1. I yo mapatpat ango ma watwero tic kacel ki Jehovah?

I KARE ma Jehovah ocweyo dano, en onongo mito ni gubed lutic kacel kwede. Kadi bed dano dong gitye ki roc i kare-ni, jo ma lugen pud giromo tic kacel ki Jehovah nino ducu. Me labolle, “wan lutic kacel ki Lubanga” ka watito kwena maber me Ker-re dok waloko dano me doko lulub kor Kricito. (1 Jo Korint 3:5-9) Obedo twon deyo madit adada ni Lacwec, ma en won twer ducu, oyerowa me tiyo tic man ma pire tek-ki! Kadi bed kit meno, tito kwena pe obedo yo acel keken ma watiyo kacel ki Jehovah. I pwony man, wabinyamo kit ma wan bene watiyo kacel ki Jehovah ka wakonyo jo me otwa ki jo me kacokke, ka wajolo wele, ka watyelo kor tic mogo ma dul pa Jehovah oyubo, ki ka wamedo cawawa ki kerowa i tic pi Jehovah.​—Jo Kolocai 3:23.

2. Pingo pe omyero wapor ticwa pi Jehovah ki tic pa jo mukene?

² Ka watye ka kwano pwony man, myero wiwa opo ni ngat acel acel pat ki lawote. Mwakawa, yotkomwa, kwowa, ki diro ma watye kwede patpat. Pi meno, pe ipor ticci pi Jehovah ki tic pa jo mukene. Lakwena Paulo owaco  ni: “Dano acel acel kong ongi ticce kene ka ber, meno miyo tyen lok me wakkene bedo pi ticce kikome ma en otiyo, ma pe dok poro ki tic pa lawote.”​—Jo Galatia 6:4.

3. Pingo watwero wacci jo ducu ma gitye ka gwoko jo me odigi nongo gitye ka tic kacel ki Lubanga?

³ Jehovah mito ni wagwok jo me odiwa. Me labolle, mitte ni iti cente me cobo jami ma mitte pi jo me ot-ti. Megi lutino mapol gibedo gang ka gwoko lutinogi matino. Dok ka lunyodowa gutii ma pe giromo gwokke kengi, twero mitte ni wagwokgi. Magi ducu gubedo jami ma pigi tego. Baibul waco ni: ‘Ka ce dano mo pe miyo gin mo me konyo wadine, makato pi jo me ode kikome, nongo dong okwero niyene woko, dok bene odoko rac makato ngat ma pe oye Lubanga.’ (1 Temceo 5:8) Ka itye ki jo me ot ma myero igwokgi, twero bedo ni pe itye ka tic pi Jehovah kit ma cwinyi mito kwede. Ento pe iwek cwinyi otur! Cwiny Jehovah bedo yom ka igwoko jo me ot-ti.​—1 Jo Korint 10:31.

4. I yo ango ma lunyodo gitwero keto pi Ker-ri bedo mukwongo, dok adwogi maber ango ma man kelo?

⁴ Lunyodo ma gin Lukricitayo gitwero tic kacel ki Jehovah ka gikonyo lutinogi me keto yub me tic pi Jehovah pi kare malac. Lunyodo mapol dong gutimo man. Macalo adwogine, lutinogi lacen gumoko tamgi me tic pi kare malac, kun mukene gitiyo wa i bor piny. Mogo gitiyo macalo lumiconari, mukene gitiyo macalo painia ka ma can lutit kwena tye iye, ki dong mukene gitiyo i Betel. Ngene kene ni, ka lutino tye ka tic i bor piny, nongo dong lunyodogi pe gitwero tero kare malac me bedo kacel kwedgi kit ma cwinygi mito. Ento pud gicuko cwiny lutinogi me medde ki tic pi Jehovah ka ma gitye iye. Pingo? Pien cwinygi yom adada ni lutinogi gitye ka keto tic pa Jehovah bedo mukwongo i kwogi. (3 Jon 4) Pol pa lunyodo magi giwinyo calo Anna, ma owaco ni ‘edyero’ wode Camuel bot Jehovah. Giwinyo ni obedo twon deyo madit adada me tic kacel ki Jehovah i yo man.​—1 Camuel 1:28.

