1-2. Jadok onongo obedo anga? (1 Tekwaro 12:​22, 26-28)

 GO KONG ni lwak co makato 340,000 gucokke kacel. Gugure me keto Daudi me bedo kabaka ma loyo Icrael. Pi nino adek, co magi gucokke i kabedo ma obedo godi godi macok ki Kebron. Gubedo ka boko lok, gunyero, dok guwero wer me pako Jehovah. (1 Tekwaro 12:39) I kin lwak co magi ducu, onongo tye iye awobi mo ma nyinge Jadok. Twero bedo ni jo mapol pe guketo cwinygi i kome. Ento Jehovah onene dok onongo mito ni wan bene wange ni Jadok obedo tye kunnu. (Kwan 1 Tekwaro 12:​22, 26-28.) Jadok onongo obedo anga?

² Jadok onongo obedo lalamdog ma otiyo kacel ki Lalamdog Madit Abiatar. Lubanga bene onongo omiyo ki Jadok ryeko madwong kacel ki kero me niang Mitine. (2 Cam. 15:27) Dano onongo gipenyo tam ki bot Jadok ka gimito kony. En bene onongo obedo laco ma cwinye tek. I pwony man, wabinyamo kit ma Jadok onyuto kwede tekcwiny.

3. (a) Pingo mitte ni luwor Jehovah gubed ma cwinygi tek? (b) Gin ango ma wabinyamo i pwony man?

³ I kare man me agikki-ni, Catan tye ka tute matek ma loyo kare mo keken me balo watwa ki Jehovah. (1 Pet. 5:8) Pi meno, mitte ni wabed ma cwinywa tek ka wawoto ki kuro Jehovah me tyeko Catan kacel ki lobone marac-ci. (Jab. 31:24) Kong dong wanyamu yo adek ma watwero nyuto kwede tekcwiny calo Jadok.

MI CWAK KI KER PA LUBANGA

4. Pingo mitte ni jo pa Jehovah gubed ki tekcwiny me cwako Ker pa Lubanga? (Nen bene cal.)

⁴ Macalo jo pa Jehovah, wacwako Ker pa Lubanga ki cwinywa ducu, ento pol kare mitte ni wabed ki tekcwiny me timo meno. (Mat. 6:33) Me labolle, i lobo man marac-ci, mitte ni wabed ki tekcwiny me kwo ma lubbe ki rwom me kit  ma atir pa Jehovah ki me tito kwena maber-ri. (1 Tec. 2:2) Medo i kom meno, lobo-ni opokke adada pi lok me wibye. Dong, wamito tekcwiny wek wabed ma pe wacwako tung ka mo keken ka odok i lok magi. (Jon 18:36) Luwor Jehovah mapol gitye ka kato ki i peko me can lim, kigoyogi, nyo kitweyogi i buc pien pe gicwako lok me wibye nyo giye donyo i mony.

5. Pingo onongo Jadok mito tekcwiny me cwako Daudi?

⁵ Jadok pe ocito i Kebron mere pi kwero keto Daudi i wi komker keken. En ocito ki jami lwenye dok onongo tye atera me lweny. (1 Tekwaro 12:38) En onongo tye atera me lubo kor Daudi wa i dog lweny kacel ki gwoko lobo Icrael ki bot lumonegi. Twero bedo ni Jadok onongo pe ki diro me lweny tutwal calo lamony kikome. Ento en onongo cwinye tek adada.

6. Daudi oweko lanen maber me tekcwiny pi Jadok nining? (Jabuli 138:3)

⁶ Lalamdog calo Jadok opwonnye nining me bedo ki tekcwiny? En onongo ngeyo co mapol ma twoni oteka lweny ma cwinygi tek. Labongo akalakala mo, en onongo adwogi maber ki i lanengi. Me labolle, lanen pa Daudi me ‘telo wi jo Icrael ka gicito ka lweny’ otugo cwiny jo Icrael ducu me kette macalo kabaka. (1 Tekwaro 11:​1, 2) Daudi kare ducu obedo ka jenge i kom Jehovah pi kony me loyo lumonene. (Jab. 28:7; kwan Jabuli 138:3.) Jadok bene onongo pwony ki bot co ma gukwo i karene, calo Yekoyada ki wode Benaya ma twon oteka lweny, kacel ki ludito wi mony 22 mukene ma gumiyo cwak ki Daudi. (1 Tekwaro 11:​22-25; 12:​26-28) Co magi ducu onongo gumoko tamgi me keto Daudi macalo kabakagi ki me gwokke.

