Pingo pe kiye ni ngat mo oket bukke ki jami mukene pa Lucaden pa Jehovah i kabedo me Intanet mukene?

Jo mukene gitamo ni kit ma pe wacato bukkewa-ni, giromo kobo nyo keto jami magi i kabedo me Intanet mukene nyo i ka nywako lok mo keken labongo nongo twero. Ento tim man twero kelo peko pien man pe rwatte ki cik me Lok ma Kwako Tic Kwede * (nen lok ma tye i tere piny) ma i kabedowa me Intanet. Lok ma Kwako Tic Kwede wacciwa ni pe kiye ni ngat mo keken myero ‘oket cal agoya, bukke ma pe kigoyo, alama, wer, cal amaka, vidio, nyo pwony ma i bukkewa i kabedo me Intanet mapat ki megwa (kabedo mo keken me Intanet, ka nywako jami, ka nywako vidio, nyo ka nywako lok).’ Pingo cik magi mitte?

Jami ducu ma i kabedowa me Intanet tye ki twero (Copyrighted), dok man nyuto ni cik aye ma gwoko. Man pire tek pien konyo weko jo mukene pe gitiyo kwede i yo marac. Jo mungak kacel ki jo mukene ma gimito balo ticwa i kine mogo giketo bukkewa i kabedogi me Intanet wek oywa tam pa Lucaden pa Jehovah ki jo mukene. Ento i kabedogi magi, giketo bene jami ma kelo akalakala i tam pa dano. (Jabuli 26:4; Carolok 22:5) Jo mukene gutiyo ki alama me jw.org i kwena me cato willgi, i apps me cim ki tabulet, kacel ki i kom jami ma gicato. Kit macalo jamiwa kacel ki alamawa kigwoko i te cik, nyuto ni watwero terogi i kot wek kijukgi ki timo meno. (Carolok 27:12) Ento ka waye ni jo mukene nyo kadi wa omege guket bukkewa i kabedo me Intanet mapat nyo guti ki alama me jw.org me cato jami, ci man weko kot kwero cwakowa woko.

Ka wakwanyo bukkewa ki i kabedo me Intanet mo keken mapat ki jw.org, ci twero kelo peko. Jehovah miyowa cam me cwiny kun tiyo ki “lagwok ot ma lagen dok maryek” keken. (Matayo 24:45) “Lagwok ot” tiyo ki kabedowa me Intanet magi me poko cam me cwiny​—www.pr418.com, tv.pr418.com, ki wol.pr418.com. Dok bene watye ki jami tic adek keken ma watiyo kwede pi cim nyo tabulet​—JW Language^®, JW Library^®, ki JW Library Sign Language^® I kabedowa me Intanet magi pe ibinongo kiketo iye kwena me cato wil nyo gin mo keken me lobo pa Catan. Ento ka wakwanyo bukkewa ki i kabedo me Intanet mapat, man romo keliwa peko pien twero bedo ni nongo kilokogi woko i yo mo.​—Jabuli 18:26; 19:8.

Ki bene, ka waketo jamiwa i Intanet ka ma dano gitwero miyo iye tamgi, man twero weko jo mungak ki jo mukene giloko marac i kom dul pa Jehovah. Man weko omege mogo gilaro lok ki jo magi, dok kelo lewic i nying Jehovah. Nyamo lok man ma kitimo ki i Intanet-ti pe obedo yo mupore me tiro tam pa dano ki me konye wek oniang lok ada. (1 Temceo 6:3-5; 2 Temceo 2:23-25) Dok bene jo mukene giyubo kabedo me Intanet nyo ka nywako lok ma weko ginen calo gua ki i dul pa Jehovah nyo gitye lumemba me Lukiko Madit. Ento gin weng lugoba. Pe tye lamemba mo keken me Lukiko Madit ma tye ki kabedone me Intanet nyo ka nywako lokke pire kene.

Ka wanyuto bot dano kabedowa me Intanet me jw.org, nongo watye ka cwako tic me tito “kwena maber.” (Matayo 24:14) Kabedowa me Intanet kacel ki apps kitye ka yubone doko ber kare ki kare. Dong wamito ni dano ducu gunong berre. Pi meno, pe kikwero ni wacwal ki dano bukkewa ki link me kabedowa me Intanet. Ka watimo meno nongo watye ka nyuto ki dano yo acel keken ma Jehovah tiyo kwede me miyo cam me cwiny, ma en aye “lagwok ot ma lagen dok maryek.”