1. Deyo madit ango ma watye kwede?

PUD dong watye ki deyo madit ya me bedo i kacokke pa Jehovah! Wabedo ki kuc kacel ki yomcwiny madit ka waworo Jehovah kacel ki omege ki lumegiwa i kacokke. Tic ango ma in itye kwede i kacokke?

2. Lapor ango ma lakwena Paulo otiyo kwede i waraga mapatpat ma en ocoyo?

² Watwero nongo pwony mapol ki i lapor ma lakwena Paulo otiyo kwede tyen mapol i waraga mapatpat ma en ocoyo. I waraga magi ducu, Paulo oporo kacokke ki kom dano. En bene oporo ngat acel acel ma i kacokke ki dul kom mapatpat.​—Rom. 12:4-8; 1 Kor. 12:12-27; Ep. 4:16.

3. Jami adek mene ma wabinyamogi i pwony man?

³ I pwony man, wabinyamo jami adek ma pigi tek ma wapwonyo ki i lapor ma Paulo otiyo kwede-ni. Mukwongo, wabipwonyo ni wan ducu ki acel acel watye ki tic * i kacokke pa Jehovah. Me aryone, wabinyamo gin ma watwero timo ka wanongo ni tek me ye ni konywa tye i kacokke. Ki me adek, wabinyamo pingo omyero wati matek me cobo tic ma Jehovah omiyo botwa i kacokke.

4. Jo Roma 12:4, 5 pwonyowa gin ango?

⁴ Pwony mukwongo ma watwero nongo ki i lapor pa Paulo aye ni wan ducu ki acel acel watye ki tic macalo jo me ot pa Jehovah. Paulo ocako laporre ki waco ni: “Watye ki dul komwa mapol i kom acel, dul kom magi bene pe gitiyo kit tic acel keken; kit meno, wan bene kadi bed wapol, wan kom acel i Kricito, ma dano acel acel bedo calo dul kom lawote.” (Rom. 12:4, 5) Paulo onongo tye ka lok i kom ngo? Ngat acel acel i kinwa tye ki tic mapat i kacokke ento wan ducu piwa tek.

5. “Mot” ango ma Jehovah omiyo bot kacokke?

⁵ Ka itamo i kom jo ma gitye ki tic i kacokke, wi twero ringo i kom jo ma gitelo wi kacokke. (1 Tec. 5:12; Ibru 13:17) Tye lok ada gire ni Jehovah otiyo ki Kricito me miyo “mot ma gubedo dano” bot Kacokkene. (Ep. 4:8, NW) I kin ‘mot ma gubedo dano-ni’ tye iye lumemba me Lukiko Madit, omege ma kicimogi macalo lukony kor Lukiko Madit, lumemba me Komitti me Jang Gang Kal, luneno me adwol, omege ma gipwonyo cukul mapatpat, luelda me kacokke, ki lukony kor tic. Omege magi ducu cwiny maleng aye ocimogi wek gugwok romi pa Jehovah ma en maro dok guti pi kacokke.​—1 Pet. 5:2, 3.

6. Ma lubbe ki 1 Jo Tecalonika 2:6-8, gin ango ma omege ma cwiny maleng ocimogi gitute me timone?

⁶ Omege ma cwiny maleng ocimogi gicobo tic mapatpat i kacokke. Kit macalo dul komwa mapatpat, calo cingwa ki tyenwa, gitiyo me konyo komwa ducu, omege ma cwiny maleng ocimogi bene gitiyo matek me konyo jo ducu me kacokke. Pe giyenyo deyo pigi kengi. Me kaka meno, gitute me dongo ki jingo omege ki lumege. (Kwan 1 Jo Tecalonika 2:6-8.) Wapwoyo Jehovah pi omege magi ma gupore pi tic dok giketo miti pa jo mukene bedo mukwongo!

