1. Pingo Jehovah ocweyo jami ma kwo?

I KARE MO, Jehovah onongo tye kene. Ento en onongo pe bedo kic kic. Pe mitte ni Jehovah omyero obed ki ngat mo wek obed ki yomcwiny. Kadi bed kit meno, Lubanga onongo mito ni jo mukene gunong mit pa kwo. Mar otugo cwiny Jehovah me cako cweyo jami.​—Jab. 36:9; 1 Jon 4:19.

2. Yecu ki lumalaika guwinyo nining i kare ma Jehovah ocweyo jami mukene-ni?

² Me acel, Jehovah ocweyo Wode, Yecu. Ka dong, en otiyo ki Wode me kayo man me ‘cweyo jami mukene-ni ducu,’ ma i kine tye iye lumalaika bene. (Kol. 1:16) Yecu cwinye obedo yom me tic kacel ki Wonne. (Car. 8:30) Dok lumalaika bene cwinygi obedo yom adada. Guneno ki wanggi kit ma Jehovah ki Ladiro Ticce Yecu, gucweyo kwede polo ki lobo. Lumalaika gudok iye nining? Gin ‘gudange ki yomcwiny’ i kare ma kicweyo lobo, dok ngene kene ni gumedde ki pako Jehovah i kare ma en ocweyo jami mukene-ni, tutwalle dano. (Yubu 38:7; Car. 8:31) Cwec magi ducu ginyuto mar ki ryeko pa Jehovah.​—Jab. 104:24; Rom. 1:20.

3. Kit ma kinyuto kwede i 1 Jo Korint 15:21, 22, ngo ma ginkok pa Yecu oweko twere?

³ Yub pa Jehovah onongo tye ni dano gunong kwo ma pe tum i lobo mamwonya ma en ocweyo pigi. Ento i kare  ma Adam ki Kawa gujemo i kom Wongi ma lamar-ri, onongo dong pe gitwero kwo pi naka. Gin kacel ki lutinogi onongo dong gibito woko. (Rom. 5:12) Jehovah odok iye nining? Cutcut, en otito kit ma ebilaro kwede dano. (Acak. 3:15) Jehovah onongo bimiyo Wode, Yecu, macalo ginkok wek otwere pi lutino pa Adam ki Kawa me bedo angonya ki i kom bal ki to. En onongo dong twero miyo kwo ma pe tum bot ngat acel acel ma yero me tic pire.​—Jon 3:16; Rom. 6:23; kwan 1 Jo Korint 15:21, 22.

4. Lapeny ango ma wabinyamo i pwony man?

⁴ Cikke pa Lubanga me cero jo muto weko wabedo ki lapeny mapol. Me labolle, nicer nen calo bitimme nining? Tika wabiniang i kom jowa me amara ma kibicerogi? I yo ma nining ma nicer bikeliwa yomcwiny? Dok lwodo lok i kom nicer twero konyowa nining me dongo pwoc pi mar, ryeko, ki diyo cwiny pa Jehovah? Kong dong wanyamu lapeny magi.

5. Pingo watwero bedo ki gen ni dano ducu ma guto pe kibicerogi lawangacel?

⁵ Ka Jehovah ocako tic ki Wode me cero dano milion mapol ma guto, watwero bedo ki gen ni pe kibicero dano ducu lawangacel. Pingo? Pien ka wel dano omedde matek lawangacel, man twero kelo anyobanyoba i wi lobo. Dok Jehovah pe timo gin mo keken ma kelo anyobanyoba. En ngeyo ni wek kuc obed tye, mitte ni kitim jami ducu kore ki kore. (1 Kor. 14:33) Lubanga Jehovah onyuto ryeko ki diyo cwiny i kare ma en otiyo kacel ki Yecu me yubo lobo-ni mot mot wek obed mupore pi dano me kwo iye. Yecu bene binyuto ryeko ki diyo cwiny i kare  me Loc me Mwaka Alip ka en tiyo kacel ki jo ma gubwot ki i Armagedon kun giyubo odi, cam, bongi ki jami mukene ma mitte pi jo ma kicerogi.