5. Itwero konyo omege ki lumege me kacokkewu nining? (Nen cal ma tye i pot karatac 21.)

⁵ Ka pud ipe ki jo me ot-ti ma mitte ni igwokgi, tika itwero konyo omege ki lumege ma komgi lit, ma gutii woko nyo ma gitye ki goro mukene? Nyo tika itwero miyo kony bot jo ma gwokogi? Yeny jo ma i kacokkewu ma gimito kony i yo magi. Me labolle, romo bedo ni wutye ki lamego mo ma tye ka gwoko lanyodone ma otii. Tika itwero kwanyo kare ibedo kacel ki lanyodone-ni wek en obed agonya me timo jami mukene? Nyo gwok itwero konyo ngat mo ki giwot kun idyere me tere i cokke, nyo i cuk ka wil, nyo i ot yat ka limo latwo mo. Ka itimo meno, twero bedo ni nongo itye ka tic ki Jehovah me gamo lega pa dano meno.​—Kwan 1 Jo Korint 10:24.

6. Watwero nyuto nining ni wabedo jo ma jolo wele?

⁶ Jo ma gin lutic kacel ki Lubanga gingene pi jolo wele. Lok ma kigonyo ni “jolo welo” i leb Grik tyen lokke atir atir tye ni “nyuto kica bot ngat ma pe ingeyo.” (Jo Ibru 13:2) I Lok pa Lubanga, watwero kwano labol pa jo mapol ma romo pwonyowa kit me nyuto kica. (Acakki 18:1-5) Pire tek dok mitte ni wakony jo mukene ka watye ki kero me timo man, kadi bed gitye “utmegiwa ma guye Kricito” nyo pe.​—Jo Galatia 6:10.

7. Adwogi maber ango ma wanongo ka wagwoko jo ma gitye ka tic pi kare malac?

⁷ Tika itwero tic kacel ki Jehovah kun imiyo kabuto bot jo ma gitye i tic pi kare malac? (Kwan 3 Jon 5, 8.) Ka watimo kit meno, ci wan ducu wabinongo adwogi maber. Baibul lwongo man ni ‘cuko cwinywa kekenwa.’ (Jo Roma 1:11, 12) Tam kong i kom gin mutimme i kom Olaf. I kare ma en pud tidi, laneno me adwol ma wiye nono olimo kacokkegi dok onongo mito kabuto ento ngat mo keken ma i kacokke onongo pe twero konye. Olaf olego lunyodone, ma onongo gipe Lucaden, ka laneno me adwol twero bino buto i ganggi. Gin guye ni laneno obin ento nongo Olaf bijalo kabutone pire, ci Olaf buto i wi kom. Meno aye gin ma Olaf otimo, dok en pe okoko ange. I cabit meno en onongo yomcwiny madit me bedo kacel ki laneno me adwol! Nino ducu gubedo ka co con ka nyamo lok mapat pat me Baibul kun giwoto ki mato cai. Laneno me adwol ocuko cwiny Olaf matek ma oweko lacen en omoko tamme me cako tic pi Jehovah pi kare malac. Pi mwaki 40 mukato-ni, Olaf dong otiyo macalo lamiconari i lobe mapol.

