1-3. Tyen lok ango ma oweko jo mukene ma gitye i tic pi kare malac gitwero weko ticgi woko?

ROBERT ki dakone Mary jo guwaco ni: “I nge bedo i tic ma wamaro adada macalo lumiconari pi mwaki 21, lunywalwa angwen ducu komgi odoko lit matek. Wabedo ki yomcwiny me dok cen ka gwokogi. Kadi bed kit meno, obedo lit adada me weko ticwa ki kabedo ma wamaro tutwal.”

² William ki dakone Terrie gutito ni: “I kare ma waniang ni pe wabidok cen i ticwa pi peko me yotkom, wakok ki pig wangwa. Mitiwa me tic pi Jehovah i lobo mukene ogik woko kit meno.”

³ Omego Aleksey owaco ni: “Waniang ni gamente mito loro jang gang kal ka ma atiyo iye. Ento wabedo ki ur adada i kare ma guloro Betel ci wan ducu waa woko.”

4. Lapeny mene ma wabinyamo i pwony man?

⁴ Medo i kom jo ma kiloko i komgi malo-ni, tye Lubetel alip mapol ki jo mukene ma onongo gitye i tic pi kare malac ma kijuko ticgi woko. * Omege ki lumege magi ma lugen-ni gitwero nongo ni tek adada me weko tic ma gimaro. Ngo ma twero konyogi me jolo alokaloka man? Iromo konyogi nining? Lagam me lapeny magi twero konyo wan ducu ka watye ka kato ki i alokaloka i kwowa.

5. I yo ma nining ma alokaloka ma timme i kom jo ma gitye i tic pi kare malac gudogi kwede?

⁵ Kadi bed watye ka tic i Betel nyo tic pi kare malac mo keken, watwero dongo mar pi dano ki kabedo ma watiyo iye. Ka mitte ni wawek ticwa pi tyen lok mo, man turo cwinywa adada. Waparo omege ki lumege ma gudong cen, tutwalle ka waa pien lumonewa guketo kigeng i kom ticwa. (Mat. 10:23; 2 Kor. 11:28, 29) Medo i kom meno, twero bedo tek me kobo i kabedo manyen​—nyo dok cen paco—​pien nongo myero ipwony kwo me tekwaro manyen. Robert ki Mary Jo guwaco ni: “Onongo wiwa owil woko i kom tekwarowa ki kit me tito kwena i leb penwa. Kit ma onongo wabedo ka tic i lobo mukene pi mwaki mapol, wadoko calo welo i lobowa.” Jo mukene ma guweko tic pi kare malac gitwero nongo ni gitye ki peko me can lim ma pe guyubbe pire. Gitwero bedo ki par, lworo, akalakala ki turcwiny. Ngo ma twero konyogi?

6. Watwero bedo cok ki Jehovah nining?

⁶ Bed cok ki Jehovah. (Yak. 4:8) Watwero timo man nining? Itimo man ka igene macalo Ngat ma ‘winyo legawa ducu.’ (Jab. 66:19) Jabuli 62:8 waco ni, “Wuyab cwinywu woko ducu bote.” Jehovah “twero tiyo tic madwong twatwal ma kato gin ma watwero lego pire nyo keto i tamwa.” (Ep. 3:20) En pe miyowa jami ma walego pire keken. En twero timo gin mo ma onongo pe wabyeko kulu me cobo pekowa.

7. (a) Gin ango ma bikonyowa me bedo cok ki Jehovah? (b)  Ma lubbe ki Jo Ibru 6:10-12, gin ango ma bitimme ka wamedde ki tic pi Jehovah ki gen?

⁷ Me bedo cok ki Jehovah, kwan Ginacoya nino ducu kun ilwodo lok ma iye. Omego mo ma yam obedo lamiconari owaco ni: “Bed ki yub maber me woro pi jo me ot ki me yubbe pi cokke, kit ma yam itimo kwede ma pud itye i ticci.” Medo i kom meno, medde ki nywako i tic me tito kwena maber-ri ki kacokkeni manyen. Jehovah wiye pe wil i kom jo ma gimedde ki tic pire ki gen, kadi bed pe gitwero timo jami ducu ma yam gitimo.​—Kwan Jo Ibru 6:10-12.

8. Lok ma tye i 1 Jon 2:15-17 twero konyi nining me bedo ki kwo ma rwomme lapiny?

 ⁸ Bed ki kwo ma rwomme lapiny. Pe iwek paro pi jami me lobo pa Catan owek ijuk tic pi Jehovah woko. (Mat. 13:22) Kwer dic ma a ki bot jo ma pe gitiyo pi Jehovah nyo ki bot luremi nyo wadini ma gitemo konyi ki mini tam ni omyero iti cente madwong wek ibed maber. (Kwan 1 Jon 2:15-17.) Ket genni i kom Jehovah, ma ocikke me cobo mitiwa pi jami me cwiny kacel ki jami me kom “i kare ma mitte.”​—Ibru 4:16; 13:5, 6.

