1. Ngo ma nyuto ni Jehovah cinge yot?

I KARE mo, Jehovah onongo tye kene labongo cwec mo. Lacen en omoko tamme me cweyo cwec ma giryek i polo ki i lobo. Jehovah, “Lubanga ma layomcwiny” maro miyo jami mabeco. (1 Temceo 1:11, NW; Yakobo 1:17) Jehovah pwonyowa me bedo jo ma cinggi yot pien en mito ni wabed ki yomcwiny.​—Jo Roma 1:20.

2, 3. (a) Pingo cwinywa bedo yom ka cingwa yot? (b) Ngo ma wabinyamo i pwony man?

² Lubanga ocweyowa i calle. (Acakki 1:27) Man tyen lokke ni Jehovah ocweyowa ki kit ma en bene tye kwede. Wek wabed ki yomcwiny dok wanong mot pa Jehovah omyero walub lanene. Mitte ni wapar pi jo mukene dok wanywak jami ma watye kwede labongo nwang cing. (Jo Pilipi 2:3, 4; Yakobo 1:5) Pingo? Pien man aye kit ma  Jehovah oyubowa kwede. Kadi bed watye ki roc, watwero lubo lanen pa Jehovah wek wabed jo ma cinggi yot.

³ Wabinyamo pwony mogo ma Baibul miyo madok i kom yot cing. Wabineno pingo cwiny Jehovah bedo yom ka cingwa yot. Wabipwonyo bene kit ma bedo ma cingwa yot keliwa yomcwiny dok konyowa me tiyo tic ma Jehovah ominiwa. Dok wabinyamo tyen lok mumiyo omyero wabed ma cingwa yot.

4, 5. Jehovah gin ki Yecu gunyuto yot cing nining, dok pingo omyero walub lanengi?

⁴ Jehovah mito ni walub lanene, pi meno cwinye bedo yom ka cingwa yot. (Jo Epeco 5:1) Jehovah bene mito ni dano ducu gubed ma cwinygi yom. Wangeyo man pien en ocweyo wan dano i yo mamwonya adada, dok bene ocweyo lobowa kacel ki jami ducu ma iye i yo ma weko wanongo mit pa kwo. (Jabuli 104:24; 139:13-16) Pi meno, wamiyo deyo bot Jehovah ka watute me yomo cwiny jo mukene.

⁵ Walubo bene lanen pa Yecu, ma owekiwa lanen ma pud dong ber loyo i kom kit ma dano twero nyuto kwede yot cing. En owacci: “Wod pa dano bene pe obino ni gitine, ento ni wek en aye eti ki dano, ki pi miyo kwone me koko jo mapol.” (Matayo 20:28) Dok lakwena Paulo ocuko cwiny Lukricitayo ni: “Wubed ki cwiny ma rom ki cwiny ma yam Kricito Yecu obedo kwede-ni. . . . Oweko meno ducu, ci okwanyo kit me opii.” (Jo Pilipi 2:5, 7) Man weko wapennye kekenwa ni, ‘Tika omyero atute matek me lubo lanen pa Yecu macok?’—Kwan 1 Petero 2:21.

6. Ngo ma Yecu opwonyowa i kare ma en otito lok i kom Lacamaria maber-ri? (Nen cal ma tye i pot karatac 15.)

⁶ Jehovah cwinye bedo yom tutwal ka walubo lanen ma en kacel ki Yecu guweko piwa. Watimo man ka wanyuto miti i kom jo mukene dok wayenyo yo me konyogi. Yecu onyuto kit ma man pire tek kwede i kare ma en otito lok i kom Lacamaria maber-ri. (Kwan Luka 10:29-37.) En opwonyo lulub kore ni omyero gukony jo mukene, labongo paro pi anga ma gubedo nyo kaka ma gia ki iye. Tika wi po pingo Yecu otito lok man? En otito lok man pien laco mo ma Lajudaya openye ni: “Lawota anga?” Lagam ma Yecu omiyo pwonyowa ni omyero wabed ma cingwa yot calo Lacamaria-ni ka wamito yomo cwiny Jehovah.

7. Wanyuto nining ni waye ni yo pa Jehovah aye ber loyo? Tit kong.

⁷ Tyen lok mukene mumiyo omyero wabed ma cingwa yot kubbe ki gin ma otimme i poto me Eden. Catan owaco ni Adam gin ki Kawa onongo gibibedo ki yomcwiny ka gukwero bedo luwiny bot Jehovah kun giparo pi mitigi kekengi. Kawa onongo laworo ma mito bedo calo Lubanga. Adam obedo ka tamo pi mitine me yomo cwiny dakone keken me ka yomo cwiny Lubanga. (Acakki 3:4-6) Nen ka maleng ni, pe tye ngat mo ma twero bedo ki yomcwiny ka en tamo pi cobo mitine keken. Ento ka watamo pi miti pa jo mukene  dok cingwa yot, wanyuto ni waye ni yo pa Jehovah aye ber loyo.