8. Pingo omyero wabed lukica kadi bed jo mukene pe ginyuto pwoc i acakkine? Mi labol.

⁸ Watwero nyuto mar bot jo ma pe wangeyogi i yo mapol, kadi bed pe gunyuto pwoc i acakkine. Me labolle, laminwa mo ma bedo i lobo Spain okwano Baibul ki dako mo ma nyinge Yesica ma oa ki i lobo Ecuador. Nino mo acel ma gitye ka kwano Baibul, Yesica ocako koko. Laminwa-ni opennye pingo en dok tye ka kok. Yesica owacce ni i kare ma peya ebino i lobo Spain, en onongo lacan tutwal. I nino mo acel onongo epe ki dek mo me amiya bot latin anyakane, ento pii keken. Yesica olego pi kony i kare ma tye ka bwolo latinne wek onin. Ma pe orii, Lucaden aryo gulimo Yesica ci gumiyo bote magajin. En obedo mager i komgi, dok oyeco magajin ma kimine-ni kun wacci: “Man aye dek ma wumito ni ami ki latinna?” Lumegiwa-ni gutemo kweyo cwiny Yesica, ento en okwero winyo lokgi woko. Lacen, lumege aryo-ni guweke jami acama mogo i nyim doggolane. Dong, i nino ma en ocako koko i  kare ma gitye ka kwan-ni, en oniang ni con kara onongo ekwero lagam pa Lubanga pi legane. Ento Yesica onongo dong omoko tamme me tic pi Jehovah. Onen ka maleng ni, adwogi maber obino ki i yot cing pa lumege magi.​—Latitlok 11:1, 6.

9, 10. (a) Kare mene ma Luicrael gubedo kwede me jalle pi tic? (b) I yo mapatpat ango ma omege giromo miyo kony i kacokke i kare-ni?

⁹ I kare mukato angec, Luicrael gubedo ki kare mapol me jalle pi tic mapatpat. (Nia 36:2; 1 Tekwaro 29:5; Nekemia 11:2) I kare-ni, in bene itwero jalo cawani, jamini, ki dironi me konyo omege ki lumege. Ka itimo kit meno, ci ibibedo ki yomcwiny dok Jehovah bimini mot mapol.

¹⁰ Lok pa Lubanga cuko cwiny omege ma i kacokke me tic kacel ki Jehovah kun nongo gitiyo calo lukony kor tic ki luelda. (1 Temceo 3:1, 8, 9; 1 Petero 5:2, 3) Omege ma gitiyo kit man gimiyo kony i yo ma nen. (Tic pa Lukwena 6:1-4) Tika dong luelda gulegi me konyo i tic calo lajol wele, nyo ni ikony i poko bukke, gwoko rekod me wang tic, nyo bene gwoko lengo? Omege ma gimiyo kony i yo magi giwaco ni yomo cwinygi adada.

11. Adwogi maber ango ma lamego mo onongo pi tiyo tic me gedo?

¹¹ Jo ma gijalle pi tiyo tic me gedo pol kare ginongo lurem manyen. Laminwa mo ma nyinge Margie dong otiyo i gero Odi me Ker pi mwaki 18 kulu. Ka en tye ka tiyo tic man, en mako lurem ki lumege matino ci konyo me pwonyogi. En owacci man obedo yo maber pi jo ma gujalle me cuko cwiny luwotgi.  (Jo Roma 1:12) Ki lok ada, i kare mogo ma en okato ki i pekki madongo, lurem ma en omako i tic meno aye ma gucuko cwinye. Tika dong ijalle me miyo kony i tiyo tic me gedo? Pud itwero jalle me miyo kony, kadi bed ipe ki diro mo.

12. Itwero miyo kony nining i nge can ma poto atura?

¹² Watwero tic kacel ki Jehovah ka wakonyo omegiwa ka ma can opoto iye atura. Me labolle, watwero miyo mot me cente. (Jon 13:34, 35; Tic pa Lukwena 11:27-30) Yo mukene ma watwero miyo kwede kony aye me yubo kabedo ma oballe i nge can ma poto atura. Gabriela, laminwa mo ma a ki i lobo Poland ma pong pa pii obalo otte woko, cwinye obedo yom me neno ka omege ma gia ki i kacokke macok kwede gubino ka konye. Ka otamo i kom gin mutimme meno, en owaco ni pe eparo pi jami ma erwenyo, ento eketo cwinye i kom jami ma enongo. En otito ni: “Jami mutimme-ni ocuko cwinya ni bedo i kacokke pa Lukricitayo tye mot madit ma keliwa yomcwiny.” Jo mapol ma gunongo kony i nge can ma poto atura giwaco ni gin bene giwinyo kit meno. Dok jo ma gitiyo kacel ki Jehovah me konyo omege magi giwaco ni gin bene gitye ki yomcwiny madit atika.​—Kwan Tic pa Lukwena 20:35; 2 Jo Korint 9:6, 7.

