GIN ango ma peke romo kilo 1.4 ento kiwacci obedo “gin mo ma niang iye tek loyo ki i wi lobo”? Meno obedo adam pa dano. Obedo gin me aura mada. Ka wamedde ki niang lok mapol i komme, ci pwocwa pi tic me “aura” pa Jehovah bene bimedde. (Jab. 139:14) Tam kong i kom tic acel keken ki i kin mapol ata ma adamwa timo​—kerowa me tam.

Wan watwero tic ki kerowa me tam nining? Yo acel aye me goyo cal gin mo onyo yub ma watye kwede i wiwa, jami manyen ma keliwa yomcwiny, onyo gin ma pud peya otimme i kommi. Ma lubbe ki lok man, pe iye ni itiyo ki keroni me tam kare ki kare? Me labolle, in tika dong ikwano onyo iwinyo pi kabedo mo ma pud peya io iye? Meno tika ogengi ki goyo cal kabedo meno i wi? Ki lok ada, ka watamo i kom gin mo ma pe watwero nenone, winyone, bilone, gudune nyo ngweyone, ci nongo watye ka tic ki kerowa me tam.

Baibul konyowa me niang ni dano kicweyo i cal pa Lubanga. (Acak. 1:26, 27) Meno mono pe nyuto ni kadi wa Jehovah bene tye ki kero me tam? Kit ma en ocweyowa ki kero-ni, nongo en bene mito ni wati kwede me niang mitine. (Latit. 3:11) Wan watwero tic ki kerowa me tam i yo me ryeko nining, ki dok tic ki kerowa me tam i yo me mingo ango ma myero wagwokke ki iye?

(1) Bedo ka tam i cawa ma pe rwatte nyo i kom gin marac.

Tam i kom gin moni pe rac. Kilok ada, tye jami mapol ma nyuto ni bedo ka tam i kom gin moni twero kelo adwogi maber. Kadi bedi kumeno, Latitlok 3:1 konyowa me niang ni kit macalo ‘gin mo keken tye ki karene-ni,’ watwero timo jami mogo i cawa marac. Me labolle, ka wabedo ka tam i kom gin mapat i cawa ma watye i kacokke onyo ka watye ka kwan piwa kekenwa, tika kerowa me tam bibedo me kony onyo nongo tye ka gengowa me nongo adwogi maber ki i yub meno? Yecu kikome bene ocikowa matek adada pi adwogi marac ma bino ka wabedo ka tam i kom jami marac, calo bedo ka tam i kom miti marac kom. (Mat. 5:28) Jami mogo ma watamo i komgi i cawa mukene twero cwero cwiny Jehovah adada. Bedo ka tam i kom miti marac me kom twero terowa me timo gin ma wabedo ka tam i kome-ni. Mok tammi pe me ye ni kero ni me tam odiri cen ki Jehovah!

(2) Bedo ki tam ni jami me kom mapol biminiwa kuc pi naka.

Jami me kom mitte dok bene tye me kony. Ento, ngene kene ni cwinyi bitur ka icako tam ni jami magi bikeli yomcwiny kacel ki kuc. Solomon ma onongo ngat maryek-ki ocoyo ni: “Lonyo bedo calo gang matek bot lalonyo,  dok macalo cel ma gigero ocudo malo likung me gwoko en [i tamme].” (Car. 18:11) Me labolle, tam kong i kom gin ma otimme i kare ma kot ocwer magwar i Sektemba 2009 ci opongo pacen 80 kulu pa boma me Manila i lobo Philippines. Tika jo ma onongo gitye ki jami me kom mapol gubwot? Lalonyo mo ma orwenyo jamine mapol owaco ni: “Pii man oweko dano ducu gudoko rom, okelo peko ki deno can bot lucan wa ki lulonyo ducu.” Twero bedo yot botwa adada me tamone ni jami me kom twero miniwa gwok ki piny ma opye mot. Kilok ada, jami magi pe twero.

(3) Bedo ka par cawa ducu pi jami ma pe romo timme matwal.

Yecu ominiwa tira ni pe myero wabed ki “par” mapol. (Mat. 6:34) Ka wabedo ka par i cawa ducu bene nongo adamwa tye ka tic. Yot twatwal me balo kero mapol me bedo ka tam i kom peko ma watamo atama ma pud peya otimme nyo gwok bene pe bitimme matwal. Ginacoya nyuto ni par ma kit man twero kelo cwercwiny nyo turcwiny marac adada. (Car. 12:25) Pire tek adada ni walub tira pa Yecu kun pe wabedo ki par mapol twatwal ka nongo wakemme ki peko me nino ducu kit ma tye kwede-ni.

(1) Neno gin marac ma tye ka bino ki dok gwokke ki i iye.