7. (a) Labol me tekcwiny ango ma watwero nongo pwony ki i iye i kare-ni? (b) Pwony ango ma inongo ki i gin mutimme i kom Omego Nsilu, kit ma kinyuto kwede i vidio-ni?

⁷ Wanongo kero kacel ki tekcwiny ka watamo i kom labol pa jo ma gumiyo cwakgi  bot Jehovah ki Kerre. Kabakawa Yecu Kricito okwero lajwac nywene ki lok me wibye me lobo pa Catan i kare ma en onongo tye i lobo. (Mat. 4:​8-11; Jon 6:​14, 15) En kare ducu onongo jenge i kom Jehovah me miyo bote tekcwiny ma mitte me timo gin ma atir. I kare-ni bene, watye ki lanen pa bulu mapol ma gukwero donyo i mony nyo nywako i tim me wibye. Pingo pe ikwan jami mutimme i komgi ki i jw.org? a

KONY UTMEGINI

8. Awene ma mitte ni luelda gubed ki tekcwiny me konyo utmege?

⁸ Jo pa Jehovah gimaro konyo luwotgi adada. (2 Kor. 8:4) Ento i kare mogo, gimito tekcwiny wek gutim meno. Me labolle, ka lweny ocakke, luelda gingeyo ni omege ki lumege gimito cuko cwiny, kony, Baibul ki bukkewa, kacel ki jami me kom. Luelda gimaro omege ki lumege adada. Meno aye tyen lok mumiyo giketo kwogi ka mading me miyo jami ma mitte pi utmege. (Jon 15:​12, 13) Ka gutimo man, nongo gitye ka lubo lanen me tekcwiny pa Jadok.

9. Kit ma kitito kwede i 2 Camuel 15:​27-29, gin ango ma Daudi owaco ni Jadok otim? (Nen bene cal.)

⁹ Nen kong kit ma Jadok okonyo kwede utmegine i kare ma kwogi onongo tye ka mading. Abcalom wod pa Daudi onongo omoko tamme me neko Daudi woko wek en aye edok kabaka. (2 Cam. 15:​12, 13) Onongo mitte ni Daudi oma kome woko ki i Jerucalem cutcut! En owaco bot luticce ducu ni: “Wutugi a wek waringu woko. Ka pe wurune wacito woko oyoto, ci dano mo pe bibwot ki i cing Abcalom!” (2 Cam. 15:14) I kare ma lutic pa Daudi gitye ka a woko, en oniang ni mitte ni ngat mo odong cen i Jerucalem wek oniang pulan pa Abcalom. Pi meno, Daudi ocwalo Jadok kacel ki lulamdog mukene cen i boma man wek guti  macalo lukwal mung ma gicwalo lok bot Daudi. (Kwan 2 Camuel 15:​27-29.) Onongo mitte ni gubed ma gigwokke adada. Tic ma Daudi omiyo ki lulamdog magi onongo keto kwogi ka mading. Abcalom onongo obedo ngat mager, pe paro pi jo mukene, dok odwalo tyen wonne kikome. Go kong gin ma Abcalom onongo bitimone i kom Jadok ki lulamdog mukene-ni ka onongo en oniang ni gitye ka kwalo munge me gwoko Daudi!

10. I yo ma nining ma Jadok kacel ki luwote gukonyo me gwoko kwo pa Daudi?

¹⁰ Daudi olego Jadok kacel ki lareme mukene ma lagen ma nyinge Kucai me konye me cobo pulanne. (2 Cam. 15:​32-37) Onongo mitte ni Kucai opor odenge ni etye larem Abcalom ci omi bote tam i kom kit me loyo Daudi, dok meno onongo bimiyo ki Daudi kare me yubbe pi lweny. I kare ma Abcalom oye tam pa Kucai, Kucai otito ki Jadok kacel ki Abiatar gin mutimme. (2 Cam. 17:​8-16) Ci co aryo magi guyenyo yo me cwalo lok bot Daudi madok i kom pulan pa Abcalom. (2 Cam. 17:17) Ki kony pa Jehovah, Jadok kacel ki lulamdog luwote gukonyo me gwoko kwo pa Daudi.—2 Cam. 17:​21, 22.