7. Mot ango ma jo ma gitiyo pi kare malac ginongo?

⁷ Jo mogo me kacokke kitwero cimogi me tic macalo lumiconari, painia keken, nyo painia marii. Ki lok ada, omege ki lumege mapol i twok lobo-ni lung guweko tic me tito kwena ki loko dano odoko tic ma gitimo pi kare malac. Pien gutimo meno, gukonyo jo mapol me doko lulub kor Kricito. Kadi bed lutit kwena pi kare malac pol kare gitye ki jami me kom manok, Jehovah minigi jami mabeco mapol i kwogi. (Mar. 10:29, 30) Wamaro omege ki lumege magi matek, dok watye ki pwoc ni gitye i kacokke!

8. Pingo lutit kwena ducu pigi tek bot Jehovah?

⁸ Tika omege ma kicimogi ki jo ma gitye i tic pi kare malac keken aye gitye ki tic i kacokke? Pe tye kit meno! Lutit kwena ducu pigi tek bot Lubanga ki bot kacokke bene. (Rom. 10:15; 1 Kor. 3:6-9) Ki lok ada, tic ma pire tek loyo ma kacokke tye kwede aye me loko dano wek gudok lulub kor Rwotwa, Yecu Kricito. (Mat. 28:19, 20; 1 Tem. 2:4) Jo ducu ma gitito kwena, kadi bed gunongo batija nyo pudi, omyero guket tic man obed gin ma pire tek loyo i kwogi.​—Mat. 24:14.

9. Pingo wamaro lumegiwa me kacokke?

⁹ Jehovah nyuto deyo bot lumege ki minigi tic ma pire tek i kacokke. En maro mon odi, mege, mon to, ki lumege  ma wigi nono ma gitiyo pire ki gen. Baibul loko i kom mon mapol ma gunyuto kit mabeco dok guyomo cwiny Lubanga. Mon magi kipwoyogi pi bedo lanen maber me ryeko, niye, tekcwiny, yot cing, ki tiyo tic mabeco. (Luka 8:2, 3; Tic 16:14, 15; Rom. 16:3, 6; Pil. 4:3; Ibru 11:11, 31, 35) Pud dong watye ki pwoc madit bot Jehovah pi mon ma i kacokkewa, ma ginyuto kit mabeco magi!

10. Pingo wamaro jo muteggi ma gitye i kacokke?

¹⁰ Cwinywa yom ni watye ki jo muteggi mapol i kacokke. I kacokke mogo, gitye ki omege ki lumege ma gutii ma dong gutiyo pi Jehovah pi kwogi ducu. Jo mutii mukene pud gupwonyo ada cokcok-ki. Kadi bed guri i ada nyo pud ginyen, jo muteggi magi giyelle ki two mapol ma bino pi tiyo. Pekki magi twero gengogi ki cobo tic mapol i kacokke ki i tito kwena. Kadi bed kit meno, jo muteggi magi gitute me timo gin ma gitwero i tic me pwony, dok gitiyo ki kero ma gitye kwede me pwonyo ki cuko cwiny jo mukene! Dok wanongo adwogi maber ki i ngecgi. Pud dong gimwonya adada bot Jehovah ki botwa bene!​—Car. 16:31.

11-12. Jo matino ma i kacokkewu dong gucuko cwinyi nining?

¹¹ Tam kong doki i kom jo matino ma watye kwedgi i kacokke. Girwatte ki pekki mapol ka giwoto ki dongo i lobo man marac ma Catan Larac-ci aye tye ka doro dok opong ki tamme maraco. (1 Jon 5:19) Kadi bed kit meno, wan ducu wanongo cuko cwiny ka waneno jo matino magi gimiyo lagam i cokke, ginywako i tic me pwony, dok gicung matek pi niyegi. Ada, wun jo matino, wutye ki tic ma pire tek i kacokke pa Jehovah!​—Jab. 8:2.

¹² Ento omegiwa ki lumegiwa mukene ginongo tek adada me ye ni pigi tek i kacokke. Ngo ma romo konyo wan ducu ki acel acel me winyo ni watye ki tic ma pire tek i kacokke? Kong wanenu.

13-14. Pingo jo mukene giromo cako tamo ni pigi pe tek i kacokke?

