PWONY ME ANYAMA ME 29
WER 121 Jukke Ken Mitte Botwa
Medde ki Gwokke ki i Atematema
“Wuki wuleg Lubanga, wek pe wudony i abita mo.” —MAT. 26:41.
GIN MA WABIPWONYO
Pwony man bipoyo wiwa ni omyero watim gin ducu ma watwero me gwokke ki i timo bal. Bipoyo wiwa bene ni omyero wagwokke ki timo jami ma twero terowa i bal madit.
1-2. (a) Yecu ociko lupwonnyene ningo? (b) Pingo lupwonnye pa Yecu guringo woko? (Nen bene cal.)
“CWINY kikome mito loyo abita pa Catan, ento kom aye nyap.” a (Mat. 26:41b) Ki lok meno, Yecu onyuto ni en niang ni watye ki roc dok wabitimo bal. Ento lokke meno bene tye me cikowa: Omyero wagwokke ki bedo ki gen mukato kare woko i komwa kekenwa. Con i otyeno meno kikome, lupwonnye pa Yecu onongo gucikke ni pe gibiweko Laditgi matwal. (Mat. 26:35) Onongo gimito timo gin ma atir. Ento, pe guniang ni ka jami odoko tek, onongo gitwero rwenyo tekcwiny me timo gin ma atir ci gitimo gin marac. Pi meno, Yecu ocikogi ni: “Wuki wuleg Lubanga, wek pe wudony i abita mo.”—Mat. 26:41a.
2 Ki cwercwiny, lupwonnye pa Yecu pe gumedde ki kiyo piny. I kare ma kimako Yecu, tika gumoko matek i kome nyo mono lworo omakogi ci guringo woko? Kit macalo pe gubedo ka kiyo piny, lupwonnyene gutimo gin ma guwaco ni pe gibitimo kikome—guringo guweko Yecu woko.—Mat. 26:56.
Yecu ociko lulub kore ni gubed ka kiyo piny kun gigwokke ki i atematema, ento guringo guweke woko (Nen paragraf 1-2)
3. (a) Me medde ki bedo lugen bot Jehovah, pingo omyero wagwokke ki bedo ki gen mukato kare woko i komwa kekenwa? (b) Gin ango ma wabinyamo i pwony man?
3 Pe omyero watam ni kare ducu wabibedo ki teko me timo gin ma atir. Tye ada gire ni, wamoko tamwa pe me timo gin mo ma cwero cwiny Jehovah. Kadi bed kit meno, watye ki roc dok yot adada botwa me timo gin marac. (Rom. 5:12; 7:21-23) Watwero nongo ni wapoto i abita me timo bal atura. Wek wamedde ki bedo lugen bot Jehovah ki Wode, mitte ni walub tira pa Yecu me medde ki cung matek i kom abita me timo bal. Pwony man bikonyowa me timo meno. Mukwongo, wabinyamo kabedo mene ma omyero wagwokke iye. I nge meno, wabinyamo kit me gwokke ki i abita. Me agikki, wabinyamo kit me medde ki kiyo piny.
NGE GORONI
4-5. Pingo pire tek me gwokke kadi ki timo bal matino tino?
4 Kadiwa bal mogo ma ginen calo gitino gitwero weko watwa ki Jehovah bedo magoro. Medo i kom meno, gitwero terowa i timo bal madongo.
5 Wan ducu wakemme ki abita me timo bal. Ento wan ducu watye ki goro mapatpat, pi meno tye jami mogo ma ywayo mitiwa matek ma loyo mukene. Me labolle, ngat moni romo bedo ka lweny ki miti me timo bal madit, calo donyo i tim tarwang. Ngat mukene romo bedo ni tye ka lweny ki abita me timo jami macilo, calo cobo mitine me mit kekene nyo neno cal macilo. Mukene doki, twero bedo ka lweny ki lworo ma en tye kwede i kom dano, awaka, nyo akemo malyet, nyo gin mukene. Kit ma Yakobo otito kwede, ‘dano acel acel gire mitine kene aye ma bite, ywaye, kun omo cwinye.’—Yak. 1:14.
6. Gin ango ma omyero pe wabwolle kekenwa iye?
6 Tika ingeyo kabedo mene i kwoni ma in igoro iye loyo? Rac adada me cayo gorowa nyo me tamo ni watek adada ma pe watwero timo bal. (1 Jon 1:8) Wi opo ni, Paulo owaco ni kadi wa ‘jo ma gitye ki cwiny pa Lubanga’ gitwero poto i abita ka pe gugwokke. (Gal. 6:1) Omyero pe wabwolle kekenwa dok waye gorowa.—2 Kor. 13:5.