Ginacoya cuko cwinywa me bedo jo ma wigi tiyo dok me tam i kom gin moni con. (Car. 22:3) Waromo tic ki kerowa me tam me neno adwogi ma twero bino ma peya wamoko tam. Me labolle, ka kilwongi i galowang mo, itwero tic ki keroni me tam wek okonyi me moko tam me ryeko nining me neno ka ce pore boti me cito? I nge niang i kom jami mogo calo anga mukene ma kilwongo, wel dano ducu ma gubibedo tye, cawa ki kabedo me galowang meno, tam kong: Gin ango ma twero timme i ka galowang meno? Tika itamo ni galowang meno bibedo maber ma rwatte ki cik ma nonge i Baibul? Tam i kom jami magi bikonyi me goyo i wi kit ma galowang meno twero bedo kwede. Tic ki keroni me tam-mi me moko tam me ryeko bikonyi me gwokke ki i gin mo keken ma twero gudi i yo marac.

(2) Poro ki i wi kit ma itwero cobo kwede ki peko.

Tam i kom gin moni bene kwako “kerowa me cobo peko moni ki lweny kwede.” Ket kong ni niang manok obedo tye i kin in ki lamego nyo omego mo i kacokke. I bicito bote nining wek icobo peko meno? Tye jami mapol ma myero kong i tam iye. Ngat meno mono loko nining? Cawa mene ma opore loyo me lok bote i kom  peko meno? Nyig lok ki dwan mene ma myero ati kwede? Ka itamo i kom jami magi, itwero poro ki i wi yo mapat pat kit ma itwero cobo kwede ki peko man ci dong iyero ma ineno ni twero tic maber loyo ma nongo ngat meno romo jolone. (Car. 15:28) Bedo ka tam i kom kit ma itwero cito kwede bot omeru nyo lameru me cobo peko meno twero konyi me kelo kuc i kacokke. Man obedo tic ki kerowa me tam i yo maber.

(3) Dongo dironi me kwan piri keni ki me kwano Baibul.

Kwano Baibul nino ducu pire tek adada. Ento, tye gin mukene ma mitte mapat ki kwano ngo ma kicoyo i pot karatac. Mitte ni waniang pwony ma romo konyowa ki i Baibul kun bene wabedo ki miti me ketone i tic. Kwanwa me Baibul myero okonywa me dongo pwocwa pi Jehovah. Tic ki kerowa me tam twero konyowa me tic ki jami ma wakwano ki i Baibul me dongo pwocwa. I yo ma nining? Tam kong i kom buk me Lub Lanengi me Niye. Kwano lok ma kicoyo i buk man twero weko watiyo ki kerowa me tam pien konyowa me goyo i wiwa cal pa gin ma gitye ka lok i iye-ni. Buk man konyowa me neno gin ma gitye ka titone-ni, winyo jami ma tye ka timme, ngweyo ngwec piny-nye ki dong niang kit ma jo ma gitye ka lok i komgi-ni guwinyo kwede. Man konyowa me niang i kom pwony mabeco kacel ki tam me cuko cwiny ma nonge i lok meno ma wakwano ki i Baibul-li kadi bed ni gwok nyo onongo watamo ni dong wangeyo lokke maber. Tic ki kerowa me tam i yo man i kare ma nongo watye ka kwano Baibul piwa kenwa bikonyowa me dongo dirowa me kwan.

(4) Winyo arem pa jo mukene.

Kit macalo Jehovah gin ki Yecu bene giwinyo aremwa-ni, wan bene myero walub lanengi. (Nia 3:7; Jab. 72:13) Watwero timo man nining? Yo acel ma pire tek loyo aye me tic ki kerowa me tam. Romo bedo ni gin ma tye ka timme i kom omego nyo lamego mo pud peya otimme i komwa. Ento pud itwero penye kekeni ni: ‘Ka onongo gin meno tye ka timme i koma kono, onongo abiwinyo nining? Ngo ma onongo amito ni kitim bota?’ Tic ki kerowa me tam-mi me gamo lapeny magi bikonyowa me winyo arem nyo peko pa jo mukene. Ki lok ada, wabinongo adwogi maber i yo me kwowa ducu macalo Lukricitayo ka wanyuto ni waparo dok wawinyo arem pa jo mukene, man bene kwako i ticwa me pwony kacel ki wat i kinwa ki Lukricitayo luwotwa.

(5) Goyo i wi kit ma kwo bibedo kwede i lobo manyen.

Ginacoya tittiwa i yo matut adada kit ma kwo bibedo kwede i lobo manyen ma Lubanga ociko pire-ni. (Ic. 35:5-7; 65:21-25; Yabo 21:3, 4) Bukkewa bene nyuto kit ma kwo man bibedo kwede kun tiyo ki cal ma kigoyo maleng adada. Pingo? Cal medo kerowa me tam dok konyowa me goyo calwa ma watye ka kwo i lobo man ma kiciko pire-ni. Jehovah, Ngat ma ocweyo dano kun minigi mic me bedo ki kero me tam-mi, ngeyo maber loyo ngat mo keken teko pa mic man. Tic kwede me tam i kom cikke ma mege bikonyowa me bedo labongo akalakala mo keken pi cobbe pa cikke magi, dok bene bikonyowa me gwoko gennewa, kadi bed ni wakato ki i kwo matek i kareni.

Ki mar madit, Jehovah ominiwa kero man me tam. Man twero konyowa adada me tic pire maber i kwowa me nino ducu. Wanyut wunu pwoc bot Lami mic man maber tutwal-li kun watiyo kwede i yo me ryeko nino ducu.