1, 2. Pingo lunyodo mukene gibedo ki par ka lutinogi gimito dyero kwogi bot Jehovah ki nongo batija?

LUTINO kwan me Baibul alip mapol gidyero kwogi bot Jehovah dok ginongo batija. Polgi gubedo jo matino ma gudongo i ada ci guyero me kwo i yo maber ma pud dong loyo. (Jabuli 1:1-3) Ka in lanyodo ma Lakricitayo, ci ngene kene ni ibedo ki miti madit me kuro nino ma wodi nyo nyari binongo iye batija.​—Por ki 3 Jon 4.

² Ento pud itwero bedo ki par. Gwok nyo ineno jo matino mogo gunongo batija ento lacen gucako bedo ki akalakala ka ce kwo ma lubbe ki cik pa Lubanga obedo gin maber pigi. Jo mogo i kingi bene gua woko ki i ada. Pi meno, itwero bedo ki par ni latinni bicako tic pi Jehovah ento lacen mar ma en onongo tye kwede pi ada bikwe woko. Latinni twero bedo calo Lukricitayo mogo me Epeco i cencwari me acel. Yecu oloko i komgi ni: ‘Wuweko mar ma  onongo yam wutye kwede mukwongo ca-ni woko.’ (Niyabo 2:4) Itwero konyo latinni nining me gwoko marre wek obed matek ki dok wek ‘odong nio i larre’? (1 Petero 2:2) Watwero nongo pwony ki i labol pa Temceo.

3. (a) Temceo odoko Lakricitayo nining, dok gin ango ma en otimo ki gin ma en opwonyo? (b) Kit yo me pwonye adek mene ma Paulo oloko iye bot Temceo?

³ Lakwena Paulo olimo Licitra pi tyen mukwongo i mwaka 47. Twero bedo ni meno aye kare ma Temceo ma gwok nyo onongo tye ki mwaka apar ki wiye opwonyo kwede ki lok madok i kom Yecu. Temceo oketo i tic gin ma en opwonyo dok i nge mwaki aryo, en ocako wot kacel ki Paulo. I nge mwaki 16, Paulo ocoyo bot Temceo ni: “Myero imedde i gin ma ipwonyo, ki ma dong iye adada, kun ingeyo jo ma yam gupwonyi iye. Ingeyo bene ni, cakke i tinoni ingeyo coc maleng [Cik Macon] ma yam gicoyo ma twero pwonyi i yo me larre pi ye Kricito Yecu.” (2 Temceo 3:14, 15) Paulo owaco ni Temceo (1) onongo ngeyo coc maleng, (2) onongo ye i kom gin ma en opwonyo, dok (3) opwonye wek ebed ryek i yo me larre pi ye Yecu Kricito.

4. Gin ango ma in dong itiyo kwede me pwonyo lutinoni? (Nen cal ma tye i pot karatac 15.)

⁴ Macalo lanyodo ma Lakricitayo, imito ni latinni onge coc maleng, ma i kare-ni dong kwako Cik Macon wa ki Cik Manyen. Kadi wa lutino matino bene gitwero pwonyo lok i kom jo ma kiloko i komgi i Baibul kacel ki jami ma gutimme ma kicoyo i Baibul. Dul pa Jehovah omiyo bot lunyodo buke, brocuwa, ki dong vidio mapol ma gitwero tic kwede me konyo lutinogi. Mene ma nonge i leb ma megi? Mitte ni latinni onge lok ma tye i Baibul wek odong wat matek ki Jehovah.

5. (a) Nyig lok ni ‘oye’ niange ningo? (b) Wangeyo nining ni Temceo onongo ye i kom kwena maber madok i kom Yecu?

⁵ Pwonyo lutino ki lok madok i kom jo ma kicoyo lok komgi i Baibul kacel ki jami mutimme ma kicoyo i Baibul keken pe romo. Wi myero opo ni Temceo ‘oye’ i kom gin ma en opwonyo. Lok ma Paulo owaco-ni i leb Grik niange ni “bedo labongo akalakala i kom gin mo” nyo “niang ki dok moko ni gin moni tye ada.” Temceo onongo ngeyo lok ma kicoyo i Cik Macon ‘cakke i tinone,’ nyo ni, ma onongo en pud latin matidi. I ngeye, en oye ni Yecu aye Meciya. Niye pa Temceo onongo tek adada ma oweko en onongo batija ci ocako tic kacel ki Paulo macalo lamiconari.

6. Itwero konyo lutinoni nining wek gujing niyegi i kom Lok pa Lubanga?

 ⁶ Itwero konyo lutinoni nining me dongo niyegi calo Temceo, wek gin bene ‘guye’ i kom gin ma gupwonyo? Me acel, dicwinyi. Tero kare wek ngat moni odong niye matek. Dok pe tye ni ka in itye ki niye i kom gin moni ci lutinoni bene wang ma guye iye. Latin acel acel myero opwonye me “poko gin maber ki gin marac.” (Kwan Jo Ibru 5:14.) Macalo lanyodo, itwero timo jami mapol me konyo lutinoni wek gujing niyegi, tutwalle ka gupenyi ki lapeny. Kong dong wanen gin ma watwero pwonyone ki i labol pa wego mo acel.