11. Watwero lubo lanen me tekcwiny pa Jadok nining ka watye ka konyo utmegiwa?

¹¹ Waromo nyuto tekcwiny calo Jadok nining ka kwo pa utmegiwa tye ka mading ci kipenyowa ni wacit ka konyogi? (1) Lub tira. I kare ma piny rac, pire tek adada ni wabed luwiny wek wabed ma wanote. Lub tira ma inongo ki bot jang gang kal me lobowu. (Ibru 13:17) Luelda myero kare ki kare gukwan tira ma kimiyo i kom kit me yubbe pi can ma poto atura kacel ki gin me atima i ngeye. (1 Kor. 14:​33, 40) (2) Bed ki tekcwiny ento nyut ryeko. (Car. 22:3) Ti ki wii. Gwokke i yo ducu ma itwero. (3) Jenge i kom Jehovah. Wi myero opo ni Jehovah mito ni in kacel ki utmegini wubed  maber. En twero konyi me miyo kony bot utmegini kun gwoko kwowu.

12-13. Pwony ango ma inongo ki i lanen pa Viktor ki Vitalii? (Nen bene cal.)

¹² Tam kong i kom luelda aryo, Viktor ki Vitalii, ma gubedo ka tic kacel me tero cam ki pii bot luye luwotgi i lobo Ukraine. Viktor owaco ni, “Wabedo ka yenyo cam ki ka mo keken. Pol kare onongo wawinyo ka kitye ka bayo ricac macok kwedwa. Omego mo acel omiyo cam ki i ot gwoko cam ma mege. Mot me cam man oweko lutit kwena mapol gubedo ki cam ma mitte pi kare mo. I kare ma onongo watye ka cano jami i mutokawa, bom opoto i kabedo ma romo mita 20 (futi 66) ki botwa. Pi nino meno ducu, abedo ka bako doga bot Jehovah me mina tekcwiny me medde ki konyo lutit kwena.”

¹³ Vitalii owaco ni, “Onongo wamito tekcwiny madwong adada. Wotta mukwongo me tero cam otero cawa 12. Alego bot Jehovah nio wang ma ao.” Vitalii obedo ki tekcwiny, ento en bene obedo ka gwokke. En omedo ni: “Abedo ka lego Jehovah pi ryeko kacel ki mwolo. Abedo ka dwoyo mutoka i gudi ma luloc gumoko ni dano guti kwede keken. Niyena ojing matek i kare ma aneno kit ma omege ki lumege gitiyo kwede kacel. Gukwanyo jami mogo ma bom ocelo woko ki i gudi. Gucoko cam, bongi ki jami mukene ma mitte pi utmege ci gucano i mutoka, dok gumiyo bot wan ki Viktor cam ki kabedo ma watwero yweyo iye ka wamedde ki wotwa.”

MEDDE KI BEDO LAGEN BOT JEHOVAH

14. Watwero winyo nining ka ngat mo ma wamaro okwero tic pi Jehovah woko?

¹⁴ Gin acel ma romo turo cwinywa matek adada aye ka watwa nyo laremwa mo macok okwero tic pi Jehovah woko. (Jab. 78:40; Car. 24:10) Ka onongo yam wamaro ngat-ti matek, ci kanyo peko man bedo bene matek adada. Ka ce ikato ki gin malit kit meno, ci lanen pa Jadok me bedo lagen twero mini teko.

