1. Gin ango ma kititiwa i cokkewa ma bedo kicel mwaka ki mwaka me mwaka 2023?

 I COKKEWA ma bedo kicel mwaka ki mwaka me mwaka 2023, a wanongo niango manyen mamwonya adada madok i kom niyewa dok kimiyo lok angeyo me yomcwiny madok i kom ticwa me pwony. Me labolle, wapwonyo ni jo mogo pud gibibedo ki kare me ribbe ki Lucaden pa Jehovah kadi wa i nge jwero Babilon Madit. Kimiyo lok angeya bene ni, cakke i Novemba 2023, pe bimitte ni lutit kwena me Ker-ri gumi ripot ma nyuto jami ducu ma gutimo i tic me pwony. Tika alokaloka magi bimiyo ticwa me pwony doko gin ma pire pe tek? Pe tye kit meno!

2. Pingo ticwa me tito kwena pire tye ka doko tek nino ki nino? (Marako 13:10)

² Ticwa me tito kwena pire tye ka doko tek nino ki nino. Pingo? Pien agikki me lobo man dong onyiko cok adada. Nen kong gin ma Yecu otito madok i kom ticwa me tito kwena i kare me agikki-ni. (Kwan Marako 13:10.) Ma lubbe ki lok ma nonge i buk pa Matayo, Yecu otito ni kwena maber-ri kibitito i wi lobo ducu ma nongo “agikki piny” peya obino. (Mat. 24:14) Agikki piny ma Yecu oloko pire-ni obedo agikki me lobo man marac-ci. Jehovah dong otyeko keto ‘nino ki cawa’ pi jami macok cok-ki bitimme. (Mat. 24:36;  25:13; Tic 1:7) Piny ma ruu nino ducu, nyikowa cok ki nino meno. (Rom. 13:11) Pi meno, omyero wamedde ameda ki tito kwena nio wang ma agikki oo.

3. Gin ango ma tugo cwinywa me tito kwena?

³ Nen kong lapeny ma pire tek ma wan ducu omyero watam iye: Pingo watito kwena maber-ri? Watito kwena pi mar. Ka watito kwena, wanyuto marwa pi kwena maber-ri, marwa pi luwotwa, ki dong ma pire tek loyo marwa pi Jehovah kacel ki nyinge. Kong dong wanenu lok magi ki acel acel.

WATITO KWENA PIEN WAMARO KWENA MABER-RI

4. Wadok iye nining ka wanongo kwena mo me yomcwiny?

⁴ Tam kong kit ma iwinyo kwede i kare ma inongo kwena mo me yomcwiny adada. Twero bedo ni ngat mo i pacowu onywalo latin, nyo inongo tic mo ma onongo itye ka mitone adada. Labongo akalakala mo ibedo ki yomcwiny adada me nywako kwena man ki jo me pacowu kacel ki luremi. Tika gin ma cal ki man otimme i kare ma iwinyo kwena ma pud dong ber loyo—ma en aye kwena me Ker pa Lubanga?

5. Iwinyo nining tyen mukwongo ma ipwonyo lok ada me Baibul? (Nen bene cal.)

⁵ Tam kong kit ma iwinyo kwede i kare ma pud ipwonyo lok ada nyen. Ipwonyo ni Woru me polo mari matek, dok ni en mito ni ibed i kin jo me ode ma giwore, ni en ocikke me giko arem ki pekki, ni itwero bedo ki gen me neno joni me amara ma kibicerogi i lobo manyen—kacel ki jami mukene mapol. (Mar. 10:​29, 30; Jon 5:​28, 29; Rom. 8:​38, 39; Yabo 21:​3, 4) Lok ada magi oyomo cwinyi adada. (Luka 24:32) Imaro gin ma ipwonyo dok onongo pe itwero ling alinga ki lok ada magi mamwonya tutwal-li!—Por ki Jeremia 20:9.

6. Gin ango ma ipwonyo ki i gin mutimme i kom Ernest ki Rose?

⁶ Nen kong gin mutimme i kom omego mo.  Ernest b onongo tye ki mwaka apar i kare ma wonne oto. Ernest owaco ni: “Abedo ka penye kekena ni: ‘Tika en ocito i polo? Nyo en dong pe matwal ka mo keken?’ Abedo ka tamone ni ka onongo wora pud kwo calo pa lutino mukene-ni, kono onongo ber mada.” Kare ki kare, Ernest onongo cito i limu, ci rumo conge piny i nyim lyel pa wonne dok lego ni: “Ai Lubanga, amito ngeyo ka ma babana tye iye.” I nge mwaki 17 ma wonne oto kwede, Lucaden gucako kwano Baibul ki Ernest. Cwinye obedo yom adada me pwonyo ni jo muto pe gingeyo gin mo, kit ma ngat ma onino woko pe ngeyo gin mo, dok ni Baibul ociko ni nicer bibedo tye i anyim. (Latit. 9:​5, 10; Tic 24:15) I agikkine, en onongo lagam pi lapeny ma obedo ka nyweno wiye pi kare malac! Cwiny Ernest obedo yom adada pi lok ada ma en opwonyo. Dakone Rose, bene ocako kwano Baibul dok omaro jami ma onongo tye ka pwonyone. I mwaka 1978, gin aryo ducu gunongo batija. Ki mit kom madwong, gin gutito kwena maber-ri bot wadigi, luremgi, kacel ki jo mukene. Macalo adwogine, Ernest ki Rose gukonyo dano makato 70 kulu me ngeyo Jehovah ki nongo batija.