7, 8. (a) Wego mo odiyo cwinye nining i pwonyo nyare? (b) I kare mene ma onongo mitte ni idi cwinyi i pwonyo latinni?

⁷ Thomas, wego mo ma nyare tye ki mwaka 11, owaco ni nyare i cawa mukene penye ki lapeny calo: Tika twero bedo ni Jehovah aye ma oyubo ayuba ni kwo ocakke pire kene i lobo? nyo ni “Pingo wan pe waribbe ki jo mukene me labolle i bolo kwir, i tute wek lobo obed kabedo maber?” I kine mukene mitte ni en ogwokke ki wacce gin ma myero en oye iye. Thomas ngeyo ni gin ma weko ngat moni ye ada pe obedo pwony me ada acel keken, ento jami matinotino mapol ma moko ni meno ada.

⁸ Thomas bene ngeyo ni myero edi cwinye ka etye ka pwonyo nyare. Ki lok ada, Lukricitayo ducu myero gudi cwinygi. (Jo Kolocai 3:12) Thomas oniang ni bitero kare ki dok ni myero elok bot nyare tyen mapol wek ekonye me dongo niye matek. Mitte ni gunyam lok ma lubbe ki gin ma en pwonyo ki i Baibul. Thomas owaco ni: “An wan ki dakona wamito niang ka nyarwa niang dok ye i kom gin ma en tye ka pwonyone ki ka gudo cwinye, tutwalle pwony ma pigi tego. Ka en tye ki lapeny, ci ber. Ki lok ada, abedo ki par ka en oye gin moni labongo penyo lapeny.”

9. Itwero konyo lutinoni me dongo niye i kom Lok pa Lubanga nining?

⁹ Ka lunyodo gidiyo cwinygi ka gitye ka pwonyo lutinogi, ci lutinogi gibiniang kit ma niyegi ‘bor kwede, ki kit ma odongo kwede malo, dok kit ma tut kwede.’ (Jo Epeco 3:18) Watwero pwonyogi ma lubbe ki mwakagi kacel ki kerogi me niang. Ka niyegi i kom gin ma gupwonyo woto ki dongo, ci bibedo yot botgi me tito pi niyegi bot jo mukene, kadi wa lutino kwan luwotgi. (1 Petero 3:15) Me labolle, tika lutinoni gitwero tic ki Baibul me tito gin ango ma timme i komwa ka wato? Tika gin bene giye i kom gin ma Baibul waco? * (Nen lok ma tye i tere piny.) Wi opo ni myero idi  cwinyi wek ikony lutinoni me dongo niye i kom Lok pa Lubanga, yele man bikelo adwogi maber.​—Nwoyo Cik 6:6, 7.

10. Gin ango ma pire tek i pwonyo lutinoni?

¹⁰ Ki lok ada, lanenni bene pire tek adada me konyo lutinoni wek gudong niyegi. Stephanie, mego mo ma tye ki anyira adek owaco ni: “Nicakke i kare ma lutinona pud gitino, abedo ka penye kekena ni, ‘Tika atito bot lutinona tyen lok muweko an aye ni Jehovah tye ada, ni en marowa, ki dok ni cikke tye atir?’ Tika lutinona gitwero nenone ka maleng ni an amaro Jehovah ki cwinya ducu?’ Pe myero agen ni lutinona gibiye ada ka an pe aye.”

11, 12. Ryeko kwako gin ango, dok wangeyo nining ni man pe jenge i kom mwaka pa ngat moni?

¹¹ Wapwonyo ni Temceo (1) onongo tye ki ngec madok i kom Ginacoya dok (2) onongo omoko ni niyene tye ada. Ento gin ango ma Paulo onongo tye ka wacone i kare ma owaco ni coc maleng onongo twero ‘pwonyo Temceo wek obed ryek i yo me larre’?

¹² Insight on the Scriptures, Volume 2, tito ni ki i Baibul, ryeko kwako bedo ki “ngec kacel ki niango me cobo pekki, gwokke ki i wano, cobo yubwa, nyo me miyo tam bot jo mukene wek gutim kit meno bene. Obedo olungtuke me mingo.” Baibul waco ni “mingo aye gin ma tye i cwiny latin matidi.” (Carolok 22:15) Kit macalo ryeko obedo olungtuke me mingo, man nyuto ni ryeko obedo gin ma nyuto ni ngat moni oteggi. Ngat moni doko ngat muteggi i yo me cwiny pien nongo lworo Jehovah dok mito lubo cikke, ento pe pi mwakane madit.​—Kwan Jabuli 111:10.

