1. Gin ango ma Jehovah omiyo bot laticce acel acel ma lagen?

JEHOVAH omiyo tic ki ngat acel acel ma tye i kacokkene. Kadi bed watye ki tic mapatpat, wan ducu piwa tek dok wajenge i kom luwotwa. Lakwena Paulo okonyowa me niang pwony ma pire tek man. I yo ma nining?

2. Ma lubbe ki Jo Epeco 4:16, pingo omyero water ngat acel acel ni pire tek dok wati kacel?

² Kit ma kitito kwede i ginacoya ma pwony man jenge iye, lakwena Paulo onyuto ka maleng ni pe tye ngat mo i kinwa ma twero waco ki latic pa Jehovah mukene ni: “An pe amiti.” (1 Kor. 12:21) Wek kuc obed tye i kacokke, omyero water ngat acel acel ni pire tek dok wati kacel. (Kwan Jo Epeco 4:16.) Ka watiyo kacel ma wanote, dano ducu gibiwinyo ni kimarogi dok kacokke bibedo matek.

3. Ngo ma wabinyamo i pwony man?

³ I yo mene ma watwero nyuto kwede woro bot Lukricitayo luwotwa me kacokke? I pwony man, wabinyamo kit ma luelda gitwero nyuto kwede woro bot luelda luwotgi. I nge meno, wabinyamo kit ma watwero nyuto ni watero omege ki lumegiwa ma wigi nono ni pigi tek. Me agikkine, wabipwonyo kit ma watwero nyuto kwede pwoc pi jo ma pe giloko lebwa maber.

4. Tira mene ma Paulo omiyo i Jo Roma 12:10 ma omyero luelda gulubi?

⁴ Cwiny maleng pa Jehovah aye cimo luelda ducu me kacokke. Kadi bed kit meno, laelda acel acel tye ki mot kacel ki diro mapatpat. (1 Kor. 12:17, 18) Mogo pud kicimogi nyen dok gitye ki ngec manok. Mukene pe giromo cobo tic mapol pi peko me yotkom nyo tiyo. Kadi bed kit meno, laelda mo keken pe myero onen laelda lawote ci otam ni, “An pe amiti.” Me ka meno, laelda acel acel myero olub tira pa Paulo ma kicoyo i Jo Roma 12:10.​—Kwan.

5. Luelda gitwero nyuto nining ni giworo luelda luwotgi, dok pingo timo meno pire tek?

⁵ Luelda ginyuto ni giworo luelda luwotgi ka gitero itgi ka winyo lokgi. Man mitte tutwal ka luelda me kacokke gucokke kacel me nyamo lok ma pire tek. Pingo? Nen kong gin ma Wi Lubele me Oktoba 1, 1988, owaco, ni: “Luelda giniang ni Yecu twero tic ki cwiny maleng me konyo laelda mo keken me kacokke me tam i kom cik ma iye lac me Baibul ma twero konyo luelda luwote me niang gin me atima nyo moko tam ma pire tek. (Tic 15:6-15) Pe tye ni cwiny maleng tiyo i kom laelda acel keken.”

6. Ngo ma twero konyo luelda me tic kacel ma gunote, dok kacokke nongo adwogi maber ango ka gutimo meno?

⁶ Laelda ma woro luelda luwote pol kare pe bedo ngat mukwongo me lok i cokke pa luelda. En pe bedo ka lok i cawa ducu, dok pe tamo ni tamme aye tye atir kare ducu. Me kaka meno, en miyo tamme ki mwolo. En tero ite ka winyo lok pa jo mukene. Ma dong pire tek loyo ducu, en bedo atera me nyamo cik ma igi lac ma tye i Baibul dok lubo tira ma a ki bot “lagwok ot ma lagen dok maryek.” (Mat. 24:45-47) Ka luelda ginyuto mar ki woro pi luwotgi i kare me nyamo lokgi, ci cwiny maleng pa Lubanga bibedo tye kwedgi, dok bitirogi me moko tam ma jingo kacokke.​—Yak. 3:17, 18.