8. Pingo Adam gin ki Kawa onongo omyero gutam pi jo mukene?

⁸ Kadi bed Adam gin ki Kawa onongo gitye kengi i poto me Eden, onongo omyero gutam pi jo mukene. Pingo? Jehovah onongo ominigi tic me atiya. En owaccigi ni omyero gunywal gunya gupong lobo dok guyub lobo odok paradic. (Acakki 1:28) Adam gin ki Kawa onongo omyero gutam pi yomcwiny pa lutinogi i anyim, kit macalo Jehovah mito ni jo ducu gubed ki yomcwiny. Onongo gubitiyo kacel me yubo lobo ducu wek odok paradic. Meno onongo twon tic madit adada!

9. Pingo dano onongo gibibedo ki yomcwiny ka giyubo lobo wek odok paradic?

⁹ Onongo bimitte bene ni dano ma pe ki roc guti kacel ki Jehovah wek gulok lobo odok paradic dok gucob mitine. Ka gutimo meno, onongo gibidonyo i yweyone. (Jo Ibru 4:11) Tam kong kit ma tic man onongo bikelo botgi yomcwiny! Jehovah onongo bigoyo laane i komgi pi bedogi ma cinggi yot dok ma giparo pi jo mukene.

10, 11. Gin ango ma bikonyowa me tito kwena ki loko dano wek gudok lulub kor Kricito?

¹⁰ I kare-ni, Jehovah omiyo botwa tic ma pire tek adada. En mito ni watit  kwena dok walok jo mukene wek gudok lulub kor Kricito. Me cobo tic man, omyero wabed ki cwiny me paro pi dano. Ki lok ada, watwero medde ki tiyo tic man keken ka watye ki tyen lok matir: mar pi Jehovah kacel ki mar pi dano.

¹¹ Paulo owaco ni en ki Lukricitayo mukene me cencwari me acel gubedo “lutic kacel ki Lubanga” pien gubedo ka tito kwena ki pwonyo jo mukene lok me ada. (1 Jo Korint 3:6, 9) I kare-ni, wan bene watwero bedo “lutic kacel ki Lubanga” ka wajalo cawawa, kerowa ki jamiwa i tito kwena, ma obedo tic ma Lubanga ominiwa. Man obedo twon deyo madit adada!

12, 13. Ngo ma itwero wacone ni obedo adwogi me loko dano wek gudok lulub kor Kricito?

¹² Bedo ma cingwa yot kun wamiyo cawawa ki kerowa i tito kwena ki pwonyo dano keliwa yomcwiny. Man aye gin ma omege kacel ki lumege ma dong gubedo ki kare me kwano Baibul ki dano giwaco. Cwinywa bedo yom adada ka waneno lutino kwanwa giniang gin ma Baibul pwonyowa, ka niyegi dongo, giloko kwogi dok gicako tito gin ma gupwonyo bot jo mukene. Yecu bene obedo ki yomcwiny madwong i kare ma lutit kwena 70 ma en ocwalogi “gudwogo cen ki yomcwiny” pien gunongo adwogi maber.​—Luka 10:17-21.

¹³ Omegiwa ki lumegiwa i twok lobo lung gitye ki yomcwiny ka gineno kit ma kwena me Baibul konyo jo mukene me loko kwogi. Me labolle, laminwa mo ma wiye nono ma nyinge Anna onongo mito medo ticce pi Jehovah. * (Nen lok ma tye i tere piny.) Pi meno en okobo i lobo mo ma tye Tung Kunyango me Ulaya ka ma can lutit kwena tye iye. En ocoyo ni: “Watye ki kare me kwano Baibul ki dano mapol kany, dok man yomo iya tutwal. Tic me pwony kela yomcwiny madwong. Ka ao gang, nongo ape ki cawa me tamo pi mitina keken. Atamo i kom lutino kwanna​—pargi ki pekkigi. Ayenyo yo me cuko cwinygi ki miyogi kony. Man omiyo amoko ni ‘Miyo mot kelo gum [yomcwiny] makato gamo agama.’”​—Tic pa Lukwena 20:35.

14. Itwero nongo yomcwiny nining i tito kwena kadi bed dano gijolo nyo gikwero lokki?

¹⁴ Kadi bed dano pe gijolo lokwa ka watito kwena, pud watwero bedo ki yomcwiny pien nongo wamiyo botgi kare me winyo kwena maber. Jehovah mito ni watim gin ma en owaco ki Ejekiel ni otim: “Ibiloko lokka botgi, kadi ka giwinyo nyo gikwero winyone.” (Ejekiel 2:7; Icaya 43:10) Dong kadi bed dano gijolo lokwa nyo pe, wangeyo ni Jehovah neno tutewa calo gin ma pire tek. (Kwan Jo Ibru 6:10.) Omego mo owaco kit man ma lubbe ki tic me pwony: “Wapito kodi, waonyo pii i tere  dok walego ni Jehovah owek miti ma gunyuto odong.”​—1 Jo Korint 3:6.

