1. Miti ango ma wan ducu watye kwede pi wadiwa?

LAMEGO mo ma nyinge Pauline owaco ni: “Cakke i kare ma apwonyo ada, abedo ki miti ni omyero abed i Paradic ki jo ducu ma i ganga. Tutwalle onongo amito ni cwara ma nyinge Wayne, ki woda guribbe kweda i tic pi Jehovah.” * Tika in bene itye ki wadini ma peya gingeyo Jehovah? Calo Pauline, in bene nen calo imito ni guti pi Jehovah kacel kwedi.

2. Lapeny mene ma wabinyamo i pwony man?

² Pe watwero diyo wadiwa me ye kwena maber, ento watwero cuko cwinygi me tam iye wek gujol kwena maber me Baibul. (2 Tem. 3:14, 15) Pingo omyero wami caden bot wadiwa? Pingo omyero watute me niang kit ma giwinyo kwede? Gin ango ma watwero timone me konyo wadiwa me maro Jehovah calo wan? Dok jo ma i kacokke ducu gitwero konyowa nining?

3. Ma lubbe ki 2 Petero 3:9, pingo omyero wami caden bot wadiwa?

³ Ma pe otero kare malac, Jehovah bityeko lobo man woko. ‘Jo ma myero me nongo kwo ma pe tum’ keken aye gibibwot. (Tic 13:48) Watero kare ki cawa malac adada i tito kwena bot jo ma pe wangeyogi i wang ticwa, pi meno, ngene kene ni wabibedo ki miti me tito kwena bot wadiwa wek gin bene guti pi Jehovah. Wonwa ma lamar, Jehovah, “pe mito ni ngat mo orweny woko matwal, ento mito ni jo ducu guo i ningut.”​—Kwan 2 Petero 3:9.

4. Bal ango ma watwero timone ka watye ka tito kwena bot wadiwa?

 ⁴ Omyero wange ni tye yo maber ki yo marac me nywako kwena me larre. Me labolle, twero bedo ni waloko ki mwolo ka watye ka tito kwena bot ngat ma pe wangeyo, ento ka watye ka tito kwena bot wadiwa, waloko ata labongo kica.

5. Gin ango ma myero wiwa opo iye ma peya wanywako lok ada ki wadiwa?

⁵ Ka watamo i kom kare ma watito kwena bot wadiwa pi tyen mukwongo, pol pa wan wakoko ange pi kit ma waloko kwede dok waparo ni kono onongo wange, kono waloko i yo mupore. Lakwena Paulo omiyo tira man bot Lukricitayo ni: “Lok ma wuloko myero obed lok mamit ma kado oromo maber, wek omi wunge kit ma myero wudok kwede i peny pa ngat acel acel.” (Kol. 4:5, 6) Bedo ber ka wiwa opo i kom tira man ka watye ka lok ki wadiwa. Ka pe watimo kit meno, ci watwero cwero cwinygi me ka konyogi wek guwiny lokwa.

6-7. Mi labol ma nyuto ni pire tek ki Lukricitayo me nyuto ni giparo pi luotgi ma pe gitiyo pi Jehovah.

⁶ Nyut cwiny me paro pi dano. Pauline, ma kiloko i kome malo-ni owaco ni: “I acakkine, onongo aloko ki cwara lok i kom Lubanga ki Baibul keken. Onongo pe waboko lok i kom jami mukene.” Cwar Pauline onongo tye ki ngec manok adada i kom Baibul dok onongo pe niang gin ma dakone tye ka lok iye. Ki bote, onongo nen calo dakone cawa ducu bedo ka tam i kom dinine keken. Wayne onongo tye ki par madit adada ni dakone tye ka donyo i dini marac dok gitye ka bwolle.

⁷ Pauline oye ni pol kare onongo etero  cawa malac otyeno ki i tum pa cabit me bedo kacel ki omege ki lumege​—i cokke, i tito kwena, ki dong i namo. Pauline owaco ni: “Kare mogo Wayne onongo dwogo gang nongo ngat mo pe.” Ngene kene ni, Wayne onongo mito ni dakone ki wode gubed kacel kwede. En onongo pe ngeyo kit dano ma dakone ki latinne gitye ka bedo kwedgi, dok onongo nen calo pi jo magi odoko tek adada bot dakone makato pi en. Pi meno, Wayne omiyo bura ki dakone ni ebiketo nyomgi woko. Ka onongo ibed Pauline, onongo ibinyuto nining ni iparo pi cwari?

