1. Gin ango ma lanebi Icaya otito i kom Yecu, dok pingo lok pa lanebi man cuko cwinywa?

LOK pa lanebi Icaya i kom Yecu Kricito cuko cwinywa dok miniwa gen. Icaya otito ni Yecu “pe bingolo kop pi gin ma en neno anena ki wange, nyo kadi ki ngolo kop pi lok ma en winyo awinya ki ite” dok ni “en bingolo kop pa lucan atir.” (Icaya 11:3, 4) Pingo lok man cuko cwinywa? Pien ni watye ka kwo i lobo ma opong ki apokapoka, dok dano gingolo kop i wi jo mukene pi gin ma gineno ki wanggi. Wamito Langolkop ma pe ki roc, en aye Yecu, ma pe bingolo kop i komwa pi gin ma en neno ki wange!

2. Gin ango ma Yecu ocikowa me timone, dok ngo ma wabinyamo i pwony man?

² Nino ducu wamoko tam i kom jo mukene. Ento wan pe watye calo Yecu ma pe ki roc, pi meno tamwa bene pe twero bedo labongo roc. Gin ma waneno ki wangwa twero nyweno tamwa woko oyotoyot. Kadi bed kit meno, Yecu ociko ni: “Pe wungol kop pi neno ki wang, ento wungol kop atir.” (Jon 7:24) Yecu mito ni wabed calo en dok pe wangol  kop i kom jo mukene ma lubbe ki kit ma ginen kwede. I pwony man, wabinyamo jami adek ma twero nyweno tamwa, kun weko pe waneno kit pa dano: rok nyo kaka pa ngat moni, lonyo ma en tye kwede, ki dong mwaka pa ngat moni. Pi gin acel acel, wabineno kit ma watwero nongo kwede pwony ki bot Yecu wek pe wangol kop i kom dano pi kit ma ginen kwede.

3, 4. (a) Pingo Petero oloko tamme i kom Lurok? (Nen cal ma tye i pot karatac 9.) (b) Lok ada manyen ango ma Jehovah opwonyo ki Petero?

³ Go kong kit ma lakwena Petero owinyo kwede i kare ma kiwacce ni ocit i Cecaria, i gang pa Larok mo ma nyinge Kornelio! (Tic pa Lukwena 10:17-29) Petero odongo ma ye ni Lurok gubedo jo ma pe leng. Ento jami mogo otimme i kwone ma omiyo en oloko tamme woko. Me labolle, en oneno ginanyuta mo ma oa ki bot Lubanga. (Tic pa Lukwena 10:9-16) I ginanyuta man, Petero oneno gin ma cal ki cuka madit ma bino ki i polo, kun opong ki kit kwa lee me kwer mapatpat. Ci dwan mo owacce ni: “Petero, a ineki wek icam.” Petero okwero woko lajwac. I ngeye, dwan meno owacce ni: “Gin ma Lubanga olonyo in pe ilwong ni obedo me kwer.” I nge neno ginanyuta man, Petero onongo pud pe oniang kulu gin ma dwan meno tye ka tite. I cawa meno kikome, jo ma Kornelio oorogi-ni guo. Cwiny maleng onyuto ki Petero ni omyero ocit i gang pa Kornelio, pi meno en owoto kacel ki jo-ni.

⁴ Ka onongo Petero ‘ngolo kop pi neno ki wange,’ kono onongo en pe oye cito i gang pa Kornelio. Lujudaya onongo pe gicito i gangi pa Lurok kulu. Dong pingo Petero ocito? Kadi bed en onongo tye ki cwiny me apokapoka i kom Lurok, ginanyuta ma en oneno-ni kacel ki tira pa cwiny maleng oloko tamme. I nge winyo lok pa Kornelio, Petero owaco ni: “Adada aniang atir ni Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.” (Tic pa Lukwena 10:34, 35) Niango manyen man oyomo cwiny Petero, dok onongo bigudo Lukricitayo ducu. I yo ma nining?

5. (a) Gin ango ma Jehovah mito ni Lukricitayo ducu guniang? (b) Kadi bed ni watye i ada, kit cwiny ango ma pud watwero bedo kwede?