15. Pingo onongo Jadok mito tekcwiny me medde ki bedo lagen bot Jehovah? (1 Luker 1:​5-8)

¹⁵ Jadok omedde ki bedo lagen bot Jehovah kadi wa i kare ma lareme macok Abiatar oyero me turo genene bot Jehovah. Man otimme i agikki me loc pa Daudi. I kare ma Daudi onongo dong otii woko dok cok to, wode Adoniya ongwette me bedo kabaka kadi bed Jehovah onongo mito ni Solomon aye odok kabaka. (1 Tekwaro 22:​9, 10) Abiatar oyero me cwako Adoniya. (Kwan 1 Luker 1:​5-8.) I kare ma en otimo meno, Abiatar pe oturo genene bot Daudi keken, ento bene bot Jehovah! Go kong kit ma gin mutimme man romo bedo ni oturo kwede cwiny Jadok. Pi mwaki makato 40, en ki Abiatar onongo gutiyo kacel macalo lulamdog. (2 Cam. 8:17) Onongo “gutingo canduk pa Lubanga” kacel. (2 Cam. 15:29) I acakkine, co aryo-ni ducu gucwako yub me keto Daudi macalo kabakagi dok gutimo tic mukene mapol pi Jehovah.—2 Cam. 19:​11-14.

16. Gin ango ma twero bedo ni okonyo Jadok me medde ki bedo lagen?

¹⁶ Kadi bed Abiatar oturo genene bot Jehovah ki yero me dwalo tyen Daudi, Jadok omedde ki bedo lagen bot Jehovah. Daudi onongo ngeyo ni etwero geno Jadok kare ducu. I kare ma kingeyo pi pulan pa Adoniya, Daudi oyero Jadok, Natan, ki Benaya me wiro Solomon macalo kabaka. (1 Luker 1:​32-34) Bedo kacel ki luwor Jehovah ma lugen, calo Natan kacel ki jo mukene ma gicwako Kabaka Daudi, nen calo ocuko cwiny Jadok matek. (1 Luker 1:​38, 39) I kare ma Solomon odoko kabaka, en “oketo  Jadok me bedo ajwaka [lalamdog] pa Lubanga ma ka Abiatar.”—1 Luker 2:35.

17. Itwero lubo lanen pa Jadok nining ka ngat mo ma imaro okwero bedo lagen bot Jehovah?

¹⁷ Itwero lubo lanen pa Jadok nining? Ka ngat mo ma imaro oyero me weko Jehovah woko, nyut ki Jehovah ni in ibimedde ki bedo lagen bote. (Yoc. 24:15) Jehovah bimiyo boti kero kacel ki tekcwiny me timo gin ma atir. Jenge i kome i lega kun imedde ki bedo cok ki luremi ma gin lugen bote. Jehovah tero geneni calo gin ma pire tek dok en bimini mot pi bedo lagen.—2 Cam. 22:26.

18. Pwony ango ma inongo ki i gin mutimme i kom Marco ki Sidse?

¹⁸ Nen kong labol pa Omego Marco ki dakone, Sidse, ma anyiragi aryo ducu gua woko ki i ada. Marco owaco ni: “Nicakke i nino ma inywalo lutinoni, imarogi matek adada. Nongo itye atera me timo gin mo keken me gwokogi ki i awano. Dong ka guyero me weko Jehovah, turo cwinyi ma pe wacce.” En omedde ni: “Ento Jehovah obedo ka konyowa me ciro arem man. En oweko twerre botwa me cuko cwinywa kekenwa. Ka cwinya otur, nongo dakona tye matek dok kweyo cwinya, dok ka en cwinye otur, an nongo atye matek dok akonye.” Dakone omedde ni: “Onongo pe wabitwero kanyo arem man kono onongo Jehovah pe omiyo botwa teko ma mitte. Onongo cwinya otur adada dok abedo ka kok i koma kekena ni man obedo balla, ci atito ki Jehovah kit ma awinyo kwede. I nge kare mo manok, lamego mo ma onongo dong arii pi mwaki mapol ma pe aneno obino bota, okwaka, oneno wanga, ci owacca ni: ‘Sidse, wi opo ni, man pe obedo balli!’ Ki kony pa Jehovah, amedde ki bedo ki yomcwiny i ticce.”

19. Gin ango ma imoko tammi me timone?

¹⁹ Jehovah mito ni jo ducu ma giwore gubed ma cwinygi tek calo Jadok. (2 Tem. 1:7) Ento, En pe mito ni wajenge i kom tekowa. En mito ni wajenge i kome. Dong, ka inongo ni ikemme ki gin mo ma mito tekcwiny, leg bot Jehovah. Itwero bedo ki gen ni en bimiyo ibedo ki tekcwiny calo Jadok!—1 Pet. 5:10.