13. Ka wajalle me tic pi Jehovah, man jingo marwa pire nining? Mi labol.

¹³ Laminwa mo ma nyinge Stephanie, ki lutit kwena mukene me kabedogi, gutiyo kacel ki Lubanga me miyo kony bot jo ma guringo ki i lobogi pi lweny ci gubino i Amerika. Gukonyo luring ayela magi me nongo kabedo kacel ki jami me ot. En owaco ni: “Neno yomcwinygi ki pwocgi pi kony pa utmege ogudo cwinywa matek. Jo me odi pa luring ayela magi gitamo ni wakonyogi, ento i ada, gin aye gukonyowa. Mar, note, niye, ki cwiny me jenge i kom Jehovah ma waneno ojingo marwa adada pi Jehovah, dok man odongo pwocwa pi jami ducu ma wanongo kun wok ki i dulle.”

14, 15. (a) Lanebi Icaya obedo ki kodi cwiny ango? (b) Lukricitayo gitwero lubo lanen pa Icaya nining?

¹⁴ Tika imito medo ticci pi Jehovah? Mono itwero kobo ka ma can lutit kwena tye iye? Ngene kene ni, pe mitte ni wakob wa i bor piny ka wek wabed ma  cingwa yot. Ento tye omege ki lumege mukene ma gitwero. Gitye ki cwiny calo pa lanebi Icaya. I kare ma Jehovah openyo ni, “Abioro anga mono? Anga ma bicito piwa?” en ogamo ni, “An ene; ora.” (Icaya 6:8) Tika imito dok itwero konyo tic i dul pa Jehovah? Yo mapatpat ango ma itwero miyo kwede kony?

¹⁵ Yecu oloko i kom tic me tito kwena ki loko dano me doko lulub kore ni: “Kac dwong, ento lutic nok. Pi meno, wuleg won poto wek ocwal lutic ka kayo kacce.” (Matayo 9:37, 38) Tika itwero tic macalo painia i kabedo ma can lutit kwena tye iye? Nyo itwero konyo ngat mukene me timone? Omege ki lumege mapol giwinyo ni yo maber loyo me nyuto margi pi Lubanga ki dano luwotgi aye me tic calo painia ka ma can lutit kwena tye iye. Tika itwero tamo pi yo mukene ma iromo medo kwede ticci pi Jehovah? Ka itimo kit meno, ibibedo ki yomcwiny madit.

16, 17. Yo mapatpat ango ma itwero medo kwede ticci pi Jehovah?

¹⁶ Tika itye atera me tic i Betel nyo miyo kony i gero Odi me Ker, macalo latic pi tutunu, nyo pi nino acel nyo makato cabit ki cabit? Dul pa Jehovah kare ducu mito jo ma gitye atera me tic ka mo keken ma mitte dok giye timo tic mo keken, kadi bed gitye ki diro i tiyo tic mapat. Jehovah maro jo ducu ma gitye atera me jalle me tiyo tic ka mo keken ma gimitte iye.​—Jabuli 110:3.

¹⁷ Tika imito nongo pwonnye wek imed ticci pi Jehovah? Gwok nyo iromo pongo fom me cito i Cukul pi Lutit Kwena me Ker-ri. Cukul man pwonyo omege ki lumege ma guteggi i yo me cwiny, ma dong gitye ka tic pi kare malac, wek dul pa Jehovah oti kwedgi. Jo ma gicito i cukul man omyero gubed atera me cito ka tic ka mo keken ma kicwalogi iye. Mono itye atera me tic pi Jehovah i yo man?​—1 Jo Korint 9:23.

18. Adwogi maber ango ma bino pi tic kacel ki Jehovah nino ducu?

¹⁸ Pien wan jo pa Jehovah, wabedo jo ma cinggi yot, jo mabeco, lukica, ki dok jo ma maro dano. Waparo pi dano nino ducu. Man keliwa yomcwiny ki kuc. (Jo Galatia 5:22, 23) Labongo paro pi kit kwo ma itye iye, pud itwero bedo ki yomcwiny teke ilubo lanen pa Jehovah me bedo ngat ma cinge yot kun itiyo kacel kwede!​—Carolok 3:9, 10.