⁵ Jehovah otiyo ki Petero me konyo Lukricitayo ducu me niang ni En pe epoko kin dano. Ki tung bot Jehovah, kakawa, rokwa, rangi dek komwa, nyo leb ma waloko pire pe tek. Ka walworo Lubanga dok watimo gin matir, ci en bijolo worowa. (Jo Galatia 3:26-28; Niyabo 7:9, 10) Twero bedo ni in bene ingeyo man. Ento ket kong ni idongo i lobo nyo gang ma cwiny me apokapoka dwong iye. Kadi  bed itamo ni pe ipoko kin dano, tika twero bedo ni pud itye ki cwiny me apokapoka mo manok? Kadi wa i nge kare ma Petero okonyo jo mukene me neno ni Lubanga pe poko kin dano, en pud onyuto apokapoka. (Jo Galatia 2:11-14) Dong watwero bedo luwiny bot Yecu nining wek pe wangol kop i kom dano ma lubbe ki gin ma waneno ki wangwa?

6. (a) Ngo ma romo konyowa me weko cwiny me apokapoka? (b) Ripot ma laelda mo ocoyo onyuto gin ango i kome?

⁶ Me niang ka pud watye ki cwiny me apokapoka mo, omyero wangine kekenwa. Omyero wapor kitwa ki gin ma wakwano i Lok pa Lubanga. (Jabuli 119:105) Watwero bene penyo laremwa mo ka en oneno cwiny mo me apokapoka i kwowa, ma wan kekenwa pe watwero nenone. (Jo Galatia 2:11, 14) Cwiny me apokapoka twero moko woko i komwa ma nongo dong pe waneno ni watye kwede! Man aye gin mutimme i kom laelda mo. Laelda-ni ocoyo ripot bot jang gang kal i kom luot mo ma onongo gitye i tic pi kare malac. Cwar lamego-ni a ki i kaka mo ma kinenogi calo jo ma kwiya piny. Laelda-ni ocoyo jami mapol i kom luot-ti ci omedo lok i kom omego-ni ni: “Kadi bed en a ki i [rok moni], kit ma en kwo kwede konyo jo mukene me niang ni a ki i [kaka meno] pe tere ni omyero ibed ma komi col, dok ma ikwiya piny calo pol pa jo me kaka meno.” Man pwonyowa gin ango? Kadi bed watye ki mot me tic i dul pa Jehovah, omyero wangine kekenwa dok wajol kony me weko cwiny me apokapoka mo keken ma pud watye kwede. Ngo mukene ma waromo timone?

7. I yo ango ma watwero nyuto kwede ni ‘wayabo cwinywa malac’?

⁷ Ka ‘wayabo cwinywa malac,’ ci mar bileyo ka wang cwiny me apokapoka. (2 Jo Korint 6:11-13) Tika imaro bedo ki jo me rok, lobo, kaka, nyo lebwu keken? Ka tye kit meno, ci kong item bedo ki jo mukene bene. Itwero jolo omege ki lumege ma gia ki i kabedo nyo kaka mapatpat me cito kwedi i tic me pwony. Nyo iromo lwongogi i gangi pi cam nyo namo mo manok. (Tic pa Lukwena 16:14, 15) I nge kare mo, ibinongo ni cwinyi opong ki mar keken ma nongo dong kare pe me bedo ki apokapoka. Kong dok wanyamu yo mukene ma watwero ngolo kop i kom ngat moni ‘pi gin ma waneno ki wangwa.’

8. Gin ango ma watwero pwonyo ki i Lulevi 19:15 i kom kit ma lonyo nyo can pa ngat moni twero gudo kit ma wanene kwede?

⁸ Kit ma waneno kwede ki ngat moni twero bedo maber nyo marac kun lubbe ki can nyo lonyone. Lulevi 19:15 waco ni: “Pe idwor kor lacan, pe idwor dano madit, ento ngol kop atir i kom lawoti.” I yo ango ma lonyo nyo can pa ngat moni twero gudo kit ma wanene kwede?

9. Lok ada ango ma tye me cwercwiny ma Solomon ocoyo, dok man pwonyowa gin ango?

 ⁹ Solomon ocoyo lok ada man ma tye me cwercwiny ni: “Pe tye ngat mo ma mito dano ma lacan, kadi lawote kikome, ento jo ma lulonyo gitye ki lurem mapol.” (Carolok 14:20) Carolok man pwonyowa gin ango? Ka pe wagwokke, ci watwero cako mako lirem ki omege ma gulony ento pe omege ma lucan. Pingo rac adada me ngolo kop i kom jo mukene ma lubbe ki jami ma gitye kwede nyo ma gipe kwede?