7. Pingo pire tek adada ni wange gorowa? Mi labol.
7 Ka dong watyeko niang kabedo ma wagoro iye loyo, gin ango ma omyero watim? Omyero wati matek me loyo atematema meno! Me labolle, i kare me Baibul, kabedo ma onongo goro loyo i boma mo keken onongo obedo dog celle. Meno aye tyen lok mumiyo lukurpiny mapol onongo gibedo i dog cel me gwoko boma. I yo acel-lu, pire tek adada ni wange gorowa wek wabed atera me cung matek i kom abita.—1 Kor. 9:27.
KIT ME GWOKKE KI I ATEMATEMA
8-9. I yo ma nining ma awobi ma kiloko i kome i Carolok cura 7 onongo twero gwokke kwede ki i timo bal madit? (Carolok 7:8, 9, 13, 14, 21)
8 Watwero gwokke nining ki i atematema? Nen kong pwony ma watwero nongone ki i gin mutimme i kom awobi ma kiloko i kome i Carolok cura 7. En otimo tim tarwang ki dako mo ma lakwele. Tyeng me 22 tittiwa ni awobi-ni olubo kor dako meno “cutcut [nyo atura].” Ento kit ma tyeng ma wiati onyuto kwede, en onongo omoko tam mukene maraco ma motmot oweko obedo yot bote me timo bal.
9 Gin ango ma awobi-ni otimo ma peya en opoto i bal madit? Mukwongo, i otyeno meno, en “obedo ka wot ki i yo kun kato ki i twok ot pa dako ma lakwele” meno. I ngeye, en olubo yo ma cito i ot pa dako meno atir. (Kwan Carolok 7:8, 9.) Ki dong, i kare ma en oneno dako-ni, en pe olokke odok cen. Me ka meno, en oye ni dako-ni odot lemme dok obedo ka winyo lok pa dako-ni ka titte kit ma etyeko tyero kwede gitum, gwok nyo ki miti me weko awobi-ni tamo ni en pe ebedo dano marac. (Kwan Carolok 7:13, 14, 21.) Ka onongo awobi man pe omoko tam maraco magi ducu, kono onongo en ogwokke ki i atematema kacel ki bal ma en otimo.
10. I kare-ni, ngat moni romo timo bal marom ki pa awobi-ni nining?
10 Lok pa Solomon i kom awobi-ni nyuto gin ma twero timme i kom lawor Jehovah mo keken. En twero timo bal madit kun lacen waco ni jami ducu otimme “atura.” Nyo en twero waco ni, “Apo anongo ni dong otimme woko.” Ento, ka en otamo matut i kom gin mutimme, en biniang ni onongo emoko tam maraco mogo ma otere i timo bal madit man. Twero bedo ni en oyero lurem ma pe gimaro Jehovah. Nyo gwok galowang, kabedo me Intanet, nyo kabedo ma en maro cito iye onongo pe opore pi Lakricitayo. Oromo bedo ni en onongo dong ojuko lega, kwano Baibul, cito i cokke, nyo nywako i tic me pwony. Calo awobi ma kiloko i kome i Carolok, nongo balle pe otimme atura.
11. Wek pe wapot i bal, gin ango ma omyero wagwokke ki timone?
11 Pwony ango ma wanongo? Pe omyero wagwokke ki timo bal keken, ento bene jami mogo ma twero terowa i timo bal meno. Man aye gin ma Solomon otito kikome i nge tito gin mutimme i kom awobi ma laming ki dako ma lakwele-ni. En oloko i kom dako-ni kun tito ni: ‘Pe ingak ilub kore.’ (Car. 7:25) Dok en owaco ni: ‘Pe icit bot dako ma lakwele-ni, pe icit cok ki doggolane.’ (Car. 5:3, 8) Me gwokke ki timo bal, omyero wagwokke ki jami kacel ki kabedo mogo ma terowa i bal. b Man te lokke ni kadi bed jami nyo kabedo moni pe rac pi Lukricitayo, watwero gwokke ki timo gin meno nyo cito i kabedo meno ka wangeyo ni biketowa i atematema me timo bal.—Mat. 5:29, 30.