13. Jo matino gitwero nyutone nining ni giryek i yo me larre?

¹³ Jo matino ma guteggi i yo me cwiny mitigi kacel ki dic ma a ki bot jo mukene pe “wirogi dwokogi tungngi ki tungngi.” (Jo Epeco 4:14) Ma ka meno, ‘gipwonye me poko gin maber ki gin marac.’ (Jo Ibru 5:14) Pi meno, gimoko tam me ryeko kadi bed lunyodogi nyo jo madongo mukene gipe ka nenogi. (Jo Pilipi 2:12) Ryeko ma kit meno mitte wek ngat moni onong larre. (Kwan Carolok 24:14.) Itwero konyo lutinoni nining wek gudong kit ryeko meno? Myero iwek lutinoni gunge gin ma pire tek loyo boti. Myero gunen ki i lokki kacel ki ticci ni itye ka tute me kwo ma lubbe ki cik me Baibul.​—Jo Roma 2:21-23.

14, 15. (a) Gin ango ma myero ngat matidi ma mito nongo batija otam iye? (b) Itwero konyo lutinoni nining me tam i kom mot ma twero bino ka gulubo cik pa Lubanga?

¹⁴ Ento me konyo lutinoni wek gudong niyegi, pe myero iwaccigi gin  maber ki marac keken. Myero ikonygi me niang maber i kom lapeny calo: ‘Pingo Baibul kwero jami mogo ma nen calo ber? Atwero bedo labongo akalakala nining ni cik me Baibul ber pira kare ducu?’​—Icaya 48:17, 18.

¹⁵ Ka latinni mito nongo batija, konye me tam matut i kom tic ma bino i nge nongo batija. En mono winyo nining i kom tic magi? Adwogi mabeco ango ma en binongo? Pekki ango ma en bikemme kwede? Pingo adwogi mabeco dwong loyo pekki ma twero bino? (Marako 10:29, 30) Pire tek adada me tam matut i kom lapeny magi ma peya gunongo batija. Kony latinni me tam i kom mot ma bino ka obedo lawiny ki adwogi marac ma bino ka pe obedo lawiny. Man weko en twero ye ni lubo cik me Baibul ber pire kare ducu.​—Nwoyo Cik 30:19, 20.

16. Ngo ma lunyodo myero gutim ka niye pa latingi ma dong onongo batija ocako kwe woko?

¹⁶ Gin ango ma itwero timone ka latinni ocako bedo ki akalakala i kom ada i nge nongo batija? Me labolle, wodi nyo nyari twero cako bedo ki miti pi jami me lobo. Nyo latinni twero cako  bedo ki akalakala ka lubo cik me Baibul aye obedo yo me kwo maber loyo. (Jabuli 73:1-3, 12, 13) Kit ma ibidok iye botgi twero gudo ka ce gibimedde ki tic pi Jehovah nyo pe. Temme pe me daa i wi latinni, kadi bed en pud tidi nyo dong tye mwaka apar ki wiye. Ma ka meno, wek en onge ni imarre dok imito konye.

17, 18. Lunyodo gitwero konyo jo matino ma gitye ki akalakala nining?

¹⁷ Ngat matidi ma onongo batija nongo odyero kwone bot Jehovah. Man obedo cikke me marre ki dok tic pire ki cwinye ducu. (Kwan Marako 12:30.) Jehovah neno dyere calo gin ma pire tek adada, dok wan bene myero wanen kit meno. (Latitlok 5:4, 5) Po wi latinni i kom meno. Ento mukwongo, myero kong ikwan buke ma dul pa Jehovah omiyo bot Lunyodo. I ngeye, nyut bot latinni ki dwan mamwol dok i cawa mupore ni tam ma en omoko me dyero kwone bot Jehovah ki nongo batija onongo pire tek adada dok bikele mot mapol.

¹⁸ Me labolle, itwero nongo tam mabeco i lamed ngec “Questions Parents Ask,” i buk me Questions Young People Ask​—Answers That Work, Volume 1. Lamed ngec man miyo tam bot lunyodo ni pe myero gurune me mokone ni latingi me mwaka apar ki wiye dong okwero ada woko, ento myero guyeny ngo ma tye ka nyweno wiye. Romo bedo dic ma a ki bot luwote nyo pien winyo calo etye kene. Gwok nyo en neno calo jo matino mukene gitye ka tic matek loye i tic pi Jehovah. Lamed ngec meno bene tito ni jami magi i kine mukene pe nyuto ni latinni pe ye i kom niyeni. Pol kare en winyo kit meno pien nongo tye ka wok ki pekki mukene. Dok bene miyo tam mogo i kom kit ma lanyodo twero konyo latin ma tye ki akalakala pi ada.

19. Lunyodo gitwero konyo lutinogi nining ‘me pwonye wek gubed ryek i yo me larre’?

¹⁹ Macalo lanyodo, itye ki tic ma pire tek adada ki mot me ‘pwonyo ki dok nyebo lutinoni ki kit mabeco ma Jehovah pwoyo.’ (Jo Epeco 6:4) Kit ma wapwonyo kwede, man nyuto ni myero ipwony lutinoni ki gin ma Baibul waco dok ikonygi me bedo ki niye i kom gin ma gipwonyo. Ka gitye ki niye matek, ci man bicuko cwinygi me dyero kwogi bot Jehovah ki dok me tic pire ki cwinygi ducu. Walego ni Lok pa Lubanga, cwiny mere maleng, ki dong tuteni okony lutinoni ‘me pwonye wek gubed ryek i yo me larre.’