10. Peko ango ma Yakobo ociko Lukricitayo iye?

¹⁰ Ka wangolo kop i kom omegiwa ma lubbe ki lonyo nyo cangi, man twero kelo apokapoka i kacokke. Gin ma kit man otimme i kacokke mogo i cencwari me acel, dok Yakobo ociko Lukricitayo meno iye matek. (Kwan Yakobo 2:1-4.) Pe omyero waye ni apokapoka obed tye i kacokkewa. Pi meno, watwero gwokke nining ki ngolo kop i kom jo mukene ma lubbe ki jami me kom ma gitye kwede?

11. Tika jami me kom ma ngat moni tye kwede gudo watte ki Jehovah? Tit kong.

¹¹ Omyero wanen omegiwa kit ma Jehovah nenogi kwede. Dano pe pire tek bot Jehovah pien ni obedo lalonyo nyo lacan. Watwa ki Jehovah pe jenge i kom cente nyo jami me kom ma watye kwede.  Tye ada gire ni Yecu owaco ni “bibedo tek mada bot dano ma lalonyo me donyo i ker me polo,” ento en pe owaco ni pe twere kulu. (Matayo 19:23) Yecu bene owaco ni: “Itye wunu kede winyo, wun ocan, pien loc Obanga mewu.” (Luka 6:20, Lango Baibul) Ento man pe te lokke ni lucan ducu onongo gibiwinyo lok pa Yecu ci ginongo mot. Tye lucan mapol ata ma pe gulubo kor Yecu. Lok ada tye ni, lonyo nyo can pa ngat moni pe twero nyuto tut pa watte ki Jehovah.

12. Pwony ango ma Ginacoya miyo bot lulonyo ki lucan?

¹² I kin jo pa Jehovah, watye ki omege ki lumege ma lulonyo ki ma lucan bene. Ento gin ducu gimaro Jehovah dok gitiyo pire ki cwinygi ducu. Ginacoya bene waco bot lulonyo ni “pe guket gengi i kom lonyo ma pe genne, ento guket gengi i kom Lubanga.” (Kwan 1 Temceo 6:17-19.) Lok pa Lubanga ciko lutic pa Jehovah ducu, ma lulonyo ki ma lucan, ni pe omyero gumar lim. (1 Temceo 6:9, 10) Ka waneno omegiwa kit ma Jehovah nenogi kwede, ci pe wabingolo kop i komgi ma lubbe ki jami me kom ma gitye kwede. Ento mwaka pa ngat moni kono? Tika meno obedo tyen lok maber me ngolo kop i kom jo mukene?

13. Gin ango ma Baibul pwonyowa i kom nyuto woro pi jo ma mwakagi oteggi?

¹³ Baibul owaco tyen mapol ni omyero wawor jo ma mwakagi oteggi. Lulevi 19:32 waco ni: “A malo i nyim dano ma wiye obuk lwar, wor dano ma dong guti, dok ilwor Lubangani.” Carolok 16:31 tito ni “lwar wic aye lalukana me deyo pa ludongo, ka ce obino pi kwo ma tye atir.” Paulo owaco bot Temceo ni pe myero ojuk ladit mo, ento ocuk cwinygi macalo wego. (1 Temceo 5:1, 2) Kadi bed ni Temceo onongo tye ki twero mo olo to i kom omege ma mwakagi dito loyo mege, onongo mitte ni en onyut cwiny me kica kacel ki woro.

14. I kare mene ma romo mitte ni wami tira bot dano ma mwakane dit kato mewa?

¹⁴ Ento ka ngat mo muteggi otimo bal akaka nyo bedo ka rweyo pi gin mo ma Jehovah dag kono? Jehovah pe bitimo kica ki ngat ma otimo bal akaka, kadi bed labal-li obedo dano ma mwakane dit dok kiworo. Nen kong gin ma kicoyo i Ejekiel 9:5, 6: “Awinyo bene ka Lubanga waco bot jo mukene ca ni, ‘Wulub kore kun wuwok ki i dye gang ci wunek dano.  . . . Wunek jo muti, awobe, anyira, mon ka litino matino.’” I lok pa lanebi Icaya bene kitito gin ma rom ki man. (Icaya 65:20) Gin ma pire tek loyo aye ni wawor Jehovah, Ngat ma Yam Okwongo Bedo Kwo Con. (Daniel 7:9, 10, 13, 14) Worowa pire biminiwa tekcwiny me tiro ngat ma mito kony, kadi bed ni ngat meno mwakane dit.​—Jo Galatia 6:1.