9. Ma lubbe ki Carolok 22:3, 7, pingo omyero wagwokke adada ki banya ma pe mitte dok gin ango ma twero konyowa me moko tam me ryeko?

⁹ Gwokke ki banya ma pe mitte. (Kwan Carolok 22:3, 7.) Kobo me cako kwo ka mukene twero mito cente madwong adada dok twero bedo yot me donyo i banya. Me gwokke ki banya, pe iden cente pi wilo jami ma pe mitte. Ka watye ki peko ma keliwa par, calo gwoko wadiwa ma komgi lit, watwero nongo tek adada me moko wel cente ma mitte ma omyero waden. I kare ma kit man, wi myero opo ni ‘lega ki bako dog’ twero konyi me moko tam me ryeko. Jehovah twero gamo legani kun konyi me bedo ma cwinyi opye mot wek imok gin maber me atima.​—Pil. 4:6, 7; 1 Pet. 5:7.

10. Watwero mako lurem manyen nining?

¹⁰ Bed ki wat maber ki luremi kacel ki jo me ot-ti. Lok ki luremi macok kun itittigi kit ma iwinyo kwede kacel ki ariya ma itye ka kato ki iye, tutwalle jo ma bene gukato ki i kwo macalo megi-ni. Timo man biweko iwinyo maber. (Latit. 4:9, 10) Lurem ma imako i kare ma itye i ticci macon gibimedde ki bedo luremi. Ento man ma dong itye i kabedo manyen, myero imak lurem manyen. Wi opo ni, me bedo ki lurem, in kikomi myero ibed larem. Itwero mako lurem manyen nining? Tit ki jo mukene jami mabeco ma Jehovah otimo piri dok iwek gunen yomcwiny ma itye kwede i tic pi Jehovah. Kadi bed jo mogo pe guromo niang pingo imaro tic pi kare malac, ento jo mukene gitwero bedo ki miti me ngeyo jami mapol dok gibibedo luremi. Ento pe ilok tutwal i komi kekeni nyo jami mabeco ma itimo i ticci pi Jehovah, nyo cwercwiny ma itye kwede.

11. Itwero gwoko nyommi wek obed me yomcwiny nining?

¹¹ Ka wuweko ticwu pien two omako cwari nyo dakoni, pe ikok i kome. Ki tungcel, ka in aye komi lit, pe iwek cwinyi obed ka pidi, kun itamo ni ibalo tic pa luotwu. Wi opo ni wutye “kom acel,” dok ikwonge i nyim Jehovah ni ibigwoko luotwu kadi gin mo keken otimme. (Mat. 19:5, 6) Ka  wuweko ticwu pi yaco ma pe wuyubbe pire, wuwek latinwu onge ni pi en tek botwu loyo ticwu. Wutit ki latinwu kare ki kare ni en obedo “mot” ma Lubanga ominiwu. (Jab. 127:3-5) Tite bene mot mabeco ma wunongo i kare ma wutye i ticwu. Ka wutimo kit meno, ci man twero tugo cwiny latinwu me tic pi Jehovah pi kare malac ki yomcwiny kit ma wun bene wutimo.

12. (a) Watwero konyo jo ma gitye i tic pi kare malac me medde ki ticgi nining? (b) Watwero konyogi me jolo alokaloka man nining?

¹² Ki pwoc madit, kacokke mapol kacel ki omege pigi kengi gitye ki yub me konyo jo ma gitye i tic pi kare malac me medde ki ticgi. Gitimo meno ka gicuko cwinygi me medde ki ticgi kun giminigi kony me cente nyo jami me kom, nyo bene konyogi ki gwoko lupacogi ma gudong cen gang. (Gal. 6:2) Ka jo ma onongo gitye i tic pi kare malac guweko ticgi ci gukobo i kacokkewu, pe wubed ki tam marac ni pe gutiyo ticgi maber nyo gutimo gin mo marac. * Me ka meno, wukonygi wek jolo alokaloka man obed yot botgi. Wujolgi ki yomcwiny dok wupwogi pi tic ma gutimo con, kadi bed peko me yotkom gengogi timo jami mapol kombeddi. Tute me ngeyogi maber. Nong pwony ki i ryekogi, pwonye ma gunongo, ki ngec ma gitye kwede.