7. Gin ango ma timme ka wacako maro jami ma watye ka pwonyo ki i Baibul? (Luka 6:45)

⁷ Ka wamaro jami ma wapwonyo ki i Baibul, ci wabedo ki miti me titone bot jo mukene. (Kwan Luka 6:45.) Wawinyo kit ma lupwonnye pa Yecu me cencwari me acel guwinyo kwede i kare ma guwaco ni: “Pe watwero weko tito pi gin ma yam waneno ki ma wawinyo.” (Tic 4:20) Wamaro kwena maber-ri adada ma oweko wabedo ki miti me titone bot jo mapol kit ma watwero.

WATITO KWENA PIEN WAMARO DANO

8. Gin ango ma tugo cwinywa me tito kwena maber-ri bot dano? (Nen bok ma wiye tye ni “ Mar Dano—Konygi me Doko Lupwonnye.”) (Nen bene cal.)

⁸ Calo Jehovah ki Wode, wan bene wamaro dano. (Car. 8:31; Jon 3:16) Kica makowa i kom jo ma ‘Lubangagi pe’ dok gitye “labongo gen mo.” (Ep. 2:12) Gitye ki pekki mapol adada, dok watye ki lagam me pekkigi—ma en aye kwena me Ker pa Lubanga. Mar kacel ki kica ma watye kwede pi jo magi tugo cwinywa me tute matek me o botgi ki kwena maber me Ker-ri. Kwena man mamwonya-ni twero minigi gen, romo konyogi me bedo ki kwo maber loyo i kare-ni, dok miyo botgi mot me “kwo ma en aye kwo kikome”—kwo ma pe tum—i Paradic.—1 Tem. 6:19.

9. Kwena me ciko dano ango ma watye ka titone, dok pingo? (Ejekiel 33:​7, 8)

 ⁹ Marwa pi dano bene tugo cwinywa me cikogi ni agikki me lobo man marac-ci dong onyiko cok adada. (Kwan Ejekiel 33:​7, 8.) Kica makowa i kom jiraniwa kacel ki lupacowa ma gipe i ada. Jo mapol gikwo labongo ngeyo gin ma tye ka bino—ma en aye ‘twon can madit atika ma bitimme, ma yam peya onen i lobo, nia wa i acakki lobo nio kwede wa onyoo, dok pe bene binen.’ (Mat. 24:21) Wamito ni gunge gin ma bitimme i kare meno me ngolo kop—kibijwero dini goba, dok i ngeye i kare me lweny me Armagedon, kibijwero lobo pa Catan man marac-ci woko. (Yabo 16:​14, 16; 17:​16, 17; 19:​11, 19, 20) Walego ni jo mapol gujol kwenawa dok gumok tamgi me tic pi Jehovah kacel kwedwa i kare-ni. Ento ngo ma bitimme i kom jo ma pe gibiye jolo lokwa i kare-ni, kadi wa wadiwa?

10. Pingo pire tek me medde ki ciko dano i kom gin ma bitimme cokcok-ki?

¹⁰ Kit ma kitito kwede i pwony ma okato-ni, Jehovah nen calo bilaro jo ma gibicako keto niye i kome ka guneno kicako jwero Babilon Madit. Ka tye kit meno, ci pire tek makato me bedo ka cikogi i kare-ni. Nen kong lok ada man: Jami ma watitigi i kare-ni, wigi twero po iye i kare meno. (Por ki Ejekiel 33:33.) Gwok nyo wigi bipo i kom jami ma guwinyo ki botwa ci bitugo cwinygi me ribbe kwedwa i woro me ada ma kare pud tye. Kit ma otimme kwede i kom lalo mabuc ma i boma me Pilipi ma cwinye olokke i nge neno ka “lobo ocako yenge matek,” gwok nyo jo mogo ma pe gujolo kwenawa i kare-ni, cwinygi bilokke i nge neno ka kicako jwero Babilon Madit atura.—Tic 16:​25-34.