¹³ Nen kong pwony me aryone ma watwero nongo ki i lapor pa Paulo. En oloko i kom peko mo ma jo mapol gitye kwede i kare-ni; ginongo tek adada me ye ni pigi tek i kacokke. Paulo ocoyo ni: “Ka kono tyen wacci, ‘Pien an pe a cing, an pe a dul kom,’ meno pe genge bedo dul kom. Ka kono it wacci, ‘Pien pe a wang, an pe a dul kom,’ meno pe genge bedo dul kom.” (1 Kor. 12:15, 16) Ngo ma onongo Paulo tye ka pwonyowa?

¹⁴ Ka ibedo ka porre ki jo mukene me kacokke, ci itwero cako tamo ni piri pe tek i kacokke. Jo mogo i kacokke gitye lupwonye mucwiny, mukene gingeyo yubo yub maber, nyo gingeyo cuko cwiny jo mukene. Twero bedo ni iwinyo calo pe itye ki diro magi i rwom ma lamal calo gin. Man nyuto ni ibedo ngat mamwol. (Pil. 2:3) Ento myero igwokke. Ka kare ducu ibedo ka porre ki jo ma gitye ludiro adada, ci man twero turo cwinyi. Kit ma Paulo otito kwede, iromo cako tamo ni konyi pe i kacokke wacel. Gin ango ma twero konyi me lweny ki kodi tam magi?

15. Ma lubbe ki 1 Jo Korint 12:4-11, ngo ma omyero waniang iye madok i kom mot mo keken ma watye kwede?

¹⁵ Tam kong dok i kom lok ada man: Jehovah omiyo ki Lukricitayo mogo me cencwari me acel cwiny maleng ma oweko gubedo ki mot me timo tango mapatpat, pe gin ducu gubedo ki mot marom. (Kwan 1 Jo Korint 12:4-11.) Jehovah ominigi mot ki diro mapatpat, ento Lakricitayo acel acel onongo pire tek bote. I kare-ni, cwiny maleng pe weko watimo tango. Ento lok man pud gudowa. Pe watye ki diro marom, ento wan ducu piwa tek bot Jehovah.

16. Tira mene ma lakwena Paulo omiyo ma mitte ni waket i tic?

¹⁶ Me kaka bedo ka pore ki Lukricitayo  mukene, omyero waket i tic tira pa lakwena Paulo ma waco ni: “Dano acel acel kong ongi ticce kene ka ber, meno miyo tyen lok me wakkene bedo pi ticce kikome ma en otiyo, ma pe dok poro ki tic pa lawote.”​—Gal. 6:4.

17. Adwogi maber ango ma wanongo ka walubo tira pa lakwena Paulo?

¹⁷ Ka walubo tira ma Paulo omiyo-ni kun wangine kekenwa, ci watwero cako niang ni watye ki mot kacel ki diro ma jo mukene gipe kwede. Me labolle, twero bedo ni laelda moni pe miyo pwony mamit ka tye i wi abam, ento nongo en ladiro adada i tic me pwony ki loko dano me doko lulub kor Kricito. Nyo twero bedo ni en pe obedo ngat ma yubo jamine kore ki kore ka kiporo ki luelda mukene me kacokkene, ento nongo en laelda ma lamar dok lakica ma omege ki lumege giwinyo agonya me penye pi kony. Nyo romo bedo ni en ngene adada macalo ngat ma jolo wele. (Ibru 13:2, 16) Ka wangeyo kerowa ki motwa, ci wabibedo ki yomcwiny pi tic ma watimo pi kacokke. Dok nyeko pe bimakowa i kom omege ma gitye ki mot mapat ki mewa.

18. Watwero doko lupwonye mucwiny nining?

¹⁸ Labongo paro pi tic ma watye kwede i kacokke, wan ducu omyero watute me dongo dirowa ki medo ticwa. Me konyowa wek wamedde ki dongo, Jehovah tiyo ki dulle me miniwa pwonnye mamwonya. Me labolle, i cokkewa me dye cabit, wanongo tira ma konyowa me dongo dirowa i tic me pwony. Tika itye ka tute matek me tic ki tira ma inongo i cokke meno?