12. Tam ango ma Yubu omoko, dok meno onongo bikonye nining me gwokke ki i atematema? (Yubu 31:1)
12 Me gwokke ki jami ma romo terowa i bal, mitte ni wamok tamwa con. Meno aye gin ma Yubu otimo. En owaco ni: “Atyeko cikke con, wan ki wanga.” En otimo man wek pe enen mon mukene ki miti me mit. (Kwan Yubu 31:1.) Moko matek me lubo cikkene meno onongo bigwokke ki i timo abor. Wan bene watwero moko tamwa me gwokke ki gin mo keken ma twero terowa i atematema.
13. Pingo omyero wagwok tamwa? (Nen bene cal.)
13 Mitte bene ni wagwok tamwa. (Nia 20:17) Jo mogo gitamo ni pe rac me bedo ka goyo i wigi ni gitye ka timo gin marac ka teke pe gutimo bal meno. Ento kodi tam meno rac adada. Ngat ma bedo ka lwodo gin marac bidongo mitine me timo bal meno. Ka en bedo ka timo man, weko doko tek bote me ciro atematema me timo bal meno. Ngene kene ni, i kare mogo, tam maraco wang ma ongolle i wiwa. Ka meno otimme, gin ma pire tek aye me kwero tam meno cutcut kun waleyo kakare ki tam mabeco. Ka watimo meno, wagwokke ki i timo bal madit, pien nongo pe waye ni tam marac odong odok miti marac.—Pil. 4:8; Kol. 3:2; Yak. 1:13-15.
Mitte ni wagwokke ki i gin mo keken ma twero terowa i bal (Nen paragraf 13)
14. Gin ango mukene ma twero konyowa me gwokke ki i atematema?
14 Gin ango mukene ma watwero timo me gwokke ki i atematema? Mitte ni waye ki cwinywa ducu ni lubo cik pa Jehovah kare ducu keliwa adwogi maber. I kare mogo, pe romo bedo yot botwa me bedo ki tam kacel ki miti ma yomo cwiny Jehovah. Ento ka watute matek me timo meno, wabibedo ki yomcwiny me ada.
15. Pingo dongo miti matek me timo gin ma atir konyowa me gwokke ki i atematema?
15 Mitte ni wadong miti ma tye atir. Ka wapwonnye me ‘kwero gin marac, ki maro gin maber,’ ci wabijingo mitiwa me timo gin ma atir kun wagwokke ki jami mogo ma twero terowa i bal. (Amoc 5:15) Ka watye ki miti ma atir, wabibedo ki kero me cung matek ka warwatte ki atematema mo ma obino atura nyo ma pe watwero gengone.
16. I yo ma nining ma lungo wiwa i timo jami me cwiny konyowa me bedo ma wagwokke? (Nen bene cal.)
16 Watwero dongo miti ma atir nining? Watimo man ka walungo wiwa i timo jami ma jingo watwa ki Jehovah. Ka watye i cokke nyo i tic me pwony, nongo watye ka dongo mitiwa me yomo cwiny Jehovah, dok pe wabedo i atematema me timo bal. (Mat. 28:19, 20; Ibru 10:24, 25) Ka wakwano Lok pa Lubanga kun walwodo, wajingo marwa pi gin ma atir kun wakwero gin marac. (Yoc. 1:8; Jab. 1:2, 3; 119:97, 101) Wi opo ni Yecu owaco bot lupwonnyene ni: “Wuleg Lubanga, wek pe wudony i abita mo.” (Mat. 26:41) Ka walego bot Wonwa me polo, wamiyo bote kare me konyowa dok wajingo mitiwa me yomo cwinye.—Yak. 4:8.
Timo jami ma nyikowa cok ki Jehovah kare ducu konyowa me kwero atematema (Nen paragraf 16) c
MEDDE KI GWOKKE
17. Goro mene ma Petero obedo ka lweny kwede?
17 Watwero loyo gorowa mogo kwicikwici. Ento twero mitte ni wamedde ki lweny ki gorowa mukene pi kare me kwowa ducu. Tam kong gin mutimme i kom lakwena Petero. Pi bedo ki lworo i kom dano, en okwero Yecu tyen adek. (Mat. 26:69-75) Lacen, onongo twero nen calo Petero oloyo goro meno woko, pien en otito kwena i kom Yecu ki tekcwiny i nyim Lukiko. (Tic 5:27-29) Ento, i nge mwaki mogo, “pi lworo dul pa jo ma mito ni jo muye myero kong kilirgi,” en ojuko cam kacel ki Lukricitayo ma gubedo Lurok. (Gal. 2:11, 12) Goro pa Petero onongo odwogo cen. Twero bedo ni en onongo pe oloyo goro meno kwicikwici.