WATITO KWENA PIEN WAMARO JEHOVAH KACEL KI NYINGE

11. I yo ma nining ma wamiyo ki Jehovah deyo, woro, ki tekowa? (Niyabo 4:11) (Nen bene cal.)

¹¹ Tyen lok ma pire tek loyo mumiyo watito kwena maber-ri aye ni wamaro Lubangawa Jehovah ki nyinge maleng. Waneno ticwa me pwony calo yo maber loyo me pako Lubangawa. (Kwan Niyabo 4:11.) Waye ki cwinywa ducu ni Jehovah myero me nongo deyo ki woro ki teko ki bot luticce ma lugen. Wamine deyo ki woro ka wanywako ki jo mukene lok ma moko ni Lubanga aye ‘oketo jami ducu’ dok ni watye kwo pien en aye ocweyowa. Watiyo bene ki cawawa, kerowa, kacel ki jami me kom ma watye kwede me nywako i tic me pwony kit ma watwero. (Mat. 6:33; Luka 13:24; Kol. 3:23) I  yo macek, waromo waco ni wamaro lok i kom Lubangawa. Wawinyo ni pire tek bene ni omyero watit ki jo mukene lok i kom nying Lubanga kacel ki tyen lokke. Pingo?

12. Watwero lonyo nying Jehovah i ticwa me pwony nining?

¹² Marwa pi Jehovah tugo cwinywa me lonyo nyinge. (Mat. 6:9) Watye ki miti me tito bot jo mukene ni lok ma Catan owaco i kom Jehovah pe tye ada. (Acak. 3:​1-5; Yubu 2:4; Jon 8:44) Ka watye ka tito kwena, wabedo ki miti madwong me tito ki jo ducu ma ye winyo lokwa, ngat ma Jehovah obedo. Wamito ni jo ducu gunge ni kite ma pire tek loyo aye mar, yo me locce tye atir, dok ni Kerre bijwayo pekki kun kelo kuc ki yomcwiny bot dano ducu ma i wi lobo. (Jab. 37:​10, 11, 29; 1 Jon 4:8) Ka watito bot dano jami magi, ci nongo watye ka lonyo nyinge. Cwinywa bene bedo yom pien nongo watye ka timo gin ma omyero watim macalo Lucaden pa Jehovah. Pingo wawaco kit meno?

13. Pingo obedo deyo madit tutwal me bedo Lucaden pa Jehovah? (Icaya 43:​10-12)

¹³ Jehovah oyerowa me bedo ‘Lucadenne.’ (Kwan Icaya 43:​10-12.) Mwaki mogo angec, waraga mo ma oa ki bot Lukiko Madit otito ni: “Deyo ma pud dong dit loyo ma ngat moni twero bedo kwede aye bedo ki nying ni Lacaden pa Jehovah.” c Pingo tye kit man? Nen kong lapor man. Go kong ni, kimoro adot i komi ni itimo gin marac. Pi meno dong, imito ni ngat mo ocung macalo cadenni me tito ki jo mukene ni adot ma kimoro i komi-ni, obedo goba dok ni ibedo ngat maber ma pe iromo timo gin ma kit meno. Anga ma in ibiyerone? Ngene kene ni ibiyero ngat mo ma ingeyo, igeno, dok tye ki  nying maber ma weko jo mukene gibiye lokke. I kare ma Jehovah oyerowa me bedo Lucadenne, en onyuto ni engeyowa maber, dok ni egenowa me miyo caden ni ebedo Lubanga me ada. Wawinyo ni obedo deyo madit me bedo Lucaden pa Jehovah ma oweko watiyo ki kare mo keken me miyo nyinge ngene kacel ki nyuto ni lok ma Catan owaco pe tye ada. Ka watimo meno, ci wamoko gin ma nyingwa cung pire: Wan Lucaden pa Jehovah!—Jab. 83:18; Rom. 10:​13-15.

WABIMEDDE KI TITO KWENA NIO WA I AGIKKI

14. Jami ango ma watye ka kuro nenone ki yomcwiny?

¹⁴ Cwinywa yom adada me neno jami ma bitimme macok cok-ki i anyim! Ki kony pa Jehovah, watye ki gen me neno ka jo mapol giribbe kwedwa ma nongo twon can madit atika-ni peya ocakke. Medo i kom meno, watye ki yomcwiny ni pud bitwere kadi wa i kare me twon can madit atika-ni ki jo mapol me a woko ki tung bot Catan me ribbe kwedwa ka woro Jehovah!—Tic 13:48.

15-16. Gin ango ma wabimedde ki timone, dok nio wa awene?

¹⁵ Ka wawoto ki kuro kare meno, watye ki tic ma pire tek adada me atima i kare-ni. Watye ki mot me nywako i tic ma pe dok kibinwoyone—ma en aye tic me tito kwena me Ker-ri i wi lobo ducu. Ka wawoto ki timo meno, omyero wamedde ki ciko dano i kom gin ma cokcok-ki bitimme. Dano myero gunge ni agikki me lobo pa Catan-ni tye ka bino oyotoyot adada. Ka dong kare me ngolo kop oo, gibingeyo ni kwena ma wabedo ka tito botgi-ni oa ki bot Lubanga Jehovah.—Ejek. 38:23.

¹⁶ Gin ango ma omyero dong wamoku tamwa me timone? Omyero wawek marwa pi kwena maber-ri, marwa pi dano, ki dong ma pire tek loyo, marwa pi Jehovah kacel ki nyinge otug cwinywa me tito kwena. Wabimedde ki tito kwena ki mit kom madwong nio wang ma Jehovah owaco ni, “Dong oromo!”