6. Ma lubbe ki Tic pa Lukwena 24:15, angagi ma gibibedo i kin dano ma Jehovah bicerogi?

⁶ Gin ma pire tek loyo ma jo ma gibibwot ki i Armagedon gibitimone me gwoko jo ma kicerogi aye pwonyogi lok i kom Ker pa Lubanga ki mitine. Pingo? Pien pol pa dano ma kibicerogi gibibedo i kin “jo ma kitgi pe atir.” (Kwan Tic pa Lukwena 24:15.) Bimitte ni gutim alokaloka mapol i kwogi wek gunong mot ki i ginkok pa Yecu. Go kong tic ducu ma bimitte me pwonyo lok ada bot dano milion mapol ma pe gitye ki ngec mo keken i kom Jehovah. Tika ngat acel acel bibedo ki lapwonye i yo ma rom aroma ki kit ma wakwano kwede Baibul ki dano i kare-ni? Tika jo manyen magi kibiketogi i kacokke mapatpat kun ginongo pwonnye wek gin bene gupwony jo ma kibicerogi i nge gin? Omyero wakur wek wanen. Kadi bed kit meno, wangeyo ni, i agikki me Mwaka Alip Acel me Loc pa Yecu, “lobo ducu bipong ki ngec pa Rwot [Jehovah].” (Ic. 11:9) Pud dong wabibedo ki tic mapol ma yomo cwinywa ya pi mwaka alip acel meno!

7. Pingo jo pa Lubanga gibibedo ki kica ka giwoto ki pwonyo jo ma kicerogi?

⁷ I kare me loc me Mwaka Alip Acel pa Kricito, jo pa Jehovah ducu gibimedde ki timo alokaloka i kwogi wek guyom cwinye. Pi meno, gin ducu gibinyuto kica ka giwoto ki konyo jo ma kicerogi me lweny ki tam kacel ki miti maraco ki me kwo ma lubbe ki rwom me kwo pa Jehovah. (1 Pet. 3:8) Jo ma kicerogi gibineno ni jo pa Jehovah gimwol dok pud gitye ka medde ki timo alokaloka wek giyom cwiny Jehovah kun bene ‘gitiyo tic me cobo larregi.’​—Pil. 2:12.

8. Pingo watwero bedo ki gen ni jo ma gibijolo wadigi ki luremgi ma kibicerogi gibiniang i komgi?

⁸ Watye ki tyen lok mapol me bedo ki gen ni jo ma gibijolo jogi me amara ma kicerogi gibibedo ki kero me niang i komgi. Me labolle, ka watamo i kom nicer ma otimme con, watwero bedo ki gen ni Jehovah bicweyo komgi odoco ma nongo kit ma ginen, giloko, dok gitamo kwede rom ki kit ma onongo gitye kwede i kare ma peya guto. Wi opo ni Yecu oporo to ki nino dok oporo nicer ki coyo dano ki i wang nino. (Mat. 9:18, 24; Jon 11:11-13) Ka ngat moni oco ki i wang nino, kit ma en nen kwede, lokke ki jami ma wiye po iye nongo pe olokke. Tam kong i kom labol pa Lajaro. En onongo oto pi nino angwen, pi meno kome onongo ocako top woko. Ento i kare ma Yecu ocero Lajaro, lumegine guniang i kome cutcut, dok Lajaro bene wiye opo i komgi.​—Jon 11:38-44; 12:1, 2.

9. Pingo jo ma kibicerogi pe gibibedo labongo roc i tamgi ki komgi cutcut ma kicerogi?

⁹ Jehovah ocikke ni pe tye ngat mo ma bibedo i te loc pa Kricito ma biwaco ni: “An koma lit.” (Ic. 33:24; Rom. 6:7) Pi meno, jo ma kibicerogi Lubanga bicweyo pigi kom manyen ma two nyo goro mo pe iye. Ento, pe gibibedo labongo roc cutcut ma kicerogi. Ka otimme kit meno, ci wadigi kacel ki luremgi pe gibiniang i komgi. Nen calo roc bia ki i kom dano motmot i kare me Loc me Mwaka Alip Acel pa Kricito. Yecu bidwoko Ker-ri cen  bot Wonne i agikki me Mwaka Alip Acel. I kare meno, nongo dong Ker-ri ocobo tic ducu ma Jehovah mito, ma i kine tye iye kwanyo roc ki i kom dano.​—1 Kor. 15:24-28; Yabo 20:1-3.

10. Nicer biweko iwinyo nining?

¹⁰ Go kong kit ma ibiwinyo kwede me jolo joni me amara odoco. Tika yomcwiny ma ibiwinyo biweko inyero nyo ikok akoka? Tika ibicako wero wer me pako Jehovah? Wangeyo labongo akalakala mo ni, wabibedo ki mar madwong pi Wonwa ma lamar-ri ki Wode ma guweko nicer twere.

