lego omege ki lumege me miyo jami mogo ma mitte nyo gitwero wilo jami ma mitte ci gipoko bot lutit kwena ma can opoto i komgi.

Tye adwogi mabeco mapol ma bino ka lutit kwena pe giketo yub pigi kengi me miyo kony ka ma can opoto iye atura. Me labolle, pe kinwoyo timo gin ma onongo dong kitimo woko, anywena nywena bedo pe, dok pe kibalo mot ki jami me kom ma utmege gimiyo. 

Omege ma jang gang kal ocimo gitwero moko cente adi ma mitte ki dong wel lutit kwena ma bimitte me miyo kony ka ma can ma poto atura otimme iye. Gitwero bene kubbe ki luloc ma i kabedo meno wek miyo kony ka ma can opoto iye obed yot. Pi meno pe icak coko jami nyo cente ki bot utmege, cwalo kony ka ma can opoto iye nyo cito kunu ka pe kiwacci me timo meno.

Kadi bed kit meno, ka can ma poto atura otimme, nongo wamito miyo kony. (Ibru 13:16) Wamaro utmegiwa adada! Dong ngo ma myero watim? Gin ma pire tek loyo ma watwero timone aye lega pi jo ma can man otimme i komgi nyo omege ma gucito kunu ka miyo kony. Watwero bene miyo mot me cente me tyelo kor ticwa ma kwako wi lobo ducu. I te tela pa Lukiko Madit, jang gang kal aye twero moko ka kwene ma kibitiyo ki cente ma kimiyo-ni me miyo kony iye. Dok ka wamito cito ka miyo kony wan kikomwa, ci watwero pongo fom me Local Design/Construction Volunteer Application (DC-50).

NEN VIDIO MA WIYE TYE NI PII ALUKA MA OTIMME I BRAZIL, CI IGAM LAPENY MAN:

Gin ango ma oyomo cwinyi i kom kit ma Lucaden pa Jehovah gumiyo kwede kony i nge pii aluka ma otimme i Brazil i 2020?