7. Yecu onongo neno jo ma pe gunyomme nining?

⁷ Kacokke me kare-ni tye ki jo munyomme kacel ki jo ma gitye ki lutino. Ento watye bene ki omegiwa ki lumegiwa mapol ma pe gunyomme. Omyero wanen jo ma wigi nono magi nining? Nen kong kit ma Yecu onongo neno kwede bedo ma wi nono. I kare ma Yecu tye i ticce me pwony i lobo, en pe onyomo. En obedo ma wiye nono kun keto cwinye i ticce. Yecu pe opwonyo ni Lukricitayo myero gunyomme nyo gubed ma wigi nono. Ento, en owaco ni Lukricitayo mogo onongo gibiyero me bedo ma wigi nono. (Mat. 19:11, 12.) Yecu onongo woro jo ma pe gunyomme. En pe oneno jo ma wigi nono calo jo ma rwomgi lapiny ka kiporogi ki jo munyomme, nyo calo gin mo orem i kwogi.

8. Ma lubbe ki 1 Jo Korint 7:7-9, ngo ma Paulo ocuko cwiny Lukricitayo me tam iye?

⁸ Calo Yecu, lakwena Paulo bene onongo wiye nono i kare me ticce me pwony. Paulo opwonyo ni pe rac ka Lakricitayo onyomme. En oniang ni man obedo tam ma ngat acel acel aye moko pire kene. Kadi bed kit meno, Paulo ocuko cwiny Lukricitayo me tamo ka giromo tic pi Jehovah macalo jo ma wigi nono. (Kwan 1 Jo Korint 7:7-9.) Labongo akalakala mo, Paulo pe ocayo Lukricitayo ma wigi nono. Ki lok ada, en oyero Temceo, omego ma wiye nono, me cobo tic ma pigi tego i dul pa Jehovah. * (Pil. 2:19-22) Dong nen ka maleng ni, pe ber me tamo ni omego moni opore nyo pe opore pi tic pien ni onyomme nyo pe onyomme.​—1 Kor. 7:32-35, 38.

9. Ngo ma watwero waco madok i kom nyom nyo bedo ma wi nono?

⁹ Yecu ki Paulo pe gupwonyo ni Lukricitayo myero gunyomme nyo gubed ma wigi nono. Dong, ngo ma watwero waco madok i kom nyomme nyo bedo ma wi nono? Wi Lubele me Oktoba 1, 2012 omiyo lagam maber pi lapeny man. Otito ni: “Ki lok ada, jami aryo-ni ducu [nyom nyo bedo ma wi nono] kitwero lwongogi ni mot ma oa ki bot Lubanga. . . . Jehovah pe neno [bedo ma wi nono]  calo gin mo ma myero okel lewic nyo cwercwiny ki dano.” Pi meno, omyero wawor omege ki lumege ma wigi nono ma gitye i kacokke.

10. Ka waworo omegiwa ki lumegiwa ma wigi nono, ngo ma pe wabitimo?

¹⁰ Watwero nyuto woro nining pi omegiwa ki lumegiwa ma wigi nono? Omyero wiwa opo ni Lukricitayo mogo ma wigi nono dong guketo macalo yubgi ni pe gibinyomme. Mukene gimito nyomme ento peya gunongo ngat mupore me anyomme. Mukene doki gurwenyo luotgi i to. Labongo paro pi tyen lok ma oweko wigi nono, tika pore pi jo me kacokke me penyo Lakricitayo ma wiye nono pingo en pe onyomme nyo dyere me konye nongo lapal cwinye? Tye lok ada gire ni, Lukricitayo mogo ma wigi nono gitwero penyo pi kony meno. Ento ka pe gupenyo pi kony, omego nyo lamego ma wiye nono twero winyo nining ka wajalle me minigi kony me nongo luotgi? (1 Tec. 4:11; 1 Tem. 5:13) Wek kong wanyamu lok pa omege ki lumege mogo ma lugen ma wigi nono.

11-12. I yo ma nining ma watwero balo kwede cwiny jo ma wigi nono?