11. Ma lubbe ki lok pa Yecu ma kicoyo i Jon 5:28, 29, gin ango ma bitimme i kom jo ma gibibedo luwiny bot Lubanga?

¹¹ Go kong yomcwiny ma jo ma kicerogi gibibedo kwede ka giwoto ki weko kwogi macon ki ticce ducu kun gitute me lubo rwom me kwo pa Lubanga. Jo ma gibitimo alokaloka magi gibidonyo i cer me kwo. Ki tungcel, jo ma gibijemo i kom Lubanga pe kibiye ni gumedde ki kwo i Paradic.​—Ic. 65:20; kwan Jon 5:28, 29.

12. I yo ma nining ma Jehovah bigoyo laane i kom jo ducu ma i lobo?

¹² I te loc me Ker-ri, Carolok 10:22 bicobbe i kom jo pa Lubanga ducu. Tyeng man waco ni: “Ka Rwot [Jehovah] omiyo gum, dano doko lalonyo; Rwot pe medo cwercwiny i kom gin ma en omiyo.” Ki kony pa cwiny maleng pa Jehovah, jo pa Lubanga gibidoko lulonyo i yo me cwiny, ma te lokke ni, gibimedde ki bedo calo Kricito dok roc bia ki i komgi motmot. (Jon 13:15-17; Ep. 4:23, 24) Nino ki nino, yot komgi biyubbe dok kitgi bidoko ber medde ameda. Kwo pud dong bibedo mit ya i kare meno! (Yubu 33:25) Ento, lwodo lok i kom nicer bikonyi nining kombeddi?

13. Ma lubbe ki Jabuli 139:1-4, nicer nyuto nining ni Jehovah ngeyowa maber adada?

¹³ Kit ma wanyamo kwede con, i kare ma Jehovah bicero dano, en bidwokogi cen ma nongo jami ma wigi po iye, tamgi, ki kitgi pe olokke. Tam kong iye. Jehovah mari matek adada mumiyo en keto cwinye me ngeyo jami ducu ma itamo, iwinyo, iwaco dok itimo. Pi meno, ka mitte ni en oceri, en biceri ki tam kacel ki kiti ducu ma onongo itye kwede con. Kabaka Daudi onongo ngeyo ni Jehovah ngeyowa ki acel acel maber adada. (Kwan Jabuli 139:1-4.) Niang kit ma Jehovah ngeyowa kwede twero gudowa nining?

14. Tamo i kom kit ma Jehovah ngeyowa kwede maber omyero ogudwa nining?

¹⁴ Ka walwodo kit ma Jehovah ngeyowa kwede maber, pe omyero wabed ki par mo. Pingo? Wi opo ni, Jehovah paro piwa matek. En neno ngat acel acel i kinwa calo pire tek bote. En keto cwinye i kom jami ducu ma wakato ki iye i kwowa. Lok man pud dong kweyo cwinywa ya! Pe omyero wawiny calo watye kenwa. Cawa ducu nongo Jehovah tye kwedwa kun yenyo kare me konyowa.​—2 Tekwaro 16:9.

15. I yo ma nining ma genwa me nicer nyuto kwede ryeko pa Lubanga?

¹⁵ Ka dano gilworo to, lumonegi twero diyogi me timo jami ma onongo pe gitwero timo kun gibwurogi ki to. Jo ma gitye i te loc pa Catan gitiyo ki lworo man me diyo dano wek gudot luwotgi nyo gutim gin ma gingeyo ni rac. Ento bwura meno  pe tiyo i komwa. Wangeyo ni ka lumonewa gunekowa, Jehovah bidwokowa cen i kwo. (Yabo 2:10) Watye ki gen ni pe tye gin mo keken ma twero gengowa ki tic pi Jehovah. (Rom. 8:35-39) Jehovah pud dong onyuto ryeko ya ki miniwa gen me nicer! Pi gen meno, wan pe walworo jo pa Catan ka gubwurowa ni gibinekowa woko ka pe watimo gin ma gimito. Medo i kom meno, gen man miniwa tekcwiny me bedo lugen bot Jehovah.

