NIYE tye ki teko madit adada. Me labolle, kadi bed Catan mito nekowa i yo me cwiny, niye miyo ‘watwero neko mac ki i kom atero ma Larac bayo.’ (Ep. 6:16) Ka watye ki niye, watwero kanyo kadi wa pekki madongo ma kitwero porogi ki godi. Yecu otito ki lupwonnyene ni: “Ka ce niyewu obedo calo nyig kodi karadali, ci wubiwaco ki got man ni, ‘Dirre i kabedo ma tye loka ca,’ kit meno bidirre.” (Mat. 17:20) Kit ma wangeyo ni niye twero jingo watwa ki Jehovah, omyero watam i kom lapeny magi: Niye obedo gin ango? Kit ma cwinywa tye kwede gudo niyewa nining? Watwero jingo niyewa nining? Dok anga ma omyero waket niye i kome?​—Rom. 4:3.

Niye pe kwako mere ye nyo ngeyo lok ada me Baibul keken, pien kadi “cen-gu bene giye kit meno [ni Lubanga tye], dok komgi myel.” (Yak. 2:19) Dong ngo ma niye obedo?

Baibul nyuto ni niye kwako jami aryo. Me acel, “niye aye ma moko gin ma dano geno.” (Ibru 11:1a) Ka itye ki niye, nongo iye ada ni jami ducu ma Jehovah waco tye ada dok bicobbe. Me labolle, Jehovah owaco ki Luicrael ni: “Ka kono ngat mo i kinwu twero turu cikkena ki dyeceng wa ki dyewor, wek dyeceng ki dyewor pe gubin i karegi ma mitte, kit meno bene cikkena ki laticca Daudi kitwero turo.” (Jer. 33:20, 21, Baibol) Tika itye ki lworo ni nino mo ceng pe bituc, ci dyewor ki dyeceng bibedo pe? Ka pe itye ki akalakala mo keken i kom cik ma doro lobo-ni ci kelo dyeceng ki dyewor kun lobo wire lworo ceng, ci tika omyero ikal akala ka Lacwe cik magi twero cobo lokke? Ngene kene ni pe!​—Ic. 55:10, 11; Mat. 5:18.

Me aryo, niye en aye “gin ma niangowa maber ni, jami ma pe gineno komgi gitye.” Niye kiromo wacone ni obedo “gin ma niangowa maber,” nyo ‘gin ma nyuto’ ni jami ma pe gineno komgi gitye. (Ibru 11:1b) I yo ma nining? Ket kong ni latin mo openyi ni, ‘Ingeyo nining ni yamo tye?’ Kadi bed ni peya ineno yamo, pud itwero konyo latin meno me niang i kom lanyut ma weko wamoko ni yamo tye ada​—yweyo, kit ma yamo yengo ki jami, kacel ki mukene mapol. Lanyut ma tye-ni twero konyo latin-ni me ye ni yamo tye ada, kadi bed pe watwero nenone. I yo acel-lu, niye jenge i kom lanyut ma nen.​—Rom. 1:20.

Kit macalo niye jenge i kom gin ma niangowa nyo lanyut, wek ngat moni obed ki niye, en myero kong onge “lok me ada.” (1 Tem. 2:4) Ento ngec keken pe romo. Lakwena Paulo ocoyo ni: ‘Dano ye ki cwinye.’ (Rom. 10:10) Ngat moni myero pe oye lok ada mere keken ento bene oter calo gin ma pire tek. Meno aye bitugo cwinye me bedo ki niye, nyo me kwo ma lubbe ki lok ada. (Yak. 2:20) Dano ma pe tye ki pwoc i  cwinye pi lok ada twero kwero kadi wa lanyut ma moko ada pien en pe ye loko tamme nyo mito cobo miti me kome. (2 Pet. 3:3, 4; Juda 18) Man aye oweko i kare me Baibul, pe jo ducu ma guneno tango gudongo niye. (Wel 14:11; Jon 12:37) Cwiny maleng pa Lubanga nyako nyig me niye i cwiny jo ma gimaro ada keken.​—Gal. 5:22; 2 Tec. 2:10, 11.

Kabaka Daudi tye i kin jo ma gunyuto niye matek adada. (Ibru 11:32, 33) Kadi bed kit meno, pe omegi Daudi ducu gunyuto niye matek. Me labolle, tam i kom Eliab, omin Daudi maditte. I kare ma Goliac obedo ka yeto jo Icrael, Daudi onyuto miti me lweny kwede. Eliab odaa i wi Daudi pi lok meno dok man onyuto ni Eliab onongo pe ki niye i kom Jehovah. (1 Cam. 17:26-28) Pe tye ngat mo ma kinywalo ki niye dok pe watwero lako niye ki bot lunyodowa, pi meno niye pa Daudi obino macalo adwogi me watte maber ki Lubanga.