13. Kony ango ma watwero miyo bot jo ma alokaloka otimme i kwogi?

¹³ I acakkine, jo ma gukobo i kabedo  manyen giromo mito konywa me nongo ot, gin wot, dog tic, nyo jami mukene ma mitte pi kwo. Gitwero bene mito ngec madok i kom kwo me nino ducu, calo culo mucoro nyo incuareny. Ento gin ma gimito loyo aye ni watute me niang pekogi. Twero bedo ni gin kikomgi nyo watgi mo tye ka yelle ki two. Nyo romo bedo ni gitye ka kumo pi to pa danogi me amara. * Dok giromo bedo ka kumo, kadi wa i mung, pien giparo luremgi ma i kacokkegi macon. Kare mitte wek gulweny ki kit ma giwinyo kwede, ma i kine mukene bene nyweno wigi woko.

14. I yo ma nining ma lutit kwena me kacokke gukonyo kwede laminwa mo me jolo alokaloka mutimme i kwone?

¹⁴ Ka itito kwena kwedgi dok icuko cwinygi ki lanenni maber, ci itwero konyogi me jolo alokaloka mutimme i komgi. Laminwa mo ma otiyo pi mwaki mapol i lobo mukene owaco ni: “I wang ticca macon, onongo nino ducu atye ki dano ma akwano Baibul kwedgi. Ento i kabedo manyen-ni, ka watye i tic me pwony, tek adada me nongo kadi ngat ma ye ni iyab Baibul nyo inyutte vidio. Kadi bed kit meno, omege ki lumege me kacokkewa manyen gubedo ka tera ka gidok cen ka limo dano nyo ka kwan ki lutino kwangi. Neno ka omege ki lumege magi ma komgi mit-ti gikwano ki dano oweko olo acako bedo ki neno maber i kom wang tic meno. Apwonyo kit me cako lok ki dano i wang tic manyen-ni. Man okonya me bedo ki yomcwiny odoco.”

15. Itwero nongo adwogi maber i ticci manyen nining?

¹⁵ Itwero nongo adwogi maber i ticci manyen-ni. Pe itam ni alokaloka nyuto ni pe itimo ticci maber nyo konyi dong pe. Nen yo ma Jehovah tye ka konyi kwede i kwoni kombeddi dok imedde ki tito kwena. Lub lanen pa Lukricitayo me cencwari  me acel. Ka mo keken ma gucito iye, “guwoto kun gitito lok me kwena maber.” (Tic 8:1, 4) Tuteni me medde ki tito kwena twero kelo adwogi mabeco mapol. Me labolle, lupainia mogo ma kiryemogi ki i lobo mo, gukobo i lobo mukene macok ka ma onongo kitye ki can lutit kwena ma loko leb pa lupainia-ni. I nge dwe manok, gurup mapol ocakke i leb ma lupainia magi gubedo ka tito iye kwena.

16. Itwero nongo yomcwiny i ticci manyen nining?

¹⁶ “Yomcwiny pa Rwot [Jehovah] en aye tek mewu.” (Nek. 8:10) Yomcwinywa madit loyo myero oa ki i watwa ki Jehovah, ento pe ki i ticwa, kadi bed wamaro ticce ningo. Pi meno, ka wamito bedo ki yomcwiny, omyero wabed cok ki Jehovah dok wamedde ki jenge i kome. Wi myero opo ni, icako maro ticci macon pien onongo iketo cwinyi i konyo dano ma kunnu. Ket cwinyi i ticci manyen bene wek inen kit ma Jehovah bikonyi kwede me marone.​—Latit. 7:10.

17. Ngo ma myero wiwa opo iye ma lubbe ki tic ma watye ka timone pi Jehovah i kare-ni?

¹⁷ Wiwa myero opo ni wabitic pi Jehovah pi naka, ento mot me tic ma watye kwede i kare-ni tye pi tutunu. I lobo manyen, wan ducu watwero nongo tic manyen. Omego Aleksey, ma kiloko i kome i acakki me pwony man, owaco ni alokaloka mutimme i ticce okonye me yubbe pi alokaloka ma bibino i anyim. Aleksey owaco ni, “Onongo gire angeyo ni Jehovah tye ada dok lobo manyen bibino, ento onongo nen calo pud bor. Kombeddi dong atye cok adada ki Jehovah, dok awinyo calo lobo manyen bibino diki.” (Tic 2:25) Dong kadi bed watye ki tic ango, gin ma pire tek aye ni wamedde ki wot ki Jehovah. En pe biwekowa matwal, ento bikonyowa me nongo yomcwiny i tic mo keken ma watimo pire​—dok ki ka mo keken.—​Ic. 41:13.