15. Tika omyero wabed jo ma cinggi yot ka jo mukene gipwoyowa keken? Tit kong.

¹⁵ Yecu bene mito ni wabed jo ma cinggi yot pien meno kelo botwa yomcwiny. Ka wanyuto yot cing, ci dano mukene bene gibinyutiwa yot cing. Pi meno en ocuko cwinywa ni: “Wumi, gibimiyowu. Gibimiyowu gin ma gipimo maber i korwu, ma gidilo, ma giyengo, ma o. Pien kit gin ma wupimo kwede jami, en aye bene gibipimo kwede jami botwu.” (Luka 6:38) Ngene kene ni, ka wanyuto yot cing, pe dano weng bipwoyowa. Ento kadi bed nen calo dano pe gitye ki pwoc, medde ameda ki miyo botgi jami. Pe itwero ngeyo ber ma romo bino pi mic acel keken ma imiyo.

16. Angagi ma omyero wanyut yot cing botgi, dok pingo?

¹⁶ Jo ma cinggi yot pe gimiyo jami pien gigeno ni kibimiyo botgi bene. Yecu owaco ni: “Ka itedo karama, lwong lucan, lungolo, jo ma komo, ki lutowang, ci ibibedo ki gum, pien pe gitwero culo wang lwongoni.” (Luka 14:13, 14) Baibul bene wacciwa ni: “Ngat ma cinge yot i kom dano bilimo gum,” ki dok ni ‘Tye ki yomcwiny dano ma paro pi lucan.’ (Carolok 22:9; Jabuli 41:1) Omyero wabed jo ma cinggi yot pien ni wamito konyo jo mukene.

17. Jami mene ma watwero miyone ma keliwa yomcwiny?

¹⁷ I kare ma Paulo onwoyo lok ma Yecu owaco ni “miyo mot kelo gum  [yomcwiny] makato gamo agama,” en onongo pe tye ka lok i kom miyo jami me kom keken. Watwero bene cuko cwiny dano, miyogi tam ki i Baibul, ki dok kony ma mitte. (Tic pa Lukwena 20:31-35) Kit ma Paulo okwo kwede ki dok lokke, nyuto ni pire tek adada me bedo ma cingwa yot kun wanyuto mar, dok wamiyo cawawa, kerowa ki tamwa.

18. Gin ango ma lukwed lok mapol giwaco madok i kom yot cing?

¹⁸ Lucayan ma gikwedo lok i kom kit pa dano gunongo ni miyo mic kelo yomcwiny bot dano. Ma lubbe ki pwony mo acel, jo mapol giwaco ni gibedo ki yomcwiny i nge timo jami mabeco pi jo mukene. Lukwed lok giwaco ni ka wakonyo jo mukene, wawinyo ni kwowa tye ki tyen lok. Pi meno ludiro mukene gimiyo tam bot dano ni gudyere me konyo jo mukene wek gubed ki yot kom kacel ki yomcwiny. Ngene kene ni, lokgi-ni pe miniwa ur pien Lacwecwa Jehovah owaco wacon ni miyo jami kelo yomcwiny.—2 Temceo 3:16, 17.

19, 20. Pingo imito ni ibed ngat ma cinge yot?

¹⁹ Ka jo ma gurumowa giparo pigi kengi, twero bedo tek botwa me nyuto yot cing. Ento Yecu opoyo wiwa ni cik aryo ma pigi tek loyo aye me maro Jehovah ki cwinywa, kwowa, tamwa ki tekowa ducu, ki dong maro luwotwa kit ma wamarre kwede kekenwa. (Marako 12:28-31) I pwony man, waneno ni jo ma gimaro Jehovah gilubo lanene. Jehovah gin ki Yecu cinggi yot. Gin gicuku cwinywa me lubo lanengi pien gingeyo ni man bikeliwa yomcwiny me ada. Ka watute me bedo ma cingwa yot i ticwa pi Lubanga ki pi dano, wabimiyo deyo bot Jehovah dok wan kacel ki jo mukene wabinongo adwogi maber.

²⁰ Wangeyo ni wutye ka tute matek me bedo jo ma cinggi yot ki me konyo jo mukene, tutwalle omege ki lumege. (Jo Galatia 6:10) Ka imedde ki timo meno, ci dano gibinyuto pwoc, gibimari, dok ibibedo ki yomcwiny. Baibul tittiwa ni “Dano ma cwinye yom i miyo mot gimedo lonyo madwong bote, ngat ma konyo jo mukene en bene gibikonye.” (Carolok 11:25) I kwowa kacel ki ticwa me pwony, tye yo mapol adada ma watwero nyuto kwede kica ki yot cingwa. Wabinyamo yo magi i pwony ma lubo man.