KWOWA MACALO LUKRICITAYO
Jami ma Pigi Tego ma Nonge i Buk ki Brocuwa me Bed ki Kwo Maber Nakanaka!
Tika imaro tic ki vidio kacel ki lapeny ma golo tam ma nonge i buk me Bed ki Kwo Maber Nakanaka!? Bute ma wiye tye ni “Jo Mogo Giwaco Ni,” “Gin me Atima” ki “Tim Kwed” kono? Gin ango mukene ma twero konyi ka itye ka kwano Baibul ki dano?—Mat 28:19, 20.
Pwony ki Vidio: Ka imaro tic ki buk ma kigoyo agoya, ci itwero nongo vidio ki pwony i yo ma yot nining? Ka itye ka tic ki buk ma tye i JW Laibrari, yer bute mo acel ki i kin bute angwen ma tye i buk man. Ki i tere ka ma kiryeyo iye wi lok me pwony ducu ma i bute meno, ibinongo vidio ki jami akwana ducu pi bute meno. (Nen cal me 1.)
Kit me loko “Printed Edition”: Ka itye ka kwano Baibul ki ngat mo kun itiyo ki cim nyo tabulet, i kine mukene twero bedo me kony adada ka itiyo ki “Printed Edition” i cawa me kwanwu. Ka iyabo pwony ma wubikwano, di laton adek ma malo i cingi tung acuc, ci iyer ka ma kicoyo ni “Printed Edition.” Kit ma “Printed Edition” nen kwede bikonyi me tam i kom kit ma gin ma wutye ka nyamone-ni kubbe kwede ki wi lok madit me pwony meno. Me dok cen i digital edition, di dok laton adek ma malo-ni ci iyer “Digital Edition.”
“Tika Atye Atera?”: Bok man nonge i agikki me buk man dok nyuto jami ma pigi tego ma mitte wek ngat moni obed ma opore me tito kwena kacel ki jo me kacokke ki dong me nongo batija. (Nen cal me 2.)
Lok me Giko Buk Man: Bute man gonyo ter lok mogo ma pigi tego ma nonge i pwony mapatpat. Ka itye ka tic ki JW Laibrari, ibinongo ka ma kicoyo ni “Dok cen i pwony me” ma dwoki cen i paragraf me pwony ma onongo itye ka kwanone. (Nen cal me 2.)
Myero inen ni ityeko kwano buk me Bed ki Kwo Maber Nakanaka! ki latin kwanni kadi bed onongo batija ma onongo pud peya wutyeko kwanwu. Pud bene itwero medde ki kwano ngat meno calo latin kwanni kun icoyo cawa ma itero ka kwan kwede i ripotti. Ka icito ki latit kwena lawoti me kwan ki latin kwan meno, latit kwena-ni bene twero medo cawa meno i ripote