15. Pwony ango ma wanongo ki bot lakwena Paulo i kom nyuto woro pi omege matino?

¹⁵ Ka omego mo mwakane pud tidi kono? Tika meno tyen lokke ni en pe oporre me awora? Pe. Paulo ocoyo bot Temceo ni: “Pe imi ngat mo ocayi ni pien in pud itidi, ento bed lanen maber bot jo muye, i lokki, i kiti, i mar, i niye, ki i bedo maleng labongo gin marac mo i komi.” (1 Temceo 4:12) I kare ma Paulo ocoyo lok man, Temceo onongo nen  calo tye i kine ka mwaka 30. Kadi bed kit meno, Paulo omine tic ma pire tek adada. Man pwonyowa gin ango? Pe omyero wangol kop i kom omege matino pi mwakagi. Tam kong i kom jami ducu ma Yecu onongo dong ocobo i kare ma en tye ki mwaka 33 keken!

16, 17. (a) Gin ango ma luelda myero guti kwede me moko ka omego moni opore me tic macalo lakony kor tic nyo laelda? (b) I yo ango ma tam pa luelda nyo tekwarogi twero bedo pat ki lok ma i Ginacoya?

¹⁶ I tekwaro mukene, pe gimiyo woro ki omege matino. Macalo adwogine, luelda mogo pe gimiyo nying omege matino me acima me tic macalo luelda nyo lukony kor tic, kadi bed omege magi gupore pi tic meno. Ento Baibul pe waco ni omego myero kong oo mwaka moni ka wek kicime macalo laelda nyo lakony kor tic. (1 Temceo 3:1-10, 12, 13; Tito 1:5-9) Ka laelda mo oketo lok man odoko cik pi tekwaro ma en a ki iye, ci nongo pe tye ka lubo Lok pa Lubanga. Luelda myero pe gungol kop i kom omege matino ma lubbe ki kit ma gin luelda giwinyo kwede, nyo tekwarogi ento myero gulub Lok pa Lubanga.​—2 Temceo 3:16, 17.

¹⁷ Ka luelda pe gilubo rwom ma Baibul omiyo pi cimo lukony kor tic nyo luelda, ci giromo gengo omege ma gupore ki nongo mot me tic. I lobo mo acel, onongo tye lakony kor tic mo ma cobo ticce ducu maber, dok luelda mogo bene guye ni opore pi tic macalo laelda. Ento, luelda mukene ma mwakagi oteggi gukwero miyo nyinge woko pien guwaco ni omego-ni nen ki i wange calo pud tidi ma pe romo bedo laelda. Ki twon cwercwiny, pe kicimo omego man, pi tyen lok ma konye pe ni en pud nen tidi. Dok tam ma kit man nen calo tye i but lobo mapol. Pire tek adada ni wajenge i kom Baibul me ka jenge i kom tamwa nyo tekwarowa. Ka watimo kit meno, ci wabilubo pwony pa Yecu dok pe wabingolo kop i kom jo mukene pi gin ma waneno ki wangwa.

18, 19. Ngo ma bikonyowa me neno omegiwa kit ma Jehovah nenogi kwede?

¹⁸ Wan ducu watye ki roc, ento pud waromo pwonnye me neno jo mukene labongo cwiny me apokapoka, kit ma Jehovah nenogi kwede. (Tic pa Lukwena 10:34, 35) Pi meno, omyero kare ducu waket cwinywa i kom lapo wic ma wanongo ki i Lok pa Lubanga. Ka waketogi i tic, ci wabilubo tira ma Yecu omiyo ni “pe wungol kop pi neno ki wang.”​—Jon 7:24.

¹⁹ Cokcok-ki, Kabakawa Yecu Kricito bingolo kop i kom jo ducu. Ngolo koppe bijenge i kom rwom me kit matir pa Lubanga, ento pe i kom jami ma en winyo nyo neno. (Icaya 11:3, 4) Watye ka kuro kare meno ki miti madit adada!