I Jabuli cura 27, Daudi onyuto kit ma en odongo kwede niye matek meno. (Tyeng 1) Daudi olwodo lok i kom jami mutimme i kwone ki kit ma Jehovah otero kwede lumonene. (Tyeng 2, 3) En onyuto pwoc pi yub me woro ma Jehovah oketo. (Tyeng 4) Daudi onongo woro Lubanga kacel ki luye luwote i kema me woro. (Tyeng 6) En onongo yenyo kony pa Jehovah i lega. (Tyeng 7, 8) Daudi bene onongo mito ni kipwonye i yo pa Lubanga. (Tyeng 11) Niye onongo pire tek adada bot Daudi ma oweko en openyo ni: “Onongo abibedo kwene ka onongo ape ki niye?”​—Tyeng 13 (NW).

Itwero bedo ki niye calo pa Daudi ka ilubo tam ki yo me kwo ma kiryeyogi i Jabuli 27. Kit macalo niye jenge i kom ngec matir, ka iwoto ki kwano Lok pa Lubanga ki bukkewa ma jenge i Baibul, ci bidoko yot boti me nyuto nyig man ma nyak pi cwiny pa Lubanga. (Jab. 1:2, 3) Kwany kare me lwodo lok ka itye ka kwan. Lwodo lok tye calo ngom ka ma pwoc dongo iye. Ka pwocci pi Jehovah woto ki dongo, ci mitini me keto niye i tic bene bidongo, kun nongo inyuto man ki woro en i cokke kacel ki tito genni bot jo mukene. (Ibru 10:23-25) Medo i kom meno, wanyuto niye ka ‘walego jwijwi ma pe waol.’ (Luka 18:1-8) Pi meno, “wuleg Lubanga ma pe wukeng,” kun wugeno ni ‘en paro piwu.’ (1 Tec. 5:17; 1 Pet. 5:7) Niye miyo watimo gin ma atir, dok ka watimo gin ma atir, niyewa dongo bedo matek.​—Yak. 2:22.

I otyeno ma peya en oto, Yecu otito ki lupwonnyene ni: “Wuye Lubanga, wuye an  bene.” (Jon 14:1) Pi meno, mitte ni wabed ki niye pe i kom Jehovah keken ento wa i kom Yecu bene. Itwero bedo ki niye i kom Yecu nining? Kong wanenu yo ma romo adek.

Me acel, ter ginkok calo mic ma Lubanga omiyo piri. Lakwena Paulo owacci: “Abedo kwo pi ye Wod pa Lubanga, ma ceng omara ka omine gire pire kene pira.” (Gal. 2:20) Ka itye ki niye i kom Yecu, nongo iye ni ginkok-ki twero konyi, obedo gin ma Lubanga jenge iye me weko balli, mini gen me kwo pi naka dok obedo gin ma moko ni Lubanga tye ki mar madit piri. (Rom. 8:32, 38, 39; Ep. 1:7) Man bijingo cwinyi pe me bedo ki tam maraco i komi kekeni.​—2 Tec. 2:16, 17.

Me aryo, nyikke cok bot Jehovah i lega, ma man twere pi ginkok pa Yecu. Pi ginkok, waromo lega bot Jehovah “ki tekcwiny, . . . wek otimwa kica, wanong bene kica ma konyowa i kare ma mitte.” (Ibru 4:15, 16; 10:19-22) Lega miyowa kero me loyo atematema me timo bal.​—Luka 22:40.

Me adek, winy Yecu. Lakwena Jon ocoyo ni: “Dano ma ye Wod tye ki kwo ma pe tum; ngat ma pe winyo dog Wod, pe bineno kwo, ento kiniga pa Lubanga bedo i kome.” (Jon 3:36) Nen ni lakwena Jon onyuto ni olungtuke me bedo ki niye aye kwero bedo lawiny. Pi man, inyuto niye i kom Yecu ka iwinyo doge. Winy Yecu ki lubo “cik pa Kricito,” ma meno obedo pwony ki cik ducu ma en omiyo. (Gal. 6:2) Iwinyo bene Yecu ka ilubo tira ma en miyo kun wok ki bot “lagwok ot ma lagen.” (Mat. 24:45) Ka ibedo lawiny bot Yecu, ibibedo ki kero me ciro atematema madongo calo yamo kot magwar.​—Luka 6:47, 48.

Nino mo laco mo odange bot Yecu ni: “Aye; kony niyena ma lam-mi!” (Mar. 9:24) Laco-ni onongo tye ki niye mo manok, ento ki mwolo en oye ni myero kimed niyene. Calo laco man, wan ducu wabikato ki i kwo ma nongo mito ni kimed niyewa. Dok wan ducu watwero jingo niyewa wek obed matek kombeddi. Kit ma waneno kwede, watwero jingo niyewa ka wakwano lok pa Lubanga dok walwodo, dok man bidongo pwocwa pi Jehovah. Niyewa bene twero doko tek ka​—wan kacel ki luye luwotwa—​waworo Jehovah, watito pi genwa bot dano mukene, dok walego Lubanga ma pe wakeng. Medo i kom meno, ka wajingo niyewa, wanongo mot ma pud dong ber loyo. Lok pa Lubanga cuko cwinywa ni: “Luwota, wudong matek i niyewu maleng twatwal-li, . . . [wek] wugwokke kenwu i mar pa Lubanga.”​—Juda 20, 21.