¹¹ Laneno me adwol mo acel ma wiye nono dok cobo ticce maber ye ni mot mapol bino pi bedo ma wi nono. Ento en owaco ni, turo cwinye adada ka omege ki lumege gibedo ka penye ni: “Pingo pud pe inyomme?” Omego mo ma wiye nono ma tiyo i jang gang kal mo acel owaco ni: “Kare mogo, aneno ni omege ki lumege gitamo ni omyero gibed ka neno jo ma wigi nono ki wang me kica. Man weko bedo ma wi nono nen calo yec mapek ento pe mot.”

¹² Lamego mo ma wiye nono ma tiyo i Betel owaco ni: “Omege ki lumege mukene gitamo ni jo ducu ma wigi nono gitye ka yenyo keny nyo ni kare ducu ka gitye ka namo i kin utmege nongo gitye ka yenyo ngat mo me anyoma. I kare mo ma acito i kabedo mukene ka tiyo ticca me Betel, ao i nino me cokke me dye cabit. Lamego ma onongo atye ka buto i gange owacca ni i kacokkegi gitye ki omege aryo ma wigi nono ma mwakagi rwatte ki mega. En owacca ni pe etye ka dida me nongo lapal cwinya. Ento, i kare ma wadonyo i Ot me Ker nitap, en oywaya ci otera ka ma omege aryo ma wigi nono-ni gitye iye. Ngene kene ni, man oleyo wiya wa ki omege aryo-ni bene.”

13. Labol mene ma ocuko cwiny laminwa mo ma wiye nono?

¹³ Lamego mukene ma bene tiyo i Betel dok wiye nono owaco ni: “Angeyo lupainia mogo muteggi, wigi nono, gucung matek, gitye ki yub me cwiny, gitye atera me konyo jo mukene, dok cwinygi yom pi tic ma gitimo pi kacokke. Gitye ki neno ma atir i kom bedo ma wigi nono. Pe gitamo ni pigi tek loyo jo munyomme nyo gibedo ma cwinygi cwer pien pe gunyomme dok gipe ki lutino.” Meno aye ber pa bedo i kacokke ma dano ducu giworo iye luwotgi dok giterogi calo pigi tek. Nongo ingeyo ni omege pe gineni ki wang me kica nyo nyeko pien ni wi nono; dok pe gicayi nyo giilo rwommi malo. Iwinyo calo gimari matek.

14. Watwero nyuto nining ni waworo jo ma wigi nono?

¹⁴ Omegiwa ki lumegiwa ma wigi nono gibibedo ki pwoc ka waterogi calo jo ma pigi tek pi kitgi mabeco kun pe wabedo ka nenogi ki wang me kica. Me ka meno, bedo ber ka wapwoyogi pi gwoko  gennegi. Macalo adwogine, omegiwa ki lumegiwa ma wigi nono pe gubiwinyo calo watye ka waco botgi ni: “An pe amiti.” (1 Kor. 12:21) Me kaka meno, gibingeyo ni waworogi dok cwinywa yom ni gitye i kacokke.

15. Alokaloka ango ma jo mukene gutimo wek gidong ticgi me pwony?

¹⁵ I mwaki mogo macok cok-ki, lutit kwena mapol guketo macalo yubgi me pwonyo leb mukene wek gudong ticgi me pwony. Me timo meno mito alokaloka mapol i kwogi. Omege ki lumege magi guweko kacokke ma kiloko iye lebgi wek gucit ka tic i kacokke ma kiloko iye leb mukene ma gitye ki can lutit kwena. (Tic 16:9) Man obedo tam ma Lukricitayo magi gumoko pigi kengi wek giten kor tic me Ker. Kadi bed ni twero tero mwaki mapol wek gulok leb manyen man mapwot, ento pud gicobo tic mabeco mapol i kacokke. Kitgi mabeco kacel ki ngec madwong ma gitye kwede konyo me jingo omege ki lumege me kacokke. Pud dong watye ki pwoc madit ya pi jalle pa omege ki lumege magi!

