Buk me Baibul Pwonyowa ki Baibul Pwonyo gimito bedo rom aroma. Jami tic magi gitye ki lok ada marom dok kiryeyogi i yo marom. Ento, buk me Baibul Pwonyowa tiyo ki lok mayot dok tito tyen lok me jami i yo ma niange oyotoyot. Kiyubo pi jo ma ginongo ni buk me Baibul Pwonyo tek. Ma ka bedo ki lamed ngec, buk me Baibul Pwonyowa tye ki lok me giko buk man ma tito tyen lok me jami mogo ma tye i iye. Buk man pe tye ki lapeny i acakki me dul moni nyo bok me nyamo lok i agikkine. Ma ka meno, dul acel acel gik ki bute me “wot wiye wiye” ma tito lok ada me Baibul ma tye i dul meno. Calo buk me Baibul Pwonyo, buk me Baibul Pwonyowa bene kiromo miyone i cawa mo keken, kadi bed pe tye i kin ginakwana ma kibitero i dwe meno. Watwero tic ki buk me Baibul Pwonyowa nining ka watye ka kwano Baibul ki dano?

WOT WIYE WIYE: Watwero tic ki buk man i yo ma watiyo kwede ki buk me Baibul Pwonyo, kun wakwano paragraf ci wapenyo lapeny. Ento, go kong ni latin kwanni pe ngeyo leb maber nyo pe ngeyo kwan maber. Ka tye kit meno ci wutwero yero me tic ki bute me “wot wiye wiye” pi kwanwu kun icuko cwiny latin kwan me kwano lok ma tye i dul meno pire kene. Kitwero pwonyo lok ada acel acel i kwan me dakika 15. Kit ma bute me wot wiye wiye pe tye ki ngec ducu ma i dul man, lapwony myero oyubbe maber, kun wiye po i kom miti pa latin kwan. Ka lapwony kwano ki latin kwanne i yo ma jwi-ni, ci kitwero tic ki bute me “wot wiye wiye” me poyo wic i nge kwano dul meno.

LOK ME GIKO BUK MAN: Wi lok ma tye i agikki me buk man kiryeyogi kore ki kore ma lubbe ki kit ma kinyamogi kwede i buk. Lapwony twero yero me nyamo lok me giko buk me Baibul Pwonyowa i kare me kwan nyo pe.