19. Itwero cobo yubbi me cito i Cukul pi Lutit Kwena me Ker-ri nining?

¹⁹ Yub mukene me pwony mamwonya adada obedo Cukul pi Lutit Kwena me Ker-ri. Cukul man doggolane tye twolo bot omege ki lumege ma gitye i tic pi kare malac dok mwakagi tye i kine ka 23 me o 65. Man twero nen boti calo yub ma pe itwero cobone kulu. Ento me kaka ryeyo tyen lok mumiyo pe itwero cito i cukul man, pingo pe irye tyen lok mumiyo imito cito iye? I nge meno, cak keto yub ma twero konyi me bedo ma ipore. Ki kony pa Jehovah kacel ki tic matek ki tung boti, gin ma onongo nen calo pe twere, bitwere.

20. Pwony ango ma wanongo ki i Jo Roma 12:6-8?

²⁰ Pwony me adek ma wanongo ki i lapor pa Paulo tye i Jo Roma 12:6-8. (Kwan.) Ki kany, Paulo dok onyuto ni jo me kacokke gitye ki mot mapatpat. Ento i tyeng magi en onwoyo ni omyero wati ki mot mo keken ma watye kwede me jingo kacokke.

21-22. Pwony ango ma wanongo ki bot omegiwa Robert ki Felice?

²¹ Tam kong i kom labol pa omego mo ma wabilwongo ni Robert. I nge tic i lobo mukene pi kare mo, kidwoke cen i lobogi me tic i Betel. Kadi bed ni omege gutitte ni alokaloka man pe obino pien en otimo gin mo marac, en owaco ni: “Pi dwe mapol cwinya onongo pe yom pien onongo atamo ni pe acobo ticca kakare. Onongo tye kare mogo ma amito juko ticca i Betel woko.” Ngo ma okonye me bedo ki yomcwiny doki? Laelda lawote mo opoyo wiye ni Jehovah opwonyowa i tic ma watiyo con wek wabed ma watwero cobo tic ma watye kwede kombeddi maber. Robert oniang ni omyero ewek  keto cwinye i kom jami mukato angec ci ecak keto cwinye i kom gin ma etwero timone kombeddi.

²² Omego Felice Episcopo bene okato ki i ariya marom. En kacel ki dakone gutyeko kwan i cukul me Gilead i mwaka 1956 dok gutiyo tic me limo adwol i lobo Bolivia. I mwaka 1964, gunywalo latin. Felice owaco ni: “Obedo tek adada me weko tic ma wamaro. Aye ni, pi mwaka acel kulu abedo ma cwinya otur adada. Ento ki kony pa Jehovah, aloko nenona ci acako keto cwinya i mot me ticca manyen macalo lanyodo.” Tika iwinyo calo omego Robert nyo Felice? Tika cwinyi tur pien i kare-ni ipe ki mot me tic ma yam onongo itye kwede? Ka tye kit meno, ibibedo ki yomcwiny ka iloko nenoni dok icako keto cwinyi i kom gin ma itwero timone kombeddi me tic pi Jehovah ki omege. Medde ki tic matek, kun itiyo ki motti kacel ki dironi me konyo jo mukene, ci ibinongo yomcwiny kun nongo iwoto ki dongo kacokke.

23. Gin ango ma omyero wakwany kare me timone, dok ngo ma wabineno i pwony ma lubo man?

²³ Ngat acel acel i kinwa pire tek bot Jehovah. En mito ni wabed jo me ode. Ka wakwanyo kare me lwodo kit ma watwero dongo kwede omege ki lumege kun watiyo matek me cobone, ci pe wabiwinyo calo piwa pe tek i kacokke! Ento kit ma waneno kwede jo mukene me kacokke kono? Watwero nyuto nining ni wamaro dok waworogi? I pwony ma lubo man, wabineno lok ma pire tek meno.