18. Gin ango ma omyero wange ka odok i kom goro mogo?
18 Calo Petero, i kare mogo twero mitte ni walweny matek ki goro mo ma onongo watamo ni dong watyeko loyone. Me labolle, omego mo oye ni: “Ajuko neno cal macilo pi mwaka apar dok onongo atye ki gen matek ni dong aloyo goro man woko. Ento gorona man onongo tye calo lee mager ma okanne woko kun kuro kare maber me lweny i koma.” Ki pwoc madit, ominwa man omedde ki lweny matek ki gorone. En oniang ni mitte adada ni etim gin mo nino ducu me lweny ki gorone ka teke pud ekwo i lobo man marac-ci. En tye ka medde ki tute matek me gwokke ki neno cal macilo, dok dakone kacel ki luelda gikonye matek.
19. Gin ango ma watwero timone ka watye ki goro mo ma peya waloyo?
19 Gin ango ma watwero timone wek goro mo ma peya waloyo pe oterwa i bal? Myero watim gin ma Yecu ocikowa me timone: ‘Wubed ma wukiyo piny,’ nyo ni wagwokke ki i atematema. Kadi wa i kare ma iwinyo calo itye matek, medde ki gwokke ki jami ma twero weko ipoto i bal. (1 Kor. 10:12) Medde ki timo jami ma okonyi me lweny ki goro meno. Carolok 28:14 waco ni: ‘Dano ma lworo Jehovah kare ducu tye ki yomcwiny.’—2 Pet. 3:14.
MOT MA WANONGO KA WABEDO MA WAKIYO PINY
20-21. (a) Mot ango ma wabinongo ka wamedde ki gwokke ki i atematema? (b) Ka watute matek me kwero atematema, gin ango ma Jehovah bitimo piwa? (2 Jo Korint 4:7)
20 Watwero bedo ki gen ni gwokke ki i atematema kare ducu ber piwa. Ka watimo bal, watwero nongo ‘yomcwiny ma ri pi kare manok mo keken,’ ento ka wakwo ma lubbe ki rwom pa Jehovah, wabibedo ki yomcwiny madwong makato. (Ibru 11:25; Jab. 19:8) Tye kit meno pien kiyubowa me kwo ma lubbe ki rwom pa Jehovah. (Acak. 1:27) Ka wakwo i yo ma yomo cwiny Jehovah, wabedo ma cwinywa pe pidowa dok i anyim wabibedo ki kwo ma pe tum.—1 Tem. 6:12; 2 Tem. 1:3; Juda 20, 21.
21 Tye ada gire ni, “kom aye nyap.” Ento meno pe tyen lokke ni pe dong watwero timo gin mo keken me lweny ki gorowa. Jehovah tye atera me miniwa teko ma wamito. (Kwan 2 Jo Korint 4:7.) Ento, myero wange ni, Lubanga miyo tek madwong me twero. Mukwongo, myero kong wati ki tekowa me lweny i kom atematema. Ka watimo me ka megwa, ci watwero bedo ki gen ni Jehovah bigamo legawa ka walege pi tek madwong i kare ma mitte. (1 Kor. 10:13) Ada, ki kony pa Jehovah, watwero medde ki gwokke ki i atematema.
WER 47 Leg Bot Jehovah Nino Ducu
a LOK MA KITITO TERE: “Cwiny” ma kiloko pire i Matayo 26:41 obedo mitiwa me timo gin ma atir. I kare ma Yecu owaco ni “kom” en onongo tye ka nyuto ni kit macalo wabedo jo ma tye ki roc, pol kare watamo dok watimo jami maraco. Dong i kare mogo kadi bed wamito timo gin ma atir, ka pe wagwokke, mitiwa maraco twero bwoyowa ci watimo bal.
b Ngat ma otimo bal madit twero nongo kony i buk me Bed ki Kwo Maber Nakanaka!, pwony me 57 wi lok matino me 1-3, ki dok i pwony ma wiye tye ni “Myero Inen Anyim Atir” ma tye i Wi Lubele me Novemba 2020, pot 27-29, para. 12-17.
c LOK I KOM CAL: Omego mo tye ka kwano ginacoya me nino ducu i odiko, lacen okwano Baibul i cawa me cam me dyeceng, dok ocito i cokke me dye cabit i otyeno.