16. Ngo ma luelda gijenge iye me ngiyo ka omego moni opore me tic macalo laelda nyo lakony kor tic?

¹⁶ Luelda omyero pe gukwer miyo nying omego moni me tic macalo laelda nyo lakony kor tic pien ni en pe twero loko leb me kacokke meno maber. Luelda gingiyo ka omego moni opore pi tic kun gijenge i kom gin ma Baibul waco ento pe i kom kit ma omego moni twero loko kwede leb me kacokke meno maber.​—1 Tem. 3:1-10, 12, 13; Tito 1:5-9.

17. Lapeny mene ma jo me ot ma gudak i lobo mukene gikemme kwede?

¹⁷ Jo me odi mogo gudak i lobo mukene macalo luring ayela nyo pi yenyo tic. Macalo adwogine, twero bedo ni lutinogi dong gicito i cukul ka ma kiloko iye leb me lobo meno. Twero mitte ni lunywal bene gupwony leb meno wek okonygi me nongo tic. Ket kong ni kacokke nyo gurup mo tye ma kiloko iye leb pengi. Kacokke mene ma omyero jo me ot man gucit iye? Tika omyero gucit i kacokke ma kiloko iye leb me lobo meno nyo kacokke ma kiloko iye leb pengi?

18. Ma lubbe ki Jo Galatia 6:5, watwero nyuto worowa nining pi tam ma lawi ot moni omoko?

¹⁸ Lawi ot aye myero omok kacokke mene ma en ki lupacone gibibedo iye. Kit macalo man obedo lok ma gudogi, en myero onen gin maber loyo pi lupacone. (Kwan Jo Galatia 6:5.) Mitte ni wawor tam ma lawi ot man omoko. Omyero waye tam mo keken ma en omoko, dok wajol en ki jo me ode i kacokkewa.​—Rom. 15:7.

19. Gin ango ma omyero luwi odi gutam iye kun gilego pire?

 ¹⁹ I kare mukene, jo me ot moni giromo bedo i kacokke ma tiyo ki leb pen lunywal, ento nongo lutinogi pe giloko leb meno maber. Ci romo bedo ni lutino ginongo tek me niang pwony ma kimiyo i cokke dok pe gibidongo i yo me cwiny. Pingo? Pien twero bedo ni lutino gicito i cukul ka ma kiloko iye leb me lobo meno ento pe leb pen lunywalgi. Ka tye kit meno, ci lawi ot omyero otam iye matut kun lego pi ryeko me moko gin me atima wek ekony lutinone me nyikke cok bot Jehovah ki jone. Twero mitte ni okony lutinone me pwonyo leb pengi maber nyo gukob i kacokke ma tiyo ki leb ma lutinogi niang iye maber. Tam mo keken ma lawi ot omoko, kacokke ma gin guyero me bedo iye myero guwek en ki jo me ode gubed agonya kun giminigi woro.

20. Watwero nyuto nining ni waworo omege ki lumegiwa ma gitye ka tute me pwonyo leb manyen?

²⁰ Pi tyen lok ducu ma wanyamo-ni, i kacokke mapol gitye ki omege ki lumege ma gitye ka tute me pwonyo leb manyen. Twero bedo tek botgi me tito tamgi. Ento, ka pe waketo cwinywa i kom kit ma giloko kwede leb manyen-ni, wabineno margi pi Jehovah ki mitigi me tic pire. Ka waneno kitgi mabeco magi, ci wabibedo ki woro matut pi omege ki lumege magi. Pe wabiwaco botgi ni ‘wan giwa pe wamitowu’ pien ni pe giloko lebwa maber.

21-22. Mot mamwonya ango ma watye kwede?

²¹ Jehovah ominiwa mot mamwonya me bedo i kacokkene. Kadi bed watye co nyo mon, wiwa nono nyo wanyomme, wati woko nyo pud watino, waloko leb moni maber nyo pe, wan ducu piwa tek bot Jehovah ki bot luworo luwotwa.​—Rom. 12:4, 5; Kol. 3:10, 11.

²² Walego ni wamedde wunu ki keto i tic pwony mamwonya ma wanongo ki i lapor pa Paulo ma kwako dul kom dano. Man bikonyowa me ngeyo gin ma myero watim me cuko cwiny omegiwa ki lumegiwa. Bikonyowa bene me nyuto mar ki woro pigi kare ducu.