16. Lapeny mene ma omyero ipennye kwede, dok lagammi pi lapeny magi twero konyi nining me ngeyo ka igeno Jehovah?

¹⁶ Ka lumone pa Jehovah gucako mini bwura ni gibineki, tika ibibedo ki gen matek ni Jehovah biceri? Itwero ngeyo nining ka ibigeno Jehovah nyo pe? Yo acel aye ki pennye kekeni ni: ‘Tika tam ma amoko i jami matino tino nino ducu nyuto ni ageno Jehovah?’ (Luka 16:10) Lapeny mukene twero bedo ni, ‘Tika kit ma atiyo kwede ki cawa kacel ki centena nyuto ni ageno cikke pa Jehovah me mina jami ma mitte pi kwo ka aketo pi Ker-ri bedo mukwongo?’ (Mat. 6:31-33) Ka lagammi pi lapeny magi tye ni eyo, ci nongo itye ka nyuto ni igeno Jehovah dok ibibedo ma iyubbe pi atematema mo keken ma ibirwatte kwede i anyim.​—Car. 3:5, 6.

17. (a) I yo ma nining ma nicer nyuto ni Jehovah diyo cwinye? (b) Watwero nyuto pwocwa nining pi diyo cwiny pa Jehovah?

¹⁷ Jehovah dong otyeko moko cawa ki nino ma ebityeko kwede lobo man marac-ci. (Mat. 24:36) Kome pe bimyel ci en kelo agikki ma karene peya oromo. En tye ki miti madit me cero jo ma guto, ento pud tye ka diyo cwinye. (Yubu 14:14, 15) En tye ka kuro wang ma kare mupore oromo me cerogi. (Jon 5:28) Watye ki tyen mapol me bedo ki pwoc pi diyo cwiny pa Jehovah. Tam kong: Pien Jehovah odiyo cwinye, oweko jo mapol, ma wan bene watye i kine, wabedo ki kare me ‘o i ningut.’ (2 Pet. 3:9) Jehovah mito ni jo mapol adada gubed ki kare me nongo kwo ma pe tum. Pi meno, omyero wanyut ni watye ki pwoc pi diyo cwiny pa Jehovah. Watimo man nining? Ki yenyo jo ma ‘myero me nongo kwo ma pe tum’ kun wakonyogi me maro Jehovah ki dok tic pire. (Tic 13:48) Ka watimo kit meno,  ci gin gibinongo adwogi maber ki i diyo cwiny pa Jehovah, kit ma wan bene wanongo.

18. Pingo omyero wadiyu cwinywa i kom jo mukene?

¹⁸ Jehovah bimedde ki diyo cwinye i komwa pi rocwa nio wa i agikki me mwaka alip acel. Nio wa i kare meno, Jehovah tye atera me timiwa kica pi balwa. Dong wan bene omyero walub lanenne kun waketo cwinywa i kom kit mabeco pa jo mukene dok wadiyo cwinywa i komgi. Tam kong labol pa laminwa mo ma cware ocako twoyo two wic ma kele par mukato kare, ci ojuko cito i cokke woko. Laminwa-ni owaco ni, “Man okela cwercwiny madit adada. Yubwa pi anyim macalo jo me ot oballe woko.” Kadi bed kit meno, laminwa ma lamar-ri omedde ki diyo cwinye i kom cware. En ojenge i kom Jehovah dok pe oilo cinge woko. Calo Jehovah, en bene pe oketo cwinye i kom peko man ento i kom kit mabeco ma cware tye kwede. En owaco ni, “Cwara tye ki kit mabeco, dok en tye ka tute motmot me lweny ki two man.” Pud dong pire tek ya ni omyero wadiyu cwinywa i kom jo me odiwa nyo kacokkewa ma gitye ka lweny ki ariya madongo!

19. Ngo ma omyero wamok tamwa me timone?

¹⁹ Yecu ki lumalaika gubedo ki yomcwiny madit adada i kare ma kicweyo lobo. Ento go kong yomcwiny ma gibibedo kwede me neno ka lobo-ni opong ki dano ma gipe ki roc dok gimaro Jehovah kun gitiyo pire. Go kong yomcwiny ma jo ma gibicito i polo ka loc ki Kricito gibibedo kwede ka gineno dano ma i lobo ginongo adwogi maber ki i ticgi. (Yabo 4:4, 9-11; 5:9, 10) Dok igo ni itye ka kwo i kare ma dano gibibedo ka kok pi yomcwiny ento pe pi arem, dok two, cwercwiny, ki to nongo dong pe matwal. (Yabo 21:4) Nio wa i kare meno, mok tammi me lubo lanen pa Wonwa ma lamar, ryek, dok diyo cwinye. Ka itimo kit meno, ci ibibedo ma cwinyi yom, kadi bed ikat ki i ariya ma nining. (Yak. 1:2-4) Pud dong watye ki pwoc ya pi cikke pa Jehovah ni “dano gibicer woko”!​—Tic 24:15.