8. Ma lubbe ki 1 Petero 3:1, 2, gin ango ma twero gudo cwiny wadiwa?

⁸ Wek kiti aye olok piri. Pol kare, jami ma watimo gudo wadiwa makato lok ma waloko. (Kwan 1 Petero 3:1, 2.) Pauline oniang tyen lok man. En owaco ni: “Onongo angeyo ni Wayne marowa dok pe mito ni waket nyomwa. Ento bwurane oweko aniang ni omyero acak timo jami i yo pa Jehovah. Me ka lok madwong, onongo mitte ni anyut lanen maber ki i jami ma atimo.” Pauline ojuko diyo Wayne me bedo ka lok i kom Baibul, dok en ocako lok i kom jami mukene. Wayne ocako neno ni dakone odoko ngat ma maro kuc dok wode odoko ngat mamwol ma winyo lok. (Car. 31:18, 27, 28) I kare ma Wayne oneno adwogi maber ma pwony me Baibul tye ka kelo i pacone, en ocako tam dok ocako jolo kwena ma a ki i Lok pa Lubanga.​—1 Kor. 7:12-14, 16.

9. Pingo omyero pe wail cingwa ka wamito ni wakony wadiwa?

⁹ Pe iil cingi ka itye ka konyo wadini.  Jehovah owekiwa lanen maber. En miyo kare bot dano “teretere” me jolo kwena maber wek gunong kwo. (Jer. 44:4) Dok lakwena Paulo otito ki Temceo ni omyero en odi cwinye ka tye ka konyo jo mukene. Pingo? Pien ka en otimo kit meno, en bilaro kwone dok bilaro bene jo ma winye. (1 Tem. 4:16) Wamaro jo me paciwa, pi meno wamito ni gunge lok ada ma tye i Lok pa Lubanga. I nge kare mo, lok pa Pauline ki jami ma en timo okelo adwogi maber i pacone. I kare-ni en tye ki yomcwiny me tic pi Jehovah gin ki cware. Gin aryo ducu gitye ka tic macalo painia, dok Wayne tiyo macalo laelda.

10. Pingo omyero wadi cwinywa?

¹⁰ Di cwinyi. Ka waloko kwowa ma rwatte ki cik pa Lubanga, wadiwa gitwero nongo ni tek adada me jolo niyewa ki kwowa manyen man. Pol kare gin mukwongo ma gineno aye ni pe dong wanywako kwedgi i kwero kwer me dini dok pe wadonyo i tim me cung i wibye. I acakkine, wadiwa mogo gitwero keco matek i komwa. (Mat. 10:35, 36) Ento omyero pe watam ni pe gitwero lokke. Ka wajuko konyogi me niang niyewa, ci bedo calo dong wangolo kop woko i wigi ni pe gupore me nongo kwo ma pa tum. Jehovah pe omiyo botwa tic me ngolo kop​—en omiyo twero meno bot Yecu. (Jon 5:22) Ka wadiyo cwinywa, ci jo me odiwa gitwero cako bedo ki miti me winyo lokwa i kom Baibul.—​Nen bok ma wiye tye ni: “ Ti ki Kabedowa me Intanet me Pwony.”

11-13. Gin ango ma wapwonyo ki i kit ma Alice otero kwede lunyodone?

¹¹ Bed mwol, ento pe iwek wadini gulok tammi. (Car. 15:2) Nen kong labol pa Alice. En opwonyo lok madok i kom Jehovah i kare ma onongo tye ka kwo ka mabor ki lunyodone, dok lunyodone onongo pe giye i kom Lubanga kun gimaro bene lok me wibye matek adada. En oniang ni omyero ewac ki lunyodone jami mabeco ma etye ka pwonyone labongo galle. Alice owaco ni, “Ka pe itito con ki lupaconi ni iloko niyeni woko dok icako timo jami i yo mapat, ci man twero cwero cwinygi makato.” En otute me nongo pwony mogo me Baibul ma twero tugo miti pa lunyodone, me labolle mar. Ci ocoyo waraga bot lunyodone kun tito kit ma Baibul loko kwede i kom pwony man dok openyo tamgi iye. (1 Kor. 13:1-13) En opwoyo lunyodone pi pite ki gwokke maber dok ocwalo botgi mot mogo. I kare ma olimo lunyodone, en otimo jami ducu ma etwero me konyo mine ki tic ma gang. I acakkine, lunyodone cwinygi pe obedo yom i kare ma Alice otito botgi pi niyene manyen-ni.

¹² I kare ma Alice tye paco bot lunyodone, en omedde ki yubbe me kwano Baibul nino ducu. En owaco ni, “Man okonyo mamana me niang kit ma Baibul pire tek kwede bota.” Ki tungcel, won Alice okwanyo kare me kwano Baibul pire kene wek eniang gin ma oloko tam pa nyare, ento mitine onongo tye me nongo jami mogo ma pe tye atir wek elok marac i kom Baibul. Alice owaco ni, “Amine Baibul, dok acoyo iye lok mo bote wek ogud cwinye.” Adwogine obedo nining? Won Alice pe onongo gin mo keken marac i Baibul, me ka meno, jami ma en okwano ogudo cwinye matek adada.

¹³ Omyero wacung matek dok wanyut ryeko, kadi bed mitte ni wakat ki i aunauna. (1 Kor. 4:12b) Me labolle, Alice okanyo aunauna mua ki bot mine. “I kare ma anongo batija, mamana ocako lwonga ni  ‘nyara ma kite rac-ci.’” Alice odok iye nining? “Me ka ling aling, atitte ki woro ni dong atyeko moko tamma me bedo Lacaden pa Jehovah dok abicung matek i tam meno. Acuko cwiny mamana ni amare matek. Wan ducu wakok ki pig wangwa, ci atede dek mo mamit adada. Cakke i kare meno, mamana ocako ye ni Baibul tye ka weko adoko dano maber.”

14. Pingo omyero pe waye ni jo me paciwa gulok tamwa?

¹⁴ Twero tero kare pi jo me pacowa me niang kit ma tic pi Jehovah pire tek kwede botwa. Me labolle, i kare ma Alice omoko tamme me cako tic macalo painia me ka tiyo tic ma lunyodone onongo guyero pire, mine dok okok matek. Ento Alice omedde ki cung matek. Alice owaco ni, “Ka iweko jo me pacowu guloko tammi i kom gin acel, ci gibitute me loko tammi i kom jami mukene bene. Ento ka icung matek kun inyuto mwolo, ci jo mukene i kingi gitwero winyo lokki.” Meno aye gin ma otimme i kom Alice. I kare-ni dong lunyodo pa Alice aryo ducu gitye ka tic macalo painia, dok wonne tiyo macalo laelda.

15. Ma lubbe ki Matayo 5:14-16 ki 1 Petero 2:12, “tic mabeco” pa jo mukene twero konyo wadiwa nining?

¹⁵ Jehovah ywayo dano bote kun tiyo ki “tic mabeco” ma kacokke pa Lukricitayo gitimo. (Kwan Matayo 5:14-16; 1 Petero 2:12.) Ka dakoni nyo cwari pe tye Lacaden pa Jehovah, tika en dong orwatte ki omege ki lumege me kacokkewu? Pauline, ma kiloko i kome con-ni, olwongo omege ki lumege i gange wek cware, Wayne,  ongegi maber. Wayne pud wiye po kit ma omego mo okonye kwede me niang maber anga ma Lucaden pa Jehovah gubedo. En owaco ni: “Omego-ni olego yweyo ki i dog ticce wek ebin wanen tuku odilo kacel i telebijon. Meno okonya me niang ni omego-ni tye ki miti mukene mapat ki lok me dinigi-ni.”

16. Pingo omyero walwong wadiwa me bino i cokke?

¹⁶ Yo acel mukene maber adada me konyo wadiwa en aye me lwongogi me bino i cokke kacel kwedwa. (1 Kor. 14:24, 25) Cokke mukwongo ma Wayne obedo iye aye Nipo​—pien ni cokke man otimme i nge ticce dok pe orii. En owaco ni: “Pe amedo ki niang gin ango ma onongo kitye ka pwonyone, ento gin ma ogudo cwinya aye dano ma onongo gitye i cokke meno. Jone gubino bota, gujola, dok gumota ki yomcwiny. Onongo nen ka maleng ni gubedo jo mabeco.” Luot mo acel onongo gubedo ka nyuto cwiny me kica bot Pauline, kun gikonye gwoko latinne ka gitye i cokke nyo i tic me pwony. Pi meno, i kare ma Wayne omoko tamme ni emito niang maber i kom dini manyen pa Pauline-ni, en openyo omego-ni me kwano Baibul kwede.

17. Omyero pe wakok i komwa kekenwa pi gin ngo ento pingo pe omyero watam ni wadiwa pe gitwero lokke?

¹⁷ Watye ki gen ni wadiwa ducu gitwero ribbe kwedwa i tic pi Jehovah. Ento, kadi bed watute matek me konyo wadiwa me tic pi Lubanga, i kine mukene pe gijolo lok me ada. Ka tye kit meno, ci omyero pe wakok i komwa kekenwa pi tam ma gumoko, pien pe watwero diyo ngat mo keken me jolo niyewa. Kadi bed kit meno, omyero pe wacaa adwogi maber ma watwero kelone i kom wadiwa ka guneno yomcwiny ma watye kwede pi tic pi Jehovah. Leg pigi. Lok kwedgi ki diro. Pe ijuk tuteni me konyogi! (Tic 20:20) Bed ki gen ni Jehovah bigoyo laane i kom tuteni. Dok ka wadini guyero me winyo